Van ons lesers
Beter gesondheid As ’n chiropraktisyn en geregistreerde fisioterapeut is ek al 21 jaar lank by gesondheidsorg betrokke en het ek al duisende pasiënte behandel. Ek is veral besorg oor die feit dat baie wat die voorbladartikels “Beter gesondheid—Watter keuses is daar?” (22 Oktober 2000) lees, dalk sal huiwer om chiropraktiese behandeling te kry uit vrees vir die moontlike gevare wat geïmpliseer is.
A. K., Verenigde State
Julle sê dat chiropraktiese manipulering van die nek ’n pasiënt ’n beroerte kan laat kry. Ek is al meer as 50 jaar lank ’n chiropraktisyn, en ek het nog nooit hierdie reaksie gesien of daarvan gehoor nie.
B.D.B., Verenigde State
Ons het nie bedoel om lesers af te raai om chiropraktiese behandeling te kry as dit is wat hulle verkies nie. “Ontwaak!” het gesê: “Dit is van belang om te weet dat daar min gevalle van newe-effekte weens chiropraktiese manipulering deur gekwalifiseerde praktisyns is.” Terselfdertyd het die “Archives of Internal Medicine”, Deel 158 van 9 November 1998, aangaande sulke manipulering gesê dat “die aantal ernstige komplikasies nog steeds ’n omstrede kwessie is” en dat “skattings verskil van 1 uit 400 000 tot tussen 3 en 6 per 10 miljoen”. Ons moes dit duidelik gestel het dat komplikasies weens chiropraktiese manipulering, wat na bewering beroerte insluit, klaarblyklik baie skaars is.—RED.
Baie dankie vir hierdie reeks. Ek is nie gekant teen konvensionele geneesmiddels nie, maar die reaksies wat ek op antibiotikums het, is lewensgevaarlik. Soms kan die gewone mediese dokters nie my kwale diagnoseer nie, en daarom moet ek alternatiewe geneesmiddels gebruik. Die artikels het my werklik aangemoedig omdat party mense my al selfs gespot het oor my keuses.
S. H., Antigua
Die venster op bladsy 8 het ’n dokter aangehaal wat gesê het dat die kruie ginkgo biloba en moederkruid bloedstolling kan belemmer wanneer dit saam met voorskrifmedisyne gebruik word. Ek gebruik albei kruie saam met medisyne. Ek het gedink dat alle kruie heeltemal veilig is! Hierdie inligting kan my dalk help om toekomstige probleme te voorkom.
G. G., Verenigde State
Omstredenheid oor kalender Julle artikels is goed nagevors en gesaghebbend; foute kom selde voor. Toe ek egter die artikel “Die Vikings—veroweraars en koloniseerders” (8 Desember 2000) lees, het ek ’n tegniese fout opgemerk. Julle het gesê dat die Engelse name van sekere dae van Noorse mitologie afkomstig is. Hoewel die Vikings wel gode soos Tyr, Odin, Thor en Frigga aanbid het, het die Duitsers dit ook onder effens ander name gedoen. Hulle het die aanbidding van hierdie gode na Brittanje gebring toe hulle die land in die vyfde en sesde eeu binnegeval het. Die dae van die week het dus ’n Angel-Saksiese oorsprong.
A. C., Brittanje
Volgens “The World Book Encyclopedia” en ander bronne is die name vir hierdie dae “van die name van Noorse gode afkomstig”. Maar “The Encyclopædia Britannica” sê dat hierdie name “van Angel-Saksiese woorde vir die gode van Germaanse mitologie” gekom het. Sommige geleerdes meen dat hierdie Angel-Saksiese woorde op taalgebied met Ou Noors verband hou. Hoe dit ook al sy, dit is ’n punt waaroor geleerdes nog lank sal debatteer.—RED.
Terneergedruktheid Baie dankie vir die artikel “Jongmense vra . . . Moet ek vir iemand vertel dat ek terneergedruk is?” (22 Oktober 2000). Die artikel het uitgekom op ’n tyd toe ek verskriklik terneergedruk gevoel het en nie geweet het wat om te doen nie. Toe ek die artikel lees, het dit gevoel asof iemand my verstaan. Ek het met my ouers, my beste vriend en veral met Jehovah gepraat. Hy het my baie gehelp. Ek wil nooit my hegte persoonlike verhouding met Jehovah prysgee nie.
A. P., Duitsland