Terrorisme—Die einde is naby!
’N BUS in Jerusalem, ’n federale gebou in Oklahoma City of ’n woonstelblok in Moskou kan almal teikens van terrorisme wees. Hoewel terroriste blykbaar ’n kragtige boodskap aan politici, militêre leiers of ekonomiese leiers wil oordra, lyk dit dikwels of daar geen verband is tussen die saak waarvoor hulle hulle beywer en hulle teiken nie. In baie gevalle is die werklike teikens gewone mense—mense wat niks te doen het met die saak wat terroriste sê hulle bevorder nie. Waarom wend ekstremiste hulle dan tot terreurdade?
Waarom terrorisme?
Terrorisme is sistematies, voorbedag en bereken. Die aantal sterfgevalle en beseerdes is nie die hoofdoel nie. So ’n bloedbad is ’n middel tot ’n doel, ’n deel van die atmosfeer van skok en vrees wat die terroris wil skep om gesag te ondermyn en sy spesifieke saak onder mense se aandag te bring. Let op van die faktore wat terroriste beweeg om gewelddade te pleeg.
Haat. “Terrorisme . . . word aangestook deur haat”, het Louis J. Freeh, die direkteur van die Amerikaanse federale speurdiens, gesê. “Diegene wat sulke haat koester, lewe in ’n wêreld wat deur dweepsug gekleur, deur sameswering oorskadu en deur onkunde gevorm word.”
Onderdrukking. “Daar is weliswaar leiers van groepe en lande wie se irrasionele doelwitte die uitwissing van ander kulture is”, skryf Stephen Bowman in sy boek When the Eagle Screams. “Maar dit is ook duidelik dat baie terrorisme deur wanhoop veroorsaak word.”
Frustrasie. “In baie gevalle . . . is ’n terroris se belangrikste beweegrede sy opregte frustrasie met die skynbaar onveranderlike politieke, maatskaplike en ekonomiese magte”, sê die redakteur van die boek Urban Terrorism.
Ongeregtigheid. “Terrorisme is ’n simptoom van ’n probleem, nie die eintlike oorsaak nie”, sê Michael Shimoff in sy verhandeling “Die beleid van terrorisme”. Hy sê verder: “Ons langtermyndoelwit moet wees om die onderliggende maatskaplike en politieke oorsake van terrorisme uit die weg te ruim. . . . Terwyl ons teen terrorisme stry, moet ons ons net so ywerig inspan om vryheid, waardigheid, geregtigheid en humanitêre waardes te bevorder. Alleenlik wanneer daardie ywerige pogings suksesvol is, sal ons ons stryd teen terrorisme kan beëindig.”
Die oorsake en geskiedenis van terrorisme het bewys hoe waar die Bybel se woorde is: “Die een mens heers oor die ander tot sy ongeluk” (Prediker 8:9). Die Bybel het selfs die eienskappe voorspel wat terrorisme bevorder het. Dit sê: “In die laaste dae [sal daar] kritieke tye . . . wees wat moeilik is om deur te kom. Want mense sal liefhebbers van hulleself wees, . . . sonder natuurlike geneentheid, nie bereid tot enige ooreenkoms nie, kwaadsprekers, sonder selfbeheersing, wreedaardig, sonder liefde vir goedheid, verraaiers, eiesinnig, opgeblase van trots.”—2 Timoteus 3:1-4.
Die werklikheid is dat mensepogings om terrorisme te beëindig, ongeag hoe opreg dit bedoel is, nie ’n oplossing vir die oorsake daarvan kan vind nie. Die Bybel is realisties wanneer dit sê: ‘Aan die mens behoort sy weg nie toe nie; nie aan ’n man om te loop en sy voetstappe te rig nie’ (Jeremia 10:23). Hoewel die probleem van terrorisme bo die mens se vermoë is om op te los, is dit beslis nie bo God se vermoë nie.
Die oplossing
Diegene wat benadeel of onderdruk is en wat gefrustreerd voel, kan bemoediging vind in die Bybel se betroubare belofte: “Die opregtes sal die land bewoon, en die regskapenes daarin oorbly, maar die goddelose sal uit die land uitgeroei, en die ontroues sal daaruit weggeruk word.”—Spreuke 2:21, 22.
Hierdie belofte van God sal binnekort vervul word. Sy Heerser, die heersende Koning Jesus Christus, sal daarvoor sorg. ’n Bybelprofesie sê van Christus: “Hy sal nie regspreek na wat sy oë sien nie, en nie oordeel na wat sy ore hoor nie; maar aan die armes sal Hy in geregtigheid reg doen en die sagmoediges van die land met billikheid oordeel.”—Jesaja 11:3, 4.
Ja, God se Seun, Jesus Christus, sal binnekort ’n einde maak aan alle ongeregtigheid sowel as diegene wat daarvoor verantwoordelik is. In God se regverdige nuwe stelsel sal terrorisme en alle geweld tot die verlede behoort. Dan sal almal op aarde in veiligheid woon, sonder om te vrees dat hulle enige kwaad aangedoen sal word.—Openbaring 21:3, 4.
[Prent op bladsy 12]
Die Bybel belowe dat God binnekort ’n einde sal maak aan alle onderdrukking en ongeregtigheid