Die waarheid oor engele
SOOS ons gesien het, kom gewilde idees en verslae oor engele nie altyd ooreen met wat die Bybel leer nie. Maak dit saak dat daar verskille bestaan? Kan dit kwaad doen as ’n mens gewilde opvattings oor engele aanvaar? Baie beslis.
Neem byvoorbeeld die gesindhede wat deur “die nuwe geestelikheid” aangemoedig word. Hedendaagse boeke oor engele moedig kinderlike passiwiteit aan, nie die gebruik van denkvermoë nie. Lesers word selde aangemoedig om hulle probleme op te los of die betekenis van die Bybel en die kennis van God na te speur. Boeke oor engele verseker ons dat ons deur die lewe gaan met ’n vriendelike en liefdevolle engel aan ons sy en dat daar geen rede is om bang te wees nie, aangesien ons in ’n gelukkige kosmos lewe waar alles is soos dit moet wees. Wanneer ’n probleem opduik, hoef ons net te wag dat die engele ingryp. Maar as dit die geval is, waarom sê die Bybel dan vir ons om “hard te stry vir die geloof”?—Judas 3.
Baie boeke oor engele is op die mens se trots en ydelheid gerig. Hulle vestig die aandag op die self. Volgens sulke bronne wil hedendaagse engele hê ons moet weet hoe mooi en stralend ons is. Hoewel dit goed is om ’n goeie selfbeeld te hê, is ’n vername tema van “die nuwe geestelikheid” om onsself onvoorwaardelik lief te hê. Een skrywer sê dat die eerste en grootste gebod is om “jouself as Here lief te hê”. Hoe teenstrydig is dit tog met Jesus se woorde! Hy het gesê: “‘Jy moet Jehovah jou God liefhê met jou hele hart en met jou hele siel en met jou hele verstand.’ Dit is die grootste en eerste gebod” (Matteus 22:36-39). Ons sal die meeste geluk uit die lewe put as ons God se belange belangriker ag as ons eie.
Dit is in stryd met die ware Christelike geloof om engele op die voorgrond te plaas. Die apostel Paulus het die aanbidding van engele veroordeel (Kolossense 2:18). Om te aanbid, beteken “om as ’n goddelike wese of bonatuurlike mag te eer of te eerbiedig”. En tog moedig talle gewilde boeke oor engele lesers juis aan om engele te eer en te eerbiedig. Maar dink aan wat gebeur het toe Satan Jesus gevra het om ’n enkele daad van aanbidding teenoor hom te verrig. Jesus het geantwoord: “Dit is Jehovah jou God wat jy moet aanbid, en dit is aan hom alleen wat jy heilige diens moet verrig” (Lukas 4:7, 8). Later, toe die apostel Johannes voor ’n engel neergeval het, het die engel vir hom gesê: “Pas op! Moet dit nie doen nie! Ek is maar net ’n medeslaaf van jou en van jou broers wat die werk het om van Jesus te getuig. Aanbid God.”—Openbaring 19:10.
Hoe engele jou kan help
Die een by wie ons leiding en hulp moet vra, is God, nie die engele nie. Hy is gewillig om liefde uit te stort oor almal wat aan sy regverdige vereistes voldoen en hy doen dit met vreugde. Die apostel Johannes het aan mede-Christene geskryf: “Dít is die vertroue wat ons teenoor hom het, dat hy ons hoor, ongeag wat ons volgens sy wil vra. Verder, as ons weet dat hy ons hoor met betrekking tot wat ons ook al vra, weet ons dat ons die dinge gaan kry wat ons gevra het, aangesien ons dit van hom gevra het.”—1 Johannes 5:14, 15.
Daar is baie dinge omtrent God se getroue engele wat ons nie weet nie. Maar ons weet wel dat hulle God dien en in ooreenstemming met sy voorneme en leiding werk. Hulle is gretig om die waarheid oor God te bevorder (Openbaring 14:6, 7). Hulle wil nie hê dat ons hulle moet aanbid nie. Aangesien ons hulle nie kan sien nie, weet ons nie in watter mate God hulle gebruik om sy volk met alledaagse sake te help nie. Maar ons weet dat Jehovah God sy volk as ’n groep beskerm en lei.
Wat ’n goeie voorbeeld stel getroue engele tog vir ons! Hulle verheerlik en loof God (Psalm 148:2). Al het hulle groot verstandelike en geestelike mag, toon hulle diepe respek vir Jehovah se soewereiniteit (Judas 9). Hulle stel intens belang in die vervulling van God se voornemens (1 Petrus 1:11, 12). Ons leer hierdie dinge in God se Woord, die Bybel. Ja, die Bybel is die boek wat ons die waarheid oor engele vertel.
[Lokteks op bladsy 10]
Engele is gretig om die waarheid oor God te bevorder
[Prent op bladsy 8, 9]
Toe die apostel Johannes ’n engel wou aanbid, het die engel gesê: “Moet dit nie doen nie!”