Die skade wat pornografie veroorsaak
DIE televisie, rolprente, musiekvideo’s en die Internet bied maklike toegang tot allerhande seksuele materiaal. Is die feit dat mense voortdurend met pornografiese, seksuele beelde gebombardeer word onskadelik, soos baie ons wil wysmaak?a
Die uitwerking van pornografie op volwassenes
Ten spyte van wat voorstanders van pornografie sê, het dit ’n uiters negatiewe uitwerking op mense se beskouing van seks en seksuele gedrag. Navorsers by die Nasionale Stigting vir Gesinsnavorsing en -opvoeding het tot die gevolgtrekking gekom dat “mense wat aan pornografie blootgestel word, groter gevaar loop om seksueel afwykende neigings te ontwikkel”. Volgens die verslag “is die verkragtingsmite (die opvatting dat vroue verkragting veroorsaak en geniet en dat verkragters normaal is) baie algemeen onder mans wat gewoontegebruikers van pornografie is”.
Volgens sommige navorsers kan dit mense se vermoë belemmer om normale geslagsomgang in die huwelik te hê en te geniet as hulle herhaaldelik na pornografie kyk. Dr. Victor Cline, wat in die behandeling van seksverslawing spesialiseer, het ’n herhaalde progressie in die gebruik van pornografie gesien. As ’n mens niks daaraan doen nie, kan iemand wat terloops na pornografie gekyk het, mettertyd na harde, afwykender pornografie begin kyk. Volgens hom kan dit tot afwykende seksdade lei. Gedragswetenskaplikes stem saam. Dr. Cline berig dat “enige soort seksueel afwykende gedrag op hierdie manier aangeleer kan word . . . en dat dit nie eers deur sterk skuldgevoelens te bowe gekom kan word nie”. Uiteindelik sal die persoon die onsedelike fantasieë wat uit die pornografie voortspruit, moontlik probeer uitleef, dikwels met vernietigende gevolge.
Cline het tot die gevolgtrekking gekom dat hierdie probleem geleidelik en onopgemerk kan ontwikkel. Hy sê: “Dit is soos kanker wat aanhou groei en versprei. Dit gaan selde vanself weg, en dit is ook baie moeilik om dit te behandel of te genees. Dit is tipies en voorspelbaar dat die verslaafde man die probleem sal ontken en sal weier om iets daaromtrent te doen, en dit lei amper altyd tot huweliksprobleme, soms egskeiding en soms die verbrokkeling van ander hegte verhoudings.”
Hoe dit jongmense benadeel
Statistiek toon dat seuns tussen die ouderdomme van 12 en 17 die vernaamste gebruikers van pornografie is. Trouens, vir baie is pornografie die hoofbron van hulle seksopvoeding. Dit het uiters ontstellende gevolge. “Tienerswangerskappe en seksueel oordraagbare siektes soos vigs”, sê een verslag, “bestaan glad nie in pornografie nie, wat die wanindruk skep dat die gedrag wat in pornografie uitgebeeld word, geen slegte gevolge het nie.”
Sommige navorsers sê dat blootstelling aan pornografie ook die natuurlike ontwikkeling van ’n kind se verstand kan aantas. Dr. Judith Reisman, voorsitter van die Instituut vir Mediaopvoeding, kom tot die slotsom: “Gesondheidsgerigte neurologiese waarnemings van die instinktiewe reaksie van die brein op pornografiese beelde en klanke toon dat pornografie ’n biologiese uitwerking op ’n mens het wat ingeligte toestemming verdring—en dit is skadelik vir kinders se [vormbare] ‘plastiese’ verstande omdat dit hulle ’n verwronge beeld van die werklikheid gee en dus hulle geestes- en liggaamlike gesondheid, hulle welsyn en strewe na geluk skade berokken.”
