Jongmense vra . . .

Hoe kan ek ophou om my so baie te bekommer?

“Die toekoms kan een van die spanningsvolste dinge vir ’n jongmens wees. Jy is oor jouself bekommerd. Moet ek die huis verlaat? Moet ek gaan studeer? Moet ek die voltydse bediening betree? Moet ek trou? Jy het so baie opsies dat dit jou bang maak.”—Shane, 20 jaar oud.

BEKOMMER jy jou baie? Talle jongmense doen dit wel, en om verskillende redes. ’n Nuusbrief wat uitgegee is om ouers leiding te gee, het gesê: “’n Onlangse wêreldwye opname onder tieners tussen 15 en 18 in 41 lande het getoon dat die grootste bron van kommer onder vandag se tieners is om ’n goeie werk te kry.” Volgende was bekommernis oor hulle ouers se gesondheid. Die vrees om iemand te verloor vir wie hulle lief is, was ook hoog op die lys.

’n Opname van die Amerikaanse Departement van Onderwys het gevind dat “die druk om goed te doen op skool”, ’n groot bron van kommer vir baie jongmense in die Verenigde State is. Dieselfde opname het getoon dat baie jongmense soos Shane voel (wat aan die begin aangehaal is). Nog ’n jong persoon, met die naam Ashley, sê: “Ek is bekommerd oor my toekoms.”

Ander jongmense is weer bekommerd oor hulle fisiese veiligheid. Volgens ’n opname in 1996 het amper 50 persent van die jongmense in die Verenigde State gemeen dat hulle skool gewelddadiger raak. Meer as agtmiljoen tieners (37 persent) het gesê dat hulle iemand ken wat geskiet is!

Nie alle bekommernisse is egter heeltemal so skrikwekkend nie. Vir baie jongmense het hulle grootste bekommernisse met hulle sosiale lewe te doen. ’n Internettydskrif wat tot ouers gerig is, sê: “Tieners bekommer hulle wel of hulle ’n kêrel of meisie sal kry, maar hulle is meer dikwels bekommerd oor die feit dat hulle glad nie vriende het nie.” ’n Tienermeisie met die naam Meagan vra: “Hoe lyk ’n mens cool en tree jy cool op? Ek het vriende nodig.” ’n Vyftien-jarige jong Christen met die naam Natanael sê ook: “Die kinders by die skool is bekommerd oor styl. Hulle is bekommerd oor hoe hulle loop, praat en vir ander lyk. Hulle is bang om snaaks te lyk.”

Probleme—’n deel van die lewe

Dit sou lekker wees as ons kommervrye lewens kon lei. Maar die Bybel sê: “Die mens uit ’n vrou gebore, is kort van dae en sat van onrus” (Job 14:1). Probleme—en die bekommernisse wat daarmee saamgaan—is derhalwe ’n deel van die lewe. Maar as jy toelaat dat bekommernisse en sorge jou denke oorheers, kan jy jou baie skade berokken. Die Bybel waarsku: “Bekommernis in die hart van ’n mens druk dit neer.”—Spreuke 12:25.

Een manier om onnodige bekommernisse te vermy, is om jou eie gedrag te beheer. Die 16-jarige Ana sê: “Baie van my klasmaats is bekommerd dat hulle swanger gaan raak of ’n seksueel oordraagbare siekte gaan kry.” Maar jy kan sulke bekommernisse vermy deur by die Bybel se sedelike standaarde te bly (Galasiërs 6:7). Selfs dan is al jou probleme moontlik nie so eenvoudig of maklik om op te los nie. Hoe kan jy ophou om jou so baie te bekommer?

‘Bekommer jou op ’n verstandige manier’

Baie mense laat toe dat bekommernisse hulle onderkry. Maar ’n artikel wat in ’n tydskrif vir tieners verskyn het, het voorgestel dat ’n mens jou “op ’n verstandige manier kan bekommer” deur bekommernisse in konstruktiewe optrede te verander! Die Bybel het baie beginsels om jou te help om dit te doen. Dink aan Spreuke 21:5: “Die planne van die vlytige is net tot voordeel.” Gestel byvoorbeeld dat jy ’n paar vriende in die gemeente vir ’n geselligheid wil oornooi. Goeie beplanning kan jou baie bekommernisse spaar. Vra jou af: ‘Wie presies gaan ek nooi? Hoe laat wil ek hê, moet hulle kom? Hoe laat wil ek hê moet hulle huis toe gaan? Hoeveel verversings het ek werklik nodig? Watter prettige bedrywighede sal almal geniet?’ Hoe deegliker jy sake deurdink, hoe waarskynliker is dit dat jou geselligheid glad sal verloop.

Maar jy kan bekommernisse veroorsaak deur toe te laat dat dinge te ingewikkeld raak. Jesus Christus het hierdie raad gegee vir ’n vrou wat meer moeite gedoen het as wat nodig was om na haar gas om te sien: “’n Paar dinge is egter nodig, of net een” (Lukas 10:42). Vra jou dus af: ‘Wat is werklik nodig om hierdie geselligheid suksesvol te maak?’ As jy dinge eenvoudig hou, kan dit jou help om jou nie te veel te bekommer nie.

Nog ’n bron van kommer is dalk jou veiligheid by die skool. Daar is miskien baie min wat jy kan doen om die situasie daar te verander. Maar jy kan praktiese stappe doen om jouself te beskerm. “’n Skrander mens sien die onheil en verberg hom”, sê Spreuke 22:3. As jy gevaarlike plekke eenvoudig vermy—nie net die afgesonderde plekke nie, maar ook plekke waar daar nie toesig is nie en waar moeilikheidmakers gewoonlik bymekaarkom—is jou kanse om in die moeilikheid te beland minder.

