Jongmense vra . . .

Moet ek kosmetiese chirurgie ondergaan?

“Voor my neusoperasie is ek baie geterg. Ek wou nie ’n neus hê wat spesiaal is nie, net een wat by my pas. Ek is baie tevrede met die resultaat, en ek sal dit weer doen as dit nodig is.” —Eleni.a

“Waarom moet ek my aan vaste idees van aantreklikheid onderwerp? Met chirurgies gewysigde liggaamsdele sal ek soos vervalste geld voel. Nie eg nie.” —Mathias.

“Elkeen moet self besluit. Dit is baie moeilik vir iemand anders om te oordeel.” —Manuela.

“ENIGIEMAND wat mooier as ek is, dra beslis grimering.” In Duitsland is hierdie grappige gesegde al lank ’n verdediging vir mense wat bekommerd is dat daar iets met hulle uiterlike skort. Maar in party lande kan die gesegde deesdae verander word na: “Enigiemand wat mooier as ek is, was beslis al onder die mes.” Kosmetiese chirurgie word inderdaad iets alledaags.

“Die dae is verby toe kosmetiese chirurgie net vir die rykes was”, berig die Switserse koerant Neue Zürcher Zeitung, en dit sê verder: “Twee neigings het ontstaan: Al hoe meer mans gaan na plastiese chirurge . . . , en vroulike kliënte is jonger as ooit tevore.” ’n Opname in Duitsland toon dat byna 20 persent van die mense tussen die ouderdomme van 14 en 29 met wie ’n onderhoud gevoer is, reeds kosmetiese chirurgie ondergaan het, beplan om dit te ondergaan of dit ten minste oorweeg het.b Miskien het party van jou vriende, vriendinne, skoolmaats of familielede al ’n chirurg iets aan hulle uiterlike laat doen.

Wat van jou? Het jy al ooit daaraan gedink om jou voorkoms deur ’n operasie te verbeter? Voel jy dat jou ore uitstaan, dat jou borste te groot of te klein is, dat jou maag groot is, dat jou bobene dik is of dat jou neus lelik is? Indien wel, is jy nie die enigste een wat sulke gevoelens het nie. ’n Groep hoërskoolmeisies het ’n artikel in ’n Duitse koerant geskryf en gesê: “Daar is feitlik nie ’n meisie van ons ouderdom wat nie al met haar liggaam ontevrede was nie.” Die begeerte om aantreklik en gewild te wees, is normaal. Maar is chirurgie die antwoord?

’n Oplossing vir jou probleme?

Dink aan die jongmense wat jy ken. Sal jy verbaas wees om uit te vind dat baie van hulle—miskien selfs party wat vir jou goed lyk—ontevrede is met hoe hulle lyk? Maar dit is heel waarskynlik die geval. Die vraag is: Dink jy dat hulle almal regstellende chirurgie moet ondergaan? Of dink jy dit sal vir die meeste beter wees as hulle leer om gelukkiger te wees met die positiewe aspekte van hulle voorkoms? Geld dieselfde beginsel moontlik in jou geval?

Soos Eleni se opmerking toon, kan kosmetiese chirurgie soms ’n einde aan spot en teistering maak. Aan die ander kant is kosmetiese chirurgie nie ’n wondermiddel nie. Dit is beslis nie ’n plaasvervanger vir ’n gesonde lewenswyse nie, wat baie vir ’n mens se voorkoms doen. En al kan ’n chirurg dalk jou uiterlike verander, kan hy nie jou persoonlikheid verander nie, en hy kan ook nie jou kwellinge wegneem of jou meer selfrespek gee nie.

Hou ook in gedagte dat party klinieke of dokters beloftes maak wat hulle nie kan nakom nie. Dit lyk dalk asof hulle jou geluk belowe. Maar in werklikheid stel hulle dikwels meer belang in jou geld as in jou geluk. Ongelukkig is daar ’n paar gewetenlose chirurge wat ’n operasie sal doen wat onnodig is, min kans het om te slaag of gevaarlik is—solank iemand die rekening betaal.

Daar is ook langtermyngevolge waaraan ’n mens moet dink. Iets wat byvoorbeeld vir jou vreeslik lyk wanneer jy 16 is, kan baie anders lyk wanneer jy 21 is. Die plastiese chirurg dr. Urs Bösch sê: “Kosmetiese chirurgie moet oor die algemeen nie op tieners uitgevoer word nie. ’n Tiener se liggaamsvorm en sy bewustheid van sy liggaam verander op dié leeftyd.” Boonop is die moontlikheid groter dat jongmense opvolgoperasies nodig sal hê. En namate jou liggaam groei, groei die littekens van ’n operasie dalk ook.

Bereken die koste

Die Bybel raai ons aan om die koste te bereken voordat ons ’n belangrike projek aanpak (Lukas 14:28). Vir die meeste jongmense is kosmetiese chirurgie buite die kwessie omdat dit te duur is. En daardie koste sluit moontlik nie die opvolgondersoeke in—of die verbeterings wat dalk nog nodig sal wees nie.

