Die waarde van ’n glimlag

HOEWEL dit net ’n oomblik duur, sal jy dit dalk nooit vergeet nie. Dit is van onskatbare waarde, maar niemand is so arm dat hy dit nie met ander kan deel of so ryk dat hy dit nie nodig het nie. Waarvan praat ons? ’n Glimlag.

’n Glimlag word voortgebring deur ’n spiersametrekking wat die oë laat glinster en die mondhoeke effens na bo laat krul as ’n teken van tevredenheid. ’n Baba glimlag gedurende die eerste paar weke ná geboorte, en dit verskaf natuurlik groot genot aan die trotse nuwe ouers. Hierdie vroeë glimlaggies word refleksglimlagte, of onwillekeurige glimlagte, genoem. Deskundiges verduidelik dat hierdie soort glimlag dikwels verskyn terwyl ’n mens droom, en dit hou blykbaar verband met innerlike gevoelens en die werking van die sentrale senuweestelsel. Hierdie refleksglimlag kom selfs by volwassenes voor, byvoorbeeld nadat ons geëet het of terwyl ons na musiek luister.

Maar wanneer ’n baba sowat ses weke oud is, begin hy glimlag wanneer hy ’n gesig sien of ’n stem hoor. ’n ‘Sosiale glimlag’—’n ongeforseerde, doelbewuste glimlag—beur ons op, of ons nou babas of volwassenes is. Daar word gesê dat so ’n glimlag selfs goed is vir ons gesondheid. Volgens die spraakterapeute Mirtha Manno en Rubén Delauro, wat ’n selfhelpkliniek met die naam Glimlag en Gesondheid bestuur, bring ’n glimlag ’n elektriese prikkel voort wat die pituïtêre klier stimuleer. Hierdie klier stel weer endorfiene vry, chemiese stowwe in die brein wat ons goed laat voel.

Nog ’n belangrike rede om te glimlag, is die goeie uitwerking wat dit op ander het. ’n Opregte glimlag dra ons gevoelens oor sonder dat ons ’n woord hoef te sê, of dit nou ’n glimlag is om te groet, medelye te betoon of iemand aan te moedig. Die foto van ’n kind wat glimlag, is soms genoeg om ons te laat glimlag.

As iemand vriendelik vir ons glimlag, kan dit ons help om meer ontspanne te voel en om frustrasie of uitdagings beter die hoof te bied. Die Bybel spoor ons aan: “Moenie die goeie terughou van dié aan wie dit toekom wanneer dit in die mag van jou hand is om dit te doen nie” (Spreuke 3:27). Ja, deur hierdie eenvoudige gebaar kan ons onsself en ander bevoordeel. Jy kan gerus ’n poging aanwend om hierdie kosbare gawe—’n vriendelike glimlag—met ander te deel.