Die uitwerking op verhoudings
Pornografie vorm gesindhede en beïnvloed gedrag. Die boodskappe wat dit oordra, is verleidelik hoofsaaklik omdat dit fantasie is en dus meer opwindend voorgestel word as wat dit werklik is. (Sien die venster “Watter boodskap sal jy aanvaar?”) “Mense wat na pornografie kyk, skep in hulleself onrealistiese verwagtinge wat verhoudings beskadig”, sê een verslag.
Pornografie kan vertroue en eerlikheid vernietig, wat noodsaaklik is in ’n huwelik. Omdat mense gewoonlik in die geheim na pornografie kyk, lei dit dikwels tot oneerlikheid en leuens. Huweliksmaats voel dat hulle bedrieg is. Hulle verstaan nie waarom hulle huweliksmaat hulle nie meer begeerlik vind nie.
Geestelike skade
Pornografie veroorsaak ernstige geestelike skade. Dit kan ’n groot struikelblok word vir iemand wat ’n verhouding met God wil hê.b Die Bybel verbind geslagsdrif met hebsug en afgodediens (Kolossense 3:5). Iemand wat hebsugtig is, het so ’n sterk begeerte na iets dat dit sy lewe oorheers en alle ander dinge oorskadu. In werklikheid stel diegene wat aan pornografie verslaaf is, hulle geslagsdrange bo God. Hulle maak dus ’n afgod daarvan. Jehovah God se bevel is: “Jy mag geen ander gode teen my aangesig hê nie.”—Eksodus 20:3.
Pornografie vernietig liefdevolle verhoudings. Die apostel Petrus, wat self getroud was, het Christenmans aangespoor om hulle vrou eer toe te ken. ’n Man wat versuim om dit te doen, sal vind dat sy gebede tot God verhinder word (1 Petrus 3:7). Behandel jy jou vrou met eer as jy in die geheim na onbetaamlike materiaal kyk waarin vroue uitgebeeld word? Hoe sal sy voel as sy dit uitvind? En wat sal die God dink wat ‘elke soort werk sal oordeel’ en ‘die gesindheid ondersoek’? (Prediker 12:14; Spreuke 16:2, Die Bybel, 1983). Kan iemand wat na pornografie kyk, enige rede hê om te verwag dat God na sy gebede sal luister?
’n Wesenlike deel van pornografiegebruik is om ten alle koste op selfsugtige bevrediging aan te dring. Daarom is dit liefdeloos om na pornografie te kyk. Dit ondermyn ’n Christen se pogings om kuis te bly en ’n rein sedelike posisie voor God te behou. “Dit is die wil van God”, het die apostel Paulus geskryf, “dat julle julle onthou van hoerery; dat elkeen van julle moet weet hoe om in heiliging en eer sy eie vat in besit te kry, nie in hebsugtige geslagsdrif . . . nie; dat niemand so ver gaan dat hy sy broer skade berokken of inbreuk maak op sy regte” nie.—1 Tessalonisense 4:3-7.
Dit is veral vroue en kinders wat deur pornografie uitgebuit word. Dit verneder hulle en ontneem hulle hulle waardigheid en regte. Iemand wat na pornografie kyk, neem deel aan en ondersteun hierdie uitbuiting. “Ongeag hoe goed ’n . . . man dink hy is”, sê die navorsers Steven Hill en Nina Silver, “sy stilswyende goedkeuring van pornografie toon dat hy op sy beste [ongevoelig] is en in die ergste geval ’n vrouehatende gesindheid het teenoor die einste persoon wat hy sê hy liefhet.”
Hoe om met die pornografiegewoonte te breek
Sê nou jy is verslaaf aan pornografie? Kan enigiets gedoen word om daarvan los te breek? Die Bybel gee ’n mens hoop! Voordat party van die vroeë Christene Christus leer ken het, was hulle hoereerders, egbrekers en gierigaards. “Maar julle is skoon gewas”, het Paulus gesê. Hoe was dit moontlik? Hy het geantwoord: “Julle is geheilig . . . met die gees van ons God.”—1 Korintiërs 6:9-11.