’n Aantal mense het nie net met geld vir chirurgie betaal nie, maar ook met hulle gesondheid. Volgens die Amerikaanse Vereniging vir Estetiese Plastiese Chirurgie sluit gesondheidsgevare tydelike swelling, blywende littekens, gevoelloosheid, onvermoë om te borsvoed en selfs hewige bloedverlies in. Anna het byvoorbeeld byna gesterf gedurende vetafsuiging. Sy kla: “Ek het nou aaklige littekens en ’n duik in my maag.” ’n Duitse koerant sê oor vetafsuigingsoperasies: “Verslae van ernstige komplikasies, selfs sterftes, hoop op.” Moenie vergeet nie: “Chirurgie bly chirurgie, met al sy gevare”, soos die gesondheidsnuusbrief Apotheken Umschau dit stel. Oorweeg dus die gevare deeglik voordat jy op enige operasie besluit—veral een wat uit ’n mediese oogpunt nie noodsaaklik is nie.

Jy kan jou ook afvra: ‘Watter indruk sal ek gee? Dat fisiese voorkoms vir my die allerbelangrikste is? Hoe sal my keuse my maats of jonger broers of susters beïnvloed?’c

Jou beweegredes

Dit is ook die moeite werd om ernstig oor jou beweegredes na te dink. En dit is dalk nie maklik om hulle te verstaan nie. Jy kan jou byvoorbeeld afvra: ‘Wil ek ’n einde maak aan aanhoudende tergery oor ’n hinderlike gelaatstrek of liggaamsdeel? Of is verwaandheid hierby betrokke? Word my begeerte om my uiterlike te verander, beïnvloed deur portuurdwang, slim advertensies of die een of ander vermaaklikheidster? Probeer ek die uiterste skoonheidsideaal bereik wat deurentyd in vandag se media bevorder word?’

Party dink dat ’n aantrekliker voorkoms dalk hulle kanse sal verbeter om ’n huweliksmaat of ’n goeie werk te kry. Maar is elke getroude persoon wat jy ken fisies aantreklik? Wat van elkeen wat ’n werk het? Nee, sulke dinge hang nie net van ’n mens se voorkoms af nie. Die vraag is ook: Is ’n moontlike huweliksmaat of ’n werkgewer vir wie jou voorkoms belangriker as jou innerlike eienskappe is, werklik die koste en gevaar van chirurgie werd?

Terwyl jy jou beweegredes sorgvuldig ondersoek, kan jy gerus jou gevoelens met jou ouers of ’n volwasse vriend bespreek. As jy dink dat een liggaamsdeel werklik ’n probleem is, moet jy hulle eerlike mening vra. Moenie bloot die spieël vertrou nie. Nana sê aangaande die manier waarop ons ons eie liggaamlike tekortkominge sien: “Jy neem dit ernstiger op as ander mense omdat jy jou eenvoudig uit ’n ander oogpunt beskou.” Navorsers by die Universiteit van Landau, in Duitsland, het verduidelik dat kosmetiese chirurgie in baie gevalle oorweeg word, “nie omdat ’n liggaamsdeel werklik misvormd is nie, maar eerder omdat dit vir die betrokke persoon lyk of dit misvormd is”.

Moenie op die ingewing van die oomblik besluit nie, maar oorweeg alle faktore deeglik. Beskou enige chirurgie as onomkeerbaar. Hoe dit ook al sy, jy sal waarskynlik ’n geruime tyd met die resultate vir lief moet neem.

Jou belangrikste skoonheid

Geluk hang nie van jou voorkoms af nie. Hoewel jou voorkoms jou selfrespek kan laat toeneem of afneem, is dit jou persoonlikheid en gesindheid wat werklik van belang is. Ná Anna se lewensgevaarlike ondervinding het sy tot hierdie gevolgtrekking gekom: “Ek het uitgevind dat skoonheid niks met jou uiterlike voorkoms te doen het nie.”

Hoewel die Bybel fisiese skoonheid gunstig vermeld, toon dit dat geestelike skoonheid belangriker is: “Bekoorlikheid kan vals wees, en skoonheid kan nietig wees; maar die vrou wat Jehovah vrees, sy verwerf lof vir haarself” (Spreuke 31:30; 1 Samuel 16:7). As jy hierdie beskouing het, kan dit jou help om gemoedsrus te hê, al is daar ’n liggaamsdeel waarvan jy nie hou nie.

Wat jy ook al besluit, onthou dat ’n volmaakte voorkoms en volmaakte geluk op die oomblik eenvoudig buite ons bereik is. Almal is in die een of ander opsig onvolmaak (Romeine 3:23). Jy kan dit nie verander nie. Wat jy wel kan verander, is die persoon wat jy innerlik is—wat die Bybel “die geheime persoon van die hart” noem (1 Petrus 3:3, 4). Verbeter wie jy is deur eienskappe aan te kweek wat mooi is in God se oë. Daar is geen gevaar of finansiële koste daaraan verbonde nie, en die belonings is oneindig!

[Voetnote]

[Lokteks op bladsy 19]

Is die gelaatstrek of liggaamsdeel wat vir jou ’n “probleem” is, werklik ’n probleem, of moet jy jou beskouing van jouself verander?