Die polisie—Wat hou die toekoms vir hulle in?
SONDER die polisie sou daar waarskynlik anargie wees. Maar is ons wêreld veilig, selfs al is daar polisie? Vandag is daar in die meeste stede, soos op baie plattelandse gebiede, ’n gevoel dat die sekuriteitsituasie ’n krisispunt bereik het. Kan ons op die polisie vertrou om ons teen georganiseerde misdaad en gewoontemisdadigers te beskerm? Kan ons van die polisie verwag om ons strate veilig te maak? Sal hulle die stryd teen misdaad wen?
David Bayley spreek in sy boek Police for the Future die volgende mening uit: “Die polisie voorkom nie misdaad nie”, sê hy. “Die polisie is eintlik net ’n pleister op kanker. . . . Ons kan nie op die polisie staatmaak om die gemeenskap van misdaad te bevry nie, selfs wanneer hulle hulle daartoe verbind het om misdaad te voorkom.” Studies het getoon dat die drie vernaamste pligte van die polisie—om die strate te patrolleer, op noodoproepe te reageer en misdade te ondersoek—nie misdaad voorkom nie. Waarom is dit so?
Dit sou buitensporig duur wees om misdaad te probeer voorkom deur ’n groot, sigbare polisieteenwoordigheid. Dit lyk nie of misdadigers die ekstra patrollies wat wel bekostig kan word, opmerk of hulle daaraan steur nie. Die vinnige optrede van die polisie skrik misdadigers ook nie juis af nie. Die polisie het berig dat, tensy hulle binne ’n minuut by die misdaadtoneel opdaag, hulle waarskynlik nie die oortreder sal vang nie. Misdadigers weet blykbaar dat die polisie selde so vinnig optree. En misdaadondersoeke help ook nie. Selfs al word misdadigers gevonnis en opgesluit, voorkom dit blykbaar nie misdaad nie. Die Verenigde State stuur meer misdadigers as enige ander land tronk toe, maar dit het nog steeds ’n baie hoë misdaadsyfer; terwyl Japan wat min mense in die tronk het, een van die laagste misdaadsyfers het. Selfs pogings soos die buurtwagstelsel het nie ’n blywende uitwerking nie, veral nie in gebiede met ’n hoë misdaadsyfer nie. Wanneer die polisie toeslaan op spesifieke misdade, soos dwelmhandel of diefstal, het dit ’n ruk lank merkbare verbeteringe tot gevolg, maar weer eens is dit moeilik om volgehoue resultate te lewer.
“Die feit dat die polisie nie misdaad kan voorkom nie, behoort denkende mense nie juis te verbaas nie”, sê Police for the Future. “Dit is ’n algemeen erkende feit dat misdaadvlakke in die gemeenskap bepaal word deur maatskaplike toestande wat buite die beheer van die polisie sowel as buite die beheer van die strafregstelsel in sy geheel is.”
Wat sou sonder die polisie gebeur?
Hoe tree jy op as daar nie polisiemanne in die omgewing is nie? Oortree jy die wet omdat hulle nie daar is nie? Dit is verbasend hoeveel sogenaamde ordentlike middelklas- en vooraanstaande mense hulle reputasie en hulle toekoms op die spel sal plaas vir die twyfelagtige voordele van witboordjiemisdaad. The New York Times het onlangs berig gelewer oor ‘112 aangeklaagdes in ’n bedrogspul, wat glo betrokke was by ’n plan om motorversekeringsmaatskappye te bedrieg. Onder die aangeklaagdes was regsgeleerdes, dokters, chiropraktisyns, ’n fisioterapeut, ’n akupunkturis en ’n administratiewe klerk in ’n polisiedepartement.’
Nog ’n groot bedrogspul het onlangs die welgestelde ondersteuners van die kunswêreld geskok toe die voormalige hoofadministrateurs van Sotheby’s in New York en Christie’s in Londen aan prysvasstellings skuldig bevind is. Hulle en hulle verkoophuise moet boetes en skadevergoeding van miljarde rande uitbetaal! Die onversadigbare begeerte na geld dring dus tot elke vlak van die samelewing deur.
Die voorval in 1997 in Recife, Brasilië, toe die polisie gestaak het, toon dat baie mense hulle maklik tot misdaad wend wanneer daar geen afskrikmiddel is nie. Enige godsdiensoortuigings wat hulle dalk het, het nie ’n uitwerking op hulle gedrag nie. Hulle kan maklik sedelike norme en beginsels afgewater of verwerp. Dit is geen wonder nie dat die polisie in die meeste lande ’n hopelose stryd voer in ’n wêreld wat geneig is tot wetteloosheid, hetsy dit gering of ernstig is.
