Jongmense vra . . .

Hoe kan ek die waarheid liefkry?

“Ek het as een van Jehovah se Getuies grootgeword, en ek het altyd gedink dat jy Jehovah werklik ken as jy só grootgemaak is. Hoe verkeerd was ek tog!”—Antoinette.

“WAT is waarheid?” Pontius Pilatus, die man wat Jesus oorgelewer het om tereggestel te word, het hierdie welbekende vraag gestel (Johannes 18:38). Maar Pilatus se siniese vraag was klaarblyklik bedoel om opregte gesprekvoering te beëindig—nie te begin nie. Hy het nie werklik in “waarheid” belanggestel nie. Maar wat van jou? Stel jy in waarheid belang?

Filosowe peins al eeue lank oor wat waarheid is, met bitter min resultate. Maar jy kan die antwoord op Pilatus se vraag vind. Jesus Christus het geleer dat God se Woord waarheid is. Hy het ook van homself as “die waarheid” gepraat. En die apostel Johannes het geskryf: “Die waarheid het deur middel van Jesus Christus gekom” (Johannes 1:17; 14:6; 17:17). Al die Christelike leringe, wat later ’n deel van die Bybel geword het, word dus ook “die waarheid” of “die waarheid van die goeie nuus” genoem (Titus 1:14; Galasiërs 2:14; 2 Johannes 1, 2). Hierdie Christelike leringe sluit dinge in soos God se persoonlike naam, die oprigting van God se Koninkryk, die opstanding en Jesus se losprys.—Psalm 83:18, NW; Matteus 6:9, 10; 20:28; Johannes 5:28, 29.

Duisende jongmense het Bybelwaarheid by hulle Christenouers geleer. Maar beteken dit dat hulle ‘in die waarheid wandel’? (3 Johannes 3, 4). Nie noodwendig nie. Die 20-jarige Jennifer is byvoorbeeld as een van Jehovah se Getuies grootgemaak. Sy sê: “My ma het my na Getuie-byeenkomste geneem en laat deurskemer dat ek daaraan moet dink om my te laat doop. Maar ek het gedink: ‘Ek wil nooit ’n Getuie wees nie. Ek wil net pret hê!’”

Party jongmense glo wat hulle geleer het, maar hulle het nie ’n dieper begrip ontwikkel van wat die Bybel ons werklik leer nie. Die gevaar? Jesus het gewaarsku dat party individue “geen wortel in hulleself [het] nie”. Sulke mense bly dalk “’n tyd lank; sodra daar dan verdrukking of vervolging weens die woord ontstaan, word hulle tot struikeling gebring” (Markus 4:17). Ander kan hulle Bybelse oortuiging so op ’n manier verduidelik, maar hulle het God nie persoonlik leer ken nie. ’n Jong vrou met die naam Aneesa sê: “Ek dink nie ek het ’n werklike verhouding met Jehovah gehad toe ek jonger was nie . . . Ek dink dit het hoofsaaklik van my ouers se verhouding met hom afgehang.”

Waar staan jy in hierdie opsig? Is Jehovah bloot die God van jou ouers? Of kan jy soos die Bybelpsalmis sê: “Ék vertrou op U, o HERE! Ek sê: U is my God”? (Psalm 31:15). Dit verg dalk moed om die feite onder die oë te sien. ’n Jong man met die naam Alexander sê: “Vir my was eerlike selfondersoek die eerste stap.” Nadat jy ’n bietjie selfondersoek gedoen het, besef jy dalk dat jy jou nog nooit werklik van die waarheid (al die Christelike leringe) vergewis het nie. Jy het dalk nie ’n vaste oortuiging nie, en jou lewe lyk moontlik doelloos, sonder werklike rigting.

Jehovah se Getuies sing dikwels by hulle Christelike vergaderinge ’n lied met die titel “Kry die waarheid lief”.a Hierdie raad is dalk gepas vir jou. Maar hoe kan jy dit doen? Waar begin jy?

Vergewis jou van die waarheid

In Romeine 12:2 vind ons die raad van die apostel Paulus: “[Vergewis] julle van die goeie en aanneemlike en volmaakte wil van God.” Presies hoe kan jy dit doen? Deur “die juiste kennis van die waarheid” op te doen (Titus 1:1). Eertydse inwoners van die stad Berea het nie sommer net die dinge aangeneem wat hulle gehoor het nie. Inteendeel, hulle het “die Skrif daagliks sorgvuldig ondersoek of hierdie dinge [wat hulle geleer het] so was”.—Handelinge 17:11.

’n Jong Christen met die naam Erin het besef dat sy dieselfde moet doen. Sy sê: “Ek het navorsing gedoen. Ek het my afgevra: ‘Hoe weet ek dat dit die regte godsdiens is? Hoe weet ek dat daar ’n God met die naam Jehovah is?’” Jy kan gerus met jou eie persoonlike studieprogram begin. Jy kan begin met die Bybelpublikasie Kennis wat tot die ewige lewe lei.b Lees dit sorgvuldig. Slaan al die teksverwysings na en kyk hoe dit verband hou met wat jy lees. Dit verbaas jou dalk as jy uitvind hoe anders jy oor die waarheid voel wanneer jy “’n werker [word] wat hom oor niks hoef te skaam nie, wat die woord van die waarheid reg hanteer”.—2 Timoteus 2:15.

