Ons beskou die wêreld
Gebrek aan bekwame ouers
Kanada se eerste nasionale opname oor ouerskap toon dat “baie [ouers] nie eers ’n basiese kennis het van kinders se ontwikkeling en hoe ouers daardie proses kan bevorder nie”, sê die National Post. Van die meer as 1 600 “vaders, moeders en enkelmoeders met kinders jonger as ses” wat aan die opname deelgeneem het, het 92 persent erken dat ouerskap hulle heel belangrikste taak is. En tog “was minder as die helfte van hulle ten volle bewus van die feit dat hulle ’n positiewe invloed op hulle kind se intelligensie kan hê deur vir hulle te lees, met hulle te speel, hulle aan te raak of hulle vas te hou”. Daarbenewens “meen [ongeveer 30 persent van hulle] dat elke baba gebore word met ’n sekere intelligensie, wat nie deur die ouers se interaksie met hulle vergroot of verklein kan word nie”. Sulke bevindings is kommerwekkend, sê die Post, aangesien navorsing toon dat “’n kind se eerste vyf jaar deurslaggewend is in die ontwikkeling van hulle vermoë om te leer, te skep, lief te hê, te vertrou en om ’n goeie begrip van hulle eiewaarde te ontwikkel”.
Swede gaan Kerk en Staat skei
Die Kerk van Swede sê dat hy vanaf 1 Januarie 2000 afsonderlik van die Staat gaan bestaan. Dit sal die bande verbreek wat al van die 16de eeu af tussen die Kerk en die Sweedse regering bestaan. “Tot en met die eerste Januarie 1996 was dit moontlik vir kinders om by geboorte outomaties lidmate van die Kerk van Swede te word, mits een van die ouers ’n lidmaat was”, sê die kerk se amptelike webruimte. “Doop was nie ’n vereiste nie.” Die hervorming is in 1995, ná vier dekades van debatvoering en voorstelle in die kerksinode, deur die Sweedse regering bekragtig. Ongeveer 88 persent van die Sweedse bevolking is lidmate van die Kerk van Swede.
Geweld teen rekenaars
“Wat moet jy doen wanneer jou PR [persoonlike rekenaar] nie doen wat jy wil hê hy moet doen nie?” vra die Duitse elektroniese tydskrif PC Welt. “Stamp jy hom? Of gooi jy hom sommer by die venster uit?” Sulke reaksies is algemeen. In ’n wêreldwye opname onder 150 inligtingstegnologiebestuurders het 83 persent vertel van woedeuitbarstings of openlike geweld teen rekenaars. Gebruikers wat gefrustreerd is omdat dit ’n ewigheid duur om inligting af te laai of omdat ’n muis ophou werk, breek soms die skerm, slaan die toetsbord, gooi die muis teen die muur of skop selfs die rekenaar. Hoewel die rekenaar die ergste van die gebruiker se frustrasie moet verduur, is dit dikwels die gebruiker wat die probleem veroorsaak het. Een werker het byvoorbeeld kwaad geword vir haar E-posprogram omdat dit glad nie pos gestuur het nie. Later is gevind dat sy in plaas van die E-posadres ’n straatadres ingetik het.
Lyk suksesvol
Wanneer jy vir ’n werksonderhoud voorberei, is dit goed om in gedagte te hou dat “goed geklede mense ’n goeie indruk skep”, sê die koerant die Toronto Star. Die rede hiervoor is dat ’n eerste indruk lank onthou word. Daarom “is die boodskap vir diegene in die sakewêreld basies soos volg: As jy onverskillig oor jou voorkoms is, is jy nou maar eenmaal ’n onverskillige persoon”, sê die berig. Deskundiges sê dat iemand wat netjies en skoon lyk aan toekomstige werkgewers of kliënte die onuitgesproke versekering gee dat hulle werk van goeie gehalte van hulle kan verwag. Voorkomskonsultante beklemtoon ook die feit dat “’n regop en energieke houding ’n goeie eerste indruk laat. Jou stemtoon en hoe vinnig jy praat, maak ’n verskil.”
Hedendaagse seerowers
“Seerowery is vandag moontlik dié grootste bedreiging vir moderne skeepvaart”, berig die International Herald Tribune. Aanvalle deur seerowers neem toe, veral in die waters van Suidoos-Asië, blykbaar as gevolg van die feit dat die gebied minder deur die vloot gepatrolleer word. Hierdie waters, waar van die besigste skeepsroetes ter wêreld geleë is, lewer oorvloedige buit aan seerowers, wat hulle bedrywighede glo van die talle afgesonderde eilande in die streek af reël. Goed gewapende seerowers gebruik snags snelbote om skepe van al hulle waardevolle artikels te beroof. Amptenare sê dat seerowers, wat moeilik op see gevang kan word, net gekeer kan word as hulle op land opgespoor kan word waar hulle hulle gesteelde goedere verkoop.
