Jy het jou slaap nodig!

Sal enigiemand dit betwis dat ’n goeie nagrus ’n belangrike faktor is as ’n mens goeie gesondheid wil geniet? Waarskynlik nie. Vir baie mense is slaap egter nie so belangrik nie. “Maar die volgende dag betaal jy daarvoor”, sê Shawn Currie, ’n kliniese sielkundige en assistentprofessor aan die Universiteit van Calgary, Kanada. Wanneer jy nie genoeg slaap kry nie, sal jy waarskynlik gouer omgekrap en soms selfs terneergedruk raak.

“Wetenskaplikes meen dat slaap ’n herstellende uitwerking op die brein het en dat die leerproses gedurende slaap voortduur”, sê die koerant Calgary Herald. Professor Currie sê: “Snags versterk jy jou herinneringe, en enigiets wat jy gedurende die dag geleer het, word snags op die regte plek geberg. As ’n mens nie hierdie rustyd het nie, belemmer dit die leerproses.” Verder sê hy dat dit “waarskynlik sal help om jou emosies te stabiliseer as jy genoeg slaap kry”.

Hoeveel slaap is dan genoeg? Hoewel talle deskundiges meen dat agt uur gewoonlik nodig is, sê Currie: “Mense se slaapbehoeftes verskil.” Daarom stel hy voor dat ’n mens probeer om ’n goeie nagrus te geniet. Maar hoe kan dit gedoen word, veral in die geval van mense wat aan slaaploosheid ly? Hier is ’n paar wenke:

◼ Neem ’n warm bad of stort voordat jy gaan slaap.

◼ Doen ’n paar keer per week matige oefening; maar moenie voor slaaptyd strawwe oefening doen nie.

◼ Hou jou slaapkamer stil, donker en koelerig.

◼ Probeer om elke oggend dieselfde tyd op te staan sodat ’n vaste slaappatroon gevorm kan word.

In die lig van die ooglopende gesondheidsvoordele moet jy verstandig wees en seker maak dat jy genoeg slaap kry.