Van ons lesers

Santeria Julle begin julle artikel in die Ontwaak! “Die aantrekkingskrag van Santeria” (8 Julie 2000) deur te impliseer dat Santeria eintlik net in Kuba gewild is en dat dit van Kuba is wat Santeria geleidelik na ander lande versprei het. En tog versteek in die artikel vind ’n mens dat Santeria deur Afrika-slawe van Nigerië na al die Karibiese eilande geneem is. Hierdie artikel is nie deur ’n Kubaan geskryf nie, maar deur iemand van Mexiko. Dit is wat ’n mens sensasiejoernalisme noem, en dit tas julle geloofwaardigheid aan.

V. R., Verenigde State

Dit was geensins ons bedoeling om te impliseer dat Santeria “eintlik net in Kuba gewild is” nie. Inteendeel, ons het getoon dat Santeria algemeen beoefen word in ander wêrelddele, insluitende Mexiko en die Verenigde State. Wat die verspreiding van Santeria betref, sê die “Encyclopædia Britannica” dat Santeria ’n “godsdienskultus is wat sy oorsprong in Kuba gehad het en van daar na aangrensende eilande versprei het . . . Dit het ontwikkel uit die tradisies van die Joroeba-volk (van hedendaagse Nigerië en Benin).”—RED.

Endometriose Baie, baie dankie vir die artikel “My stryd teen endometriose” (22 Julie 2000). My siekte is ook as endometriose gediagnoseer, en ek het ’n baie moeilike tyd gehad. Party van my Christenbroers het nooit verstaan waarom ek altyd so siek was nie. Maar nadat hulle die artikel gelees het, het hulle nou ’n ander beskouing.

G. S., Jamaika

Om die verhaal van Deborah Andreopoulos te lees, was soos om my eie lewensverhaal te lees! Ek ly al baie jare, en hierdie artikel was ’n antwoord op my gebede. Dit het my die nodige aanmoediging gegee.

J.C.F., Ierland

Twee en ’n half maande gelede is daar vasgestel dat ek endometriose het. Wat ek die meeste waardeer, is die wete dat ek nie alleen is nie en dat baie vroue dieselfde deurmaak.

A. W., Guatemala

Dankie dat julle aandag gegee het aan die uitwerking wat hierdie siekte nie net op die pasiënt het nie, maar ook op vriende en familie. Toe ek julle artikel sien, het dit my laat voel dat Jehovah werklik omgee en verstaan wat ons deurmaak.

N. A., Kanada

Oor ’n paar dae sal ek geopereer word, en die ondervinding van Deborah Andreopoulos het my aangemoedig. Ek dink dat ek my probleem nou met ’n beter gesindheid sal kan verduur.

M. B., Italië

Antarktika Ek het die artikel “Antarktika—die laaste wildernis” (22 Julie 2000) oor en oor gelees. Ons medewerker in Australië en die ontwerpkunstenaar het hulle uitstekend van hulle taak gekwyt! Dit het baie herinneringe teruggebring. Gedurende die Internasionale Geofisiese Jaar sowat 45 jaar gelede, is ’n groep Amerikaanse wetenskaplikes aangestel om Antarktika te bestudeer. Hulle werk is in drie groot bundels geboekstaaf. As ’n vryskut- grafiese kunstenaar is ek in diens geneem om die uitleg te doen. Vandag is ek een van Jehovah se Getuies, en ek is in my 16de jaar as ’n voltydse evangeliedienaar van die goeie nuus. Ek word nog steeds deur Antarktika omring, aangesien ek baie foto’s en kaarte van Antarktika in my ateljee het. Baie dankie vir die artikel!

C. M., Verenigde State