Die Bybel se beskouing

Is alle godsdienste verskillende paaie wat na God lei?

“EK VIND dit feitlik ongelooflik dat die God van die ganse heelal gekies het om deur een godsdiens geken te word”, het die skrywer Marcus Borg gesê. Die Nobelpryswenner vir vrede, Desmond Tutu, het gesê: “Geen godsdiens kan beweer dat dit die volle waarheid oor die verborgenheid” van geloof het nie. ’n Gewilde Hindoebeskouing is: “Jotto moth, totto poth”, wat wanneer dit vry vertaal word, beteken dat alle godsdienste maar net verskillende paaie is wat na dieselfde doelwit lei. Boeddhiste het ook hierdie beskouing. Trouens, miljoene mense glo dat alle godsdienste verskillende paaie is wat na God lei.

Die geskiedskrywer Geoffrey Parrinder het gesê: “Daar word soms gesê dat alle godsdienste dieselfde doelwit het, of gelyke weë na die waarheid is, of selfs dat almal dieselfde leerstellings verkondig.” Die leringe, rituele en godhede van godsdienste is inderdaad eenders. Die meeste godsdienste praat oor liefde en leer dat moord, diefstal en leuens verkeerd is. In die meeste godsdiensgroepe probeer party opreg om ander mense te help. Maak dit dan saak aan watter godsdiens iemand behoort as sy opvattings opreg is en hy ’n goeie lewe probeer lei? Of is alle godsdienste maar net verskillende paaie wat na God lei?

Is opregtheid op sigself genoeg?

Beskou byvoorbeeld die geval van die eerste-eeuse Joodse man met die naam Saulus, wat die Christenapostel Paulus geword het. Hy was ’n ywerige voorstander van Judaïsme, en dit het daartoe gelei dat hy die aanbidding van die volgelinge van Christus probeer uitwis het, omdat hy gevoel het dat hulle aanbidding verkeerd was (Handelinge 8:1-3; 9:1, 2). Maar deur God se barmhartigheid het Saulus besef dat baie godsdienstige mense, net soos hy, dalk ’n ywer vir God het en tog verkeerd kan wees omdat hulle nie al die feite het nie (Romeine 10:2). Toe Saulus meer omtrent God se wil en handelinge geleer het, het hy verander en saam met diegene begin aanbid wat hy eers vervolg het—die volgelinge van Jesus Christus.—1 Timoteus 1:12-16.

Sê die Bybel dat daar honderde gelowe is om van te kies en dat God tevrede sal wees ongeag watter een ons kies? Die apostel Paulus het instruksies van die verrese Jesus Christus ontvang wat heeltemal die teenoorgestelde gesê het. Jesus het hom na mense van die nasies toe gestuur “om hulle oë te open, om hulle van die duisternis na die lig en van die gesag van Satan na God te keer” (Handelinge 26:17, 18). Ons godsdienskeuse maak beslis saak. Baie van die mense na wie toe Paulus gestuur is, het alreeds ’n godsdiens gehad. Maar hulle was in “duisternis”. Trouens, as alle godsdienste eenvoudig verskillende paaie was wat tot die ewige lewe en God se guns gelei het, dan sou dit nie vir Jesus nodig gewees het om sy volgelinge vir die dissipelmaakwerk op te lei wat hy hulle beveel het om te doen nie.—Matteus 28:19, 20.

In sy beroemde Bergpredikasie het Jesus gesê: “Gaan in deur die nou poort; want breed en wyd is die pad wat na die vernietiging lei, en dié wat daardeur ingaan, is baie; maar nou is die poort en smal is die pad wat na die lewe lei, en dié wat dit vind, is min” (Matteus 7:13, 14). Die Bybel sê uitdruklik dat daar “een geloof” is (Efesiërs 4:5). Baie op die ‘breë’ pad het ongetwyfeld ’n godsdiens. Maar hulle het nie die “een geloof” nie. Aangesien daar net een ware vorm van aanbidding is, sal diegene wat daardie ware geloof wil vind, hard daarna moet soek.

Soek die ware God

Van die begin van die mensegeskiedenis af het God vir mense gesê wat hy wil hê hulle moet doen (Genesis 1:28; 2:15-17; 4:3-5). Vandag word sy vereistes duidelik uiteengesit in die Bybel. Dit stel ons in staat om tussen aanvaarbare en onaanvaarbare aanbidding te onderskei (Matteus 15:3-9). Sommige mense het hulle godsdiens geërf, terwyl ander maar net met die stroom saamgaan. Vir baie is godsdiens bloot ’n geval van wanneer en waar hulle gebore is. Maar moet jy jou godsdienskeuse aan die toeval oorlaat of toelaat dat ander hierdie keuse namens jou maak?

Jou godsdienskeuse moet ’n ingeligte besluit wees wat op ’n sorgvuldige ondersoek van die Skrif gebaseer is. In die eerste eeu het sekere geleerde mense nie die apostel Paulus se woorde sommer net aanvaar nie. Hulle het “die Skrif daagliks sorgvuldig ondersoek of hierdie dinge so was” (Handelinge 17:11; 1 Johannes 4:1). Waarom doen jy nie dieselfde nie?

Die God van die heelal word in die Bybel beskryf as iemand wat na mense soek om hom met waarheid te aanbid. Soos in Johannes 4:23, 24 opgeteken staan, het Jesus verduidelik: “Nietemin kom die uur, en dit is nou, wanneer die ware aanbidders die Vader met gees en waarheid sal aanbid, want die Vader soek inderdaad sulke mense om hom te aanbid. God is ’n Gees, en dié wat hom aanbid, moet met gees en waarheid aanbid.” Net “aanbidding wat uit die standpunt van ons God en Vader rein en onbesmet is”, is aanvaarbaar vir hom (Jakobus 1:27). God het die pogings van miljoene mense geseën deur hulle die smal pad te laat vind wat na die lewe lei. Hy sal nie ewige lewe aan die onverskilliges gee nie, maar eerder aan diegene wat hulle inspan om die smal weg te vind wat hy uiteengesit het en wat dit dan volg.—Maleagi 3:18.