Van ons lesers

Straatbendes Die artikels oor straatbendes in die Ontwaak! van 22 April 1998 het my diep geraak. Ek is op die oomblik in ’n verbeteringskool. My ma is een van Jehovah se Getuies, maar ’n ruk gelede het ek opgehou om na die vergaderinge toe te gaan. Toe het ek met slegte vriende deurmekaargeraak en deelgeneem aan ’n reeks gewelddadige rooftogte. Dit is waarom my ma hierdie Ontwaak! vir my gestuur het. Ek het eers gedink: ‘Al weer dít!’ Maar terwyl ek daarna gekyk het, het ek daarin verdiep geraak en alles gelees. Toe ek dit klaar gelees het, het ek anders gedink. Ek het nooit besef dat die Ontwaak! my soveel kon help nie. Ek wil ’n nuwe begin maak en weer vergaderinge bywoon. Ek het besluit dat ek nooit weer dieselfde foute wil maak nie en dat ek Jehovah wil dien so lank as wat ek lewe.

M. S., Japan

Ek is ’n enkelouer met ’n 11-jarige seun en ’n 9-jarige dogter, en ons woon in ’n gebied waar daar baie verskillende bendes is. Ek het hierdie tydskrif gelees en dit onmiddellik met my kinders bespreek. Met behulp van die artikel het hulle besef dat dit nooit ’n plaasvervanger vir liefde of ’n veilige gesinslewe is om lid van ’n bende te wees nie.

B. S., Verenigde State

My opregte dank vir die artikels. Ek voel dikwels besorg oor my tienderjarige neefs, en die inligting wat julle voorsien het, was baie nuttig.

I. M. M., Brasilië

Die artikels het net op die regte tyd gekom, want party van my klasmaats is besig om ’n bende te stig. Party is nie seker of hulle regtig aan ’n bende wil behoort nie, want die leier het hulle lelike woorde oor ons skoolhoof op die muur laat skryf. Dankie dat julle die jongmense in hierdie moeilike tye help.

B. C. G., Mexiko

Met liefde versmoor Ek wil net sê hoeveel ek die artikel “Jongmense vra . . . Hoe kan ek keer dat ’n vriend my met liefde versmoor?” (22 April 1998) waardeer het. Hoewel ek ’n volwassene is en getroud is, geniet ek dit altyd om hierdie artikels te lees. Hierdie spesifieke een beskryf die situasie waarin ek en my man ons tans bevind so goed dat ek dit vyf keer gelees het voordat ek dit neergesit het. Dit het my help besef dat selfs Jesus tyd vir homself nodig gehad het.

P. A., Trinidad

Weens klein misverstande hou ek en my vriend soms op om met mekaar te praat, en dit laat my so sleg voel dat ek nie kan konsentreer nie. Nadat ek die artikel ’n hele paar keer gelees het, het ek besef dat ek my vriend met liefde versmoor en hom nie tyd gee om ander dinge te doen nie. Ek dink dat hierdie artikel spesiaal vir my geskryf is, want dit het my op soveel maniere gewys hoe ek my verhoudings met ander kan verbeter.

R. S., Indië

Ortodonsie Op ’n onlangse besoek aan my tandarts het ek ’n eksemplaar van die Ontwaak! van 8 April 1998 met die artikel oor ortodonsie daar gelaat. Die tandarts het later sy waardering uitgespreek en gesê dat die artikel insiggewend en saaklik was en op ’n maklik verstaanbare manier geskryf is. Hy het ook gesê dat hy kopieë van die artikel aan sommige van sy pasiënte gegee het sodat hulle hulle behandelingsprogram makliker kon verstaan.

T. P., Engeland

Grace Marsh se lewensverhaal Ek wil baie dankie sê vir Grace Marsh se ondervinding in die Ontwaak! (22 April 1998). Dit was opbouend en bemoedigend om te lees van haar moed om ten spyte van teenkanting aan te hou met die predikingswerk. Dit het my selfs groter waardering gegee vir die vryheid wat ons het om die predikingswerk te doen as gevolg van die pogings van die broers in die verlede.

C. F., Verenigde State