Die Bybel se beskouing

Ons swakhede—Sal God dit oorsien?

‘Ek is nie goddeloos nie! Ek het baie hard probeer om my slegte gedrag te laat vaar, maar ek is eenvoudig te swak!’

IS DIT hoe jy of iemand wat jy ken, voel? Baie maak die gevolgtrekking dat dit feitlik onmoontlik is om ingewortelde swakhede te oorkom. Party mense is verslaaf aan alkohol, tabak of dwelms. Hebsug oorheers baie ander se lewe. En daar is diegene wat voor geslagsonsedelikheid geswig het en beweer dat hulle hopeloos verslaaf is aan seks.

Soos gesien kan word in Matteus 26:41 het Jesus begrip getoon vir menslike swakhede.a Trouens, die hele Bybelverslag toon duidelik dat Jehovah God sowel as Jesus werklik barmhartig teenoor mense is (Psalm 103:8, 9). Maar kan ons van God verwag om al ons tekortkominge oor te sien?

Moses en Dawid

Beskou byvoorbeeld die geval van Moses. Hy het bekend gestaan as “verreweg die sagmoedigste van al die mense wat op die oppervlak van die aarde was”, en hy het altyd daardie goeie eienskap probeer openbaar (Numeri 12:3). Terwyl die Israeliete deur die wildernis getrek het, het hulle dikwels onredelik opgetree en minagting getoon vir God en sy verteenwoordigers. Deur dit alles heen het Moses nederig op God vir leiding staatgemaak.—Numeri 16:12-14, 28-30.

Maar net voor die einde van die lang, vermoeiende reis het hy voor die hele volk sy humeur verloor en God se instruksies verontagsaam. God het hom vergewe, maar het Hy daardie voorval oorgesien? Nee. Hy het vir Moses gesê: ‘Omdat jy nie geloof in my getoon het nie, daarom sal jy hierdie gemeente nie in die land inbring wat ek beslis aan hulle sal gee nie.’ Moses sou nie in die Beloofde Land ingaan nie. Nadat hy 40 jaar lank hard gewerk het vir daardie wonderlike voorreg, het hy dit weens ’n ernstige menslike swakheid verbeur.—Numeri 20:7-12.

Koning Dawid was nog ’n godvrugtige man met ’n swakheid. By een geleentheid het hy voor hartstog geswig en geslagsomgang met ’n ander man se vrou gehad. Hy het toe sy sonde probeer wegsteek deur haar man te laat doodmaak (2 Samuel 11:2-27). Later het hy opregte berou oor sy misdade getoon, en God het hom vergewe. Maar Dawid het ’n gesin vernietig, en Jehovah het hom nie beskerm teen die verwoestende rampspoed wat gevolg het nie. Dawid se babaseuntjie het baie siek geword, en Jehovah het ondanks Dawid se gebede ten behoewe van sy kind nie tussenbeide getree nie. Die seun het gesterf, en daarna het die een tragedie na die ander Dawid se huisgesin getref (2 Samuel 12:13-18; 18:33). Dawid het baie duur betaal omdat hy voor sy swakhede geswig het.

Hierdie voorbeelde toon dat God mense aanspreeklik hou vir hulle gedrag. Diegene wat hom wil dien, moet aan swakhede in hulle geestelikheid werk en beter Christene word. Baie het dit in die eerste eeu gedoen.

Die stryd teen sonde

Die apostel Paulus word tereg beskou as ’n voorbeeld van hoe Christene moet lewe. Maar het jy geweet dat hy ’n voortdurende stryd teen sy swakhede gevoer het? In Romeine 7:18-25 word hierdie konflik, of, volgens vers 23, hierdie “stryd”, duidelik beskryf. Paulus het sonder ophou gestry, want hy het geweet dat sonde ’n gedugte vyand is.—1 Korintiërs 9:26, 27.

Party lede van die Christengemeente van antieke Korinte was voorheen verstokte kwaaddoeners. Die Bybel sê dat hulle ‘hoereerders, egbrekers, mans wat by mans lê, diewe, gierigaards en dronkaards’ was. Maar dit sê ook dat hulle “skoon gewas” is (1 Korintiërs 6:9-11). Hoe? Juiste kennis, Christenassosiasie en God se gees het hulle versterk om met hulle goddelose dade op te hou. Uiteindelik het God hulle in Christus se naam regverdig verklaar. Ja, God het hulle vergewe en hulle dus ’n skoon gewete gegee.—Handelinge 2:38; 3:19.

Paulus en die Christene van Korinte het nie hulle sondige neigings verklein nie. Hulle het eerder daarteen gestry, en met God se hulp het hulle dit oorwin. Daardie eerste-eeuse aanbidders het sedelik rein geword ondanks hulle omgewing en onvolmaakte neigings. Wat van ons?

God verwag dat ons teen ons swakhede stry

Wanneer ’n mens teen ’n swakheid stry, beteken dit nie noodwendig dat jy dit met wortel en tak gaan uitroei nie. Hoewel ons nie moet tou opgooi in die stryd teen ons onvolmaakthede nie, kan ons dit nie nou heeltemal oorkom nie. Dit gee aanleiding tot swakhede wat baie hardnekkig kan wees. Ons moet nogtans nie die stryd teen ons swakhede gewonne gee nie (Psalm 119:11). Waarom is dit so belangrik?

Omdat God dit nie aanvaar dat ons onvolmaaktheid altyd as ’n verskoning vir slegte gedrag voorhou nie (Judas 4). Jehovah wil hê dat mense hulle lewe in orde moet bring, dat hulle ’n sedelike lewe moet lei. Die Bybel sê: “Verafsku wat goddeloos is” (Romeine 12:9). Waarom neem God so ’n ferm standpunt in?

Een rede is dat dit skadelik is om voor swakhede te swig. “Wat ’n mens saai, dit sal hy ook maai”, sê die Bybel in Galasiërs 6:7. Diegene wat hulle aan verslawings, hebsug en promiskuïteit oorgee, pluk dikwels die wrange vrugte daarvan. Maar daar is ’n belangriker rede.

Sonde is vir God aanstootlik. Dit veroorsaak ’n “skeiding” tussen ons en Jehovah (Jesaja 59:2). Omdat diegene wat sonde beoefen, nie sy goedkeuring kan wegdra nie, vermaan hy hulle: “Was julle; reinig julle; . . . hou op om kwaad te doen.”—Jesaja 1:16.

Ons Skepper is liefdevol en barmhartig. “Hy [wil nie] hê dat enigeen vernietig moet word nie, maar wil hê dat almal tot berou moet kom” (2 Petrus 3:9). As ons voortdurend voor ons swakhede swig, weerhou dit ons daarvan om God se goedkeuring te ontvang. Aangesien God nie ons swakhede ignoreer nie, moet ons dit ook nie ignoreer nie.

[Voetnoot]