Aan die ander kant gehoorsaam sommige mense wette omdat hulle gesag respekteer. Die apostel Paulus het vir Christene in Rome gesê dat hulle onderdanig moet wees aan die owerhede wat deur God toegelaat word om te bestaan, aangesien hulle ten minste ’n mate van orde in die samelewing handhaaf. Hy het oor hierdie gesag geskryf: “Hy is God se dienaar, ’n wreker om gramskap te bring oor die een wat beoefen wat sleg is. Daar is dus dwingende rede vir julle om onderdanig te wees, nie net weens die gramskap nie, maar ook weens julle gewete.”—Romeine 13:4, 5.
Veranderende maatskaplike toestande
Die werk van die polisie verbeter beslis maatskaplike toestande. Wanneer mense duidelik kan sien dat die strate vry van dwelms en geweld is, is hulle geneig om in ooreenstemming met die verbeterde beeld van die gemeenskap te lewe. Maar geen polisiemag het die vermoë om die samelewing te hervorm nie.
Kan jy jou ’n samelewing voorstel waar mense soveel respek vir die wet het dat hulle nie polisie nodig het nie? Kan jy jou ’n wêreld indink waar mense so besorg oor mekaar is dat bure altyd gewillig is om te help en waar niemand die polisie se hulp hoef in te roep nie? Miskien klink dit te goed om waar te wees. Maar hierdie woorde van Jesus, hoewel hy dit in ’n ander konteks gebruik het, is beslis hier van toepassing. Hy het gesê: “By mense is dit onmoontlik, maar by God is alles moontlik.”—Matteus 19:26.
Die Bybel beskryf ’n tyd in die toekoms wanneer die hele mensdom onderdane sal wees van ’n regering wat deur Jehovah God opgerig is. “Die God van die hemel [sal] ’n koninkryk oprig . . . Dit sal al hierdie koninkryke verbrysel en daar ’n einde aan maak” (Daniël 2:44). Deur alle opregte mense in God se weg van liefde te onderrig, sal hierdie nuwe regering die maatskaplike toestande verander wat misdaad voortbring. “Die aarde sal beslis vol wees van die kennis van Jehovah soos die waters die see bedek” (Jesaja 11:9). Jehovah se Koning, Jesus Christus, sal in staat wees om alle misdaad te voorkom. “Hy sal nie regspreek na wat sy oë sien nie, en nie oordeel na wat sy ore hoor nie; maar aan die armes sal Hy in geregtigheid reg doen en die sagmoediges van die land met billikheid oordeel.”—Jesaja 11:3, 4, Die Bybel, 1953.
Daar sal geen misdadigers of misdaad wees nie. Daar sal geen behoefte aan polisie wees nie. Elkeen sal “onder sy wingerdstok en onder sy vyeboom sit, en daar sal niemand wees wat hulle laat bewe nie” (Miga 4:4). As jy graag deel wil uitmaak van die “nuwe aarde” wat in die Bybel beskryf word, is dit nou die tyd om die beloftes wat God in sy Woord maak, te ondersoek.—2 Petrus 3:13.
[Lokteks op bladsy 12]
Kan jy jou ’n samelewing voorstel waar mense soveel respek vir die wet het dat hulle nie polisie nodig het nie?
[Lokteks op bladsy 12]
Daar sal geen misdadigers of misdaad wees nie
[Venster/Prent op bladsy 11]
Polisie versus terroriste
Soos die gebeure van 11 September 2001 in die stad New York en Washington, DC, getoon het, skep misdadigers wat vliegtuie skaak, gyselaars aanhou en terreurdade pleeg, van die grootste uitdagings vir die polisie in hulle pogings om die publiek te beskerm. Spesiale eenhede in baie wêrelddele is opgelei om vliegtuie te bestorm. Hulle het ook geleer hoe om misdadigers in geboue te oorval deur van dakke af te sak, deur vensters te spring en skokgranate en traangasbomme te gooi. Hierdie opgeleide manne het al dikwels daarin geslaag om terroriste te verras en te oorrompel terwyl gyselaars aan so min as moontlik gevaar blootgestel word.
[Erkenning]
James R. Tourtellotte/U.S. Customs Service
[Prent op bladsy 12]
Dinge wat nie meer in God se nuwe wêreld nodig sal wees nie