Waarom waardes verander

“Wat is vir jou die belangrikste in die lewe?”

Hierdie vraag is aan 50 000 mense in 60 lande gevra. Volgens die Gallup-meningspeilers was die algemeenste antwoord uit feitlik elke wêrelddeel “’n gelukkige gesinslewe” en “goeie gesondheid”.

MET die eerste oogopslag lyk dit of mense oor die hele wêreld dieselfde edele stel waardes het. Dit is egter nie die ware toedrag van sake nie. In die verlede was mense se waardes op tradisionele godsdiens- en sedelike beginsels gegrond. Maar dinge is vinnig besig om te verander. Die navorser Marisa Ferrari Occhionero sê oor Italië: “Jongmense se waardes word al hoe minder deur ouers, tradisies en godsdiens beïnvloed.” Dieselfde kan gesê word van mense regoor die wêreld—hetsy jonk of oud.

Professor Ronald Inglehart, koördineerder van ’n navorsingsprojek wat die Wêreldopname oor Waardes genoem word, sê: “Daar is al hoe meer bewyse dat ingrypende veranderinge in mense se beskouings regoor die wêreld plaasvind.” Wat sit agter hierdie veranderinge? Inglehart sê: “Hierdie veranderinge weerspieël veranderinge op ekonomiese en tegnologiese gebied.”

Die Gallup-opname het byvoorbeeld getoon dat om ’n werk te hê “feitlik onderaan die lys” van dinge was wat in welvarende lande die belangrikste in die lewe is. Maar in ontwikkelende lande was om ’n werk te hê in sommige gevalle heel boaan die lys! Ja, wanneer mense arm is, is oorlewing van dag tot dag die belangrikste. Namate lande ekonomies ontwikkel, begin mense voorkeur gee aan dinge soos gesondheid, ’n gelukkige gesinslewe en selfuitlewing.

Weens tegnologiese vooruitgang sal hierdie nuwe waardes beslis ’n impak op ontwikkelende lande hê. Die tydskrif The Futurist sê: “Ons opvattings en waardes word gevorm deur wat ons sien en hoor.” Die massamedia het dus ’n geweldige impak op Westerse waardes gehad. The Futurist sê: “Hierdie media bereik mense regoor die wêreld.”

Watter veranderinge sien ons dus in mense se gesindhede en gedrag? Hoe raak hierdie veranderende waardes jou en jou gesin?