Die apostel Petrus het gesê dat sommige dinge in die Bybel “moeilik is om te verstaan”, en jy sal vind dat dit wel die geval is (2 Petrus 3:16). Maar God se gees kan jou help om selfs moeilike onderwerpe te verstaan (1 Korintiërs 2:11, 12). Bid vir God se hulp wanneer jy sukkel om iets te verstaan (Psalm 119:10, 11, 27). Probeer bykomende navorsing in die publikasies van die Wagtoringgenootskap doen. As jy nie seker is hoe om dit te doen nie, kan jy iemand vra om jou te help. Jou ouers of moontlik ander volwasse lede van die Christengemeente kan jou help.

Onthou, jy studeer nie sodat jy ander met jou kennis kan beïndruk nie. ’n Jong man met die naam Collin verduidelik: “Jy leer Jehovah se eienskappe ken.” Neem tyd om te peins oor wat jy lees sodat dit in jou hart kan insink.—Psalm 1:2, 3.

Dit kan jou ook help as jy by Christelike vergaderinge met die gemeente assosieer. Die gemeente is per slot van rekening “’n pilaar en stut van die waarheid”, soos die apostel Paulus geskryf het (1 Timoteus 3:15). Party jongmense kla dat Christelike vergaderinge vervelig is. “Maar as jy nie vir die vergaderinge voorberei nie”, herinner die jong Collin, “dan sal jy nie baie baat daarby vind nie.” Berei die dele dus voor die tyd voor. Vergaderinge is soveel interessanter wanneer jy ’n deelnemer is—nie bloot ’n toeskouer nie.

Te besig om te studeer?

Ons gee toe dat dit ’n uitdaging kan wees om tussen al jou skoolwerk en huishoudelike take deur ook tyd te kry om te studeer. ’n Jong meisie met die naam Susan skryf: “Ek het jare lank ’n stryd gevoer omdat ek geweet het dat ek vir vergaderinge moet voorberei en persoonlike studie moet doen, maar tog kon ek dit net nooit regkry nie.”

Susan het geleer om ‘tyd uit te koop’ van minder belangrike dinge (Efesiërs 5:15, 16). Eerstens het sy ’n lys gemaak van al die dinge wat sy moes studeer. Daarna het sy tyd opsy gesit om dit te studeer. Maar sy het ook ’n bietjie tyd vir ontspanning by haar rooster ingesluit. Sy gee die volgende raad: “Moenie elke vry oomblik by jou rooster insluit nie. Ons het almal ’n bietjie tyd nodig om te ontspan.” Dit sal jou waarskynlik ook help om ’n rooster te hê.

Vertel ander wat jy leer

As jy gebruik wat jy leer, sal dit jou veral help om dit te onthou. Probeer iemand anders leer. Die psalmis het gesê: “My mond sal louter wysheid spreek, en die oordenking van my hart is net verstand.”—Psalm 49:4.

As jy jou nie vir die goeie nuus skaam nie, sal jy nie huiwer om skoolmaats en ander wat jy dalk teëkom daarvan te vertel nie (Romeine 1:16). Deur sulke geleenthede te gebruik om ander van die waarheid te vertel, sal jy gebruik wat jy leer; en op hierdie manier sal jy die waarheid in jou verstand en hart laat insink.

Let op jou omgang

Sommige Christene in die eerste eeu het goeie geestelike vooruitgang gemaak. Maar die apostel Paulus moes kort voor lank vir hulle skryf om te vra: “Wie het julle verhinder om die waarheid te bly gehoorsaam?” (Galasiërs 5:7). Iets dergeliks het met ’n jong man met die naam Alex gebeur. Hy erken dat sy pogings om God se Woord te bestudeer, ondermyn is omdat hy “met slegte vriende gemeng het”. Jy sal dalk ook ter wille van jou geestelike vooruitgang ’n paar veranderinge in hierdie opsig moet maak.

Aan die ander kant kan goeie omgang jou werklik help om vordering te maak. Spreuke 27:17 sê: “Yster slyp yster, so slyp die een mens die persoon van die ander.” Soek goeie rolmodelle—mense wat die waarheid in hulle eie lewe toepas. Jy hoef dalk nie verder as jou eie huisgesin te soek nie. Die jong Jennifer sê: “My oupa was my beste voorbeeld. Hy het altyd drie uur daaraan bestee om vir ons gemeentelike Bybelstudie op ’n Sondag voor te berei. Hy het elke teks in die les in verskillende Bybelvertalings nageslaan en woorde in sy woordeboek opgesoek. Hy was ’n kenner van minder bekende Bybelfeite. Jy kon hom enigiets vra, en hy sou die antwoord vind.”

Wanneer jy die waarheid innig liefkry, verkry jy ’n kosbare besitting—iets wat jy vir geen geld ter wêreld sal prysgee nie. Moet dus nooit die waarheid as bloot “my ouers se godsdiens” beskou nie. Jou oortuiging behoort dieselfde as dié van die psalmis te wees wat gesê het: “As my eie vader en my eie moeder my sou verlaat, sal Jehovah my opneem” (Psalm 27:10, NW). Jy sal toon dat jy die waarheid liefgekry het deur werklik te weet wat die Bybel leer, dit te glo, jou oortuiging aan ander te verkondig en, bowenal, deur in ooreenstemming met hierdie oortuiging te lewe.

[Voetnote]

[Prent op bladsy 13]

Vergewis jou van die waarheid deur jou eie navorsing en persoonlike studie te doen