Skoolwerk kan nog ’n bron van kommer wees. Miskien het jy ’n klomp belangrike huiswerk en is jy bekommerd dat jy dit nie alles betyds gaan klaarkry nie. Die beginsel in Filippense 1:10 kan help: ‘Maak seker van wat die belangriker dinge is.’ Ja, leer om prioriteite te stel! Besluit watter huiswerk die dringendste is, en doen dit eerste. Doen dan die ander. Geleidelik sal jy begin voel dat jy in beheer van die situasie is.

Vra raad

Toe Aaron jonk was, was hy so bekommerd dat hy nie sy matriekeksamen gaan slaag nie dat hy pyne in sy bors gekry het. Hy sê: “Ek het met my ouers gepraat, en hulle het my dokter toe geneem. Hy het onmiddellik gesien dat daar niks met my hart verkeerd is nie en het verduidelik dat bekommernisse die liggaam kan aantas. Later het my ouers my help besef dat ek alles moontlik gedoen het om vir die toetse voor te berei en dat ek nou meer daaroor besorg moet wees om na myself te kyk. Ek het my nie meer so bekommer nie, die pyne in my bors het weggegaan en ek het goed gedoen in my eksamen.”

As bekommernisse jou onderkry, moet jy nie daaroor stilbly nie. Spreuke 12:25, wat vroeër gedeeltelik aangehaal is, sê in sy geheel: “Bekommernis in die hart van ’n mens druk dit neer, maar ’n vriendelike woord vrolik dit op.” Slegs as jy oor jou “bekommernis” praat, kan jy ’n “vriendelike woord” van bemoediging kry!

Praat eerstens met jou ouers oor sake; hulle sal heel moontlik ’n paar wenke hê. Die geestelik volwasse mense in julle plaaslike Christengemeente is nog ’n bron van ondersteuning. Die 15-jarige Janelle vertel: “Ek was bekommerd omdat ek hoërskool toe moes gaan en was bang vir alles—dwelms, seks, geweld—totdat ek met ’n gemeentelike ouer man gepraat het. Hy het vir my talle praktiese wenke gegee. Ek het onmiddellik beter gevoel omdat ek toe besef het dat ek die situasie die hoof kon bied.”

Moenie dinge uitstel nie

Soms is daar iets wat ons moet doen, maar ons stel dit uit omdat dit vir ons onaangenaam is. Die 19-jarige Shevone het byvoorbeeld ’n persoonlike verskil met ’n medeChristen gehad. Sy het geweet dat sy dinge moes uitpraat, maar sy het dit uitgestel. “Hoe meer ek dit uitgestel het, hoe meer het dit my gepla”, erken sy. Toe het Shevone Jesus se woorde in Matteus 5:23, 24 onthou, wat Christene aanspoor om sulke probleme onmiddellik op te los. “Toe ek dit uiteindelik gedoen het”, onthou Shevone, “het ek verligting gekry.”

Stel jy jets uit—’n onaangename toewysing of ’n ongemaklike konfrontasie? Wel, doen so gou as moontlik iets daaromtrent, en jy sal een ding minder hê om jou oor te bekommer.

Ernstige situasies

Nie alle situasies word so maklik opgelos nie. Beskou byvoorbeeld die geval van ’n jong man met die naam Abdur. Sy ma het kanker, en hy moet haar sowel as sy jonger broer onderhou. Abdur is natuurlik oor sy ma se toestand bekommerd. Maar hy sê: “Ek neem Jesus se woorde ter harte: ‘Wie van julle kan deur besorg te wees een el by sy lewensduur voeg?’ Ek raak nie afgemat nie, maar probeer die situasie deurdink en besluit wat die beste resultate gaan hê.”—Matteus 6:27.

Dit is nie maklik om kalm te bly in ’n krisis nie. Party raak so ontsteld dat hulle hulleself verwaarloos en weier om te eet. Maar die hoek Helping Your Teenager Deal With Stress waarsku dat ’n mens “nog minder in staat is om die vernietigende gevolge van stres die hoof te bied en nog vatbaarder vir groot gesondheidsprobleme is” wanneer jy jou basiese voeding ontsê. Sorg dus fisies vir jouself. Kry genoeg rus en voeding.

Jy kan die grootste verligting vind deur die Bybel se raad te volg: “Werp jou sorg op die HERE, en Hý sal jou onderhou; Hy sal nooit die regverdige laat wankel nie” (Psalm 55:23). Shane, wat aan die begin aangehaal is, was baie bekommerd oor sy toekoms. “Ek het my meer op God se Woord en sy voorneme begin toespits”, sê hy. Hy het gou besef dat sy toekoms gelukkig sal wees as hy sy lewe gebruik om God te dien (Openbaring 4:11). “Ek het opgehou om oor myself bekommerd te wees”, sê Shane. “Ek het iets belangrikers gehad om oor te dink.”

As jy dus vind dat jy jou te veel bekommer, moet jy konstruktiewe maniere soek om werk te maak van jou probleem. Kry raad van ’n volwassene. En neem bowenal jou sorge na Jehovah, ‘want hy is besorg oor jou’ (1 Petrus 5:7). Met sy hulp sal jy dalk ophou om jou so baie te bekommer.

[Prent op bladsy 13]

Praat met jou ouers oor jou bekommernisse

[Prent op bladsy 14]

Hoe gouer jy probleme aanpak, hoe gouer kan jy ophou om jou te bekommer