Egipte se goudmyne
Egipte se goudmyne het in antieke tye na bewering meer as 1 500 ton goud gelewer. Al is dit byna 2 000 jaar sedert enige noemenswaardige hoeveelheid goud daar gemyn is, skat geoloë dat daar nog baie goud in die grond oor is. “Ons wil graag die glorie van die Farao’s terugbring en ons wil ons myne, wat meer as 6 000 jaar oud is, heropen”, het Sami El-Raghy, besturende direkteur van ’n Australiese goudmynmaatskappy, gesê. Die Egiptiese regering het die mineraalregte op die Oostelike Woestyn langs die Rooi See, waar daar 16 bekende Faraoniese myne is, aan sy maatskappy toegeken. Maar ’n 2 900 jaar oue kaart wat in 1820 in Luxor (eertydse Tebe) ontdek is, toon dat daar nog 104 myne in die gebied is waarvan die ligging onbekend is en wat deur woestynsand bedek is. Volgens The Wall Street Journal kan party van hulle glo weer lewensvatbare goudmyne word indien moderne tegnieke gebruik word.
Sesmiljard en ons tel nog
Die Verenigde Nasies se Bevolkingsfonds reken dat die wêreldbevolking op 12 Oktober 1999 op sesmiljard te staan gekom het. Die wêreldbevolking het in net 12 jaar van vyf- tot sesmiljard gegroei, het Carl Haub, van die Buro vir Bevolkingstatistiek, gesê. Volgens ’n verslag van die buro “het die wêreldbevolking in die 20ste eeu met 4,4 miljard toegeneem”, terwyl “die bevolking [in die 19de eeu] met net sowat 600 miljoen toegeneem het”. Toenames in lewensverwagting is die hoofrede waarom die wêreldbevolking in die 20ste eeu so gegroei het. “Vandag kom ongeveer 98 persent van die toename in die wêreldbevolking in minder ontwikkelde lande voor”, het Haub gesê.
Rekordtemperature
“In 1998 het die Aarde se gemiddelde temperatuur letterlik bo van die grafiek af beweeg”, sê ’n persverklaring van die Worldwatch-instituut. Hoër atmosferiese temperature lei tot meer verdamping en reënval, wat weer vernietigender storms tot gevolg het. Byvoorbeeld, “in 1998 het weerskade wêreldwyd op $92 miljard [R565 miljard] te staan gekom, ’n ongelooflike 53 persent meer as die vorige rekord van $60 miljard [R368 miljard] in 1996”, sê Worldwatch. Daarbenewens het hewige storms en oorstromings in 1998 daartoe gelei dat ongeveer 300 miljoen mense noodgedwonge hulle huise moes verlaat. Wetenskaplikes is nie seker of 1998 ’n afwyking was en of hierdie vernietigende neiging sal voortduur nie. Maar die verslag het gesê: “Klimaatnabootsingsmodelle dui daarop dat die gebeure van 1998 ’n voorsmakie van die toekoms kan wees.”
Vinnige herbebossing
’n Deel van die Amasonereënwoud wat deur mynbou vernietig is, is binne twee jaar in ’n welige woud omskep, berig die tydskrif New Scientist. Wetenskaplikes by Embrapa, ’n regerings- landboukundige navorsingsentrum in Brasilië, het ’n metode ontwikkel om stikstofbindende bakterieë in boomsade in te plant. Nadat hulle geplant is, groei hulle aansienlik vinniger. Die tegniek was suksesvol by Oriximiná, in die noordelike staat Para, waar die ontginning van aluminiumerts uitgebreide ontbossing tot gevolg gehad het. Navorsers gebruik die nuwe metode aan Brasilië se ooskus, waar net 6 persent van die oorspronklike woud nog oor is, sê die tydskrif.
Die waarde van ’n moeder
As jy die salarisse sou bymekaartel vir al die take wat ’n moeder regdeur die jaar doen, hoeveel sou haar dienste werd wees? Volgens ’n verslag in The Washington Post sou sy R3 123 400 per jaar ontvang! Hierdie bedrag is gebaseer op ’n studie van gemiddelde salarisse vir take wat moeders gewoonlik uitvoer. Hier volg ’n paar van die 17 beroepe wat in die verslag ingesluit is, tesame met hulle gemiddelde jaarlikse salaris: Kinderoppasser, R79 800; busbestuurder, R196 400; sielkundige, R178 000; diereversorger, R104 300; geregistreerde verpleegster, R214 900; uitvoerende sjef, R245 600 en algemene kantoorklerk, R116 600. Volgens Ric Edelman, voorsitter van die finansiële maatskappy wat die studie gedoen het, neem hierdie bedrae nie uitgawes soos bydraes tot pensioenfondse en ander aftreevoordele in berekening nie.