Moet nooit die krag van God se heilige gees onderskat nie. “God is getrou”, sê die Bybel, “en hy sal nie toelaat dat julle versoek word bo wat julle kan verdra nie.” Ja, hy sal die uitweg voorsien (1 Korintiërs 10:13). Vurige gebed—om met volharding jou probleme na God te bring—sal resultate oplewer. Sy Woord spoor ons aan: “Werp jou las op Jehovah, en hy sal jou onderskraag.”—Psalm 55:22.
Jy moet natuurlik in ooreenstemming met jou gebede optree. Jy moet ’n doelbewuste en hartgrondige besluit neem om pornografie te verwerp. ’n Vriend of familielid wat jy vertrou, kan waardevolle hulp voorsien deur jou die nodige ondersteuning en bemoediging te gee om by jou besluit te bly. (Sien die venster “Waar om hulp te kry”.) As jy in gedagte hou dat jy God beslis sal behaag deur dit te doen, kan dit jou help om te volhard (Spreuke 27:11). Daarbenewens kan die wete dat jy God mishaag as jy na pornografie kyk as ’n bykomende motivering dien om met die gewoonte te breek (Genesis 6:5, 6). Dit sal nie ’n maklike stryd wees nie, maar jy kan suksesvol wees. Jy kan met die pornografiegewoonte breek!
Pornografie hou werklike gevare in. Dit is skadelik en vernietigend. Dit verderf dié wat dit produseer en dié wat dit gebruik. Dit is ’n belediging vir mans en vroue, ’n gevaar vir kinders en ’n gebruik wat verwerp moet word.
[Voetnote]
a Sien die reeks “Internetpornografie—Watter skade kan dit doen?” in die Ontwaak! van 8 Junie 2000, bladsye 3-10, vir ’n breedvoerige bespreking van die gevare van Internetpornografie.
b Sien die Ontwaak! van 8 Julie 2002, bladsye 19-21, vir ’n bespreking van die Bybel se beskouing van pornografie.
[Venster/Prent op bladsy 10]
Waar om hulp te kry
’n Mens moenie onderskat hoe moeilik dit kan wees om van pornografie los te breek nie; dit kan ’n taai stryd wees. Dr. Victor Cline, wat al honderde seksverslaafdes behandel het, sê: “Beloftes is nie genoeg nie. Goeie bedoelings beteken niks nie. [’n Seksverslaafde] kan dit beslis nie op sy eie doen nie.” Volgens Cline is ’n voorvereiste vir suksesvolle behandeling om die huweliksmaat te betrek as die persoon getroud is. “Dit werk vinniger as albei betrokke is”, sê hy. “Albei het seergekry. Albei het hulp nodig.”
As die persoon ongetroud is, kan ’n vriend of familielid wat hy vertrou, dikwels ’n steunpilaar wees. Cline het een onveranderlike reël ongeag wie by die behandeling betrokke is: Praat openlik oor die probleem en enige terugslae. “Geheime is ‘gif’”, sê hy. “Dit veroorsaak skaamte en skuldgevoelens.”
[Tabel op bladsy 9]
Watter boodskap sal jy aanvaar?
Die boodskap van pornografie
◼ Seks met enigiemand, ongeag die tyd, die omstandighede en hoe dit gedoen word, is goed en het geen negatiewe gevolge nie.
Die Bybel se beskouing
◼ “Laat die huwelik onder almal eerbaar wees en die huweliksbed sonder verontreiniging, want God sal hoereerders en egbrekers oordeel.”—Hebreërs 13:4.
“Hy wat hoerery beoefen, sondig teen sy eie liggaam.”—1 Korintiërs 6:18; sien ook Romeine 1:26, 27.
Die boodskap van pornografie
◼ Die huwelik belemmer seksuele bevrediging.
Die Bybel se beskouing
◼ “Verheug jou met die vrou van jou jeug . . . Mag jy voortdurend met haar liefde in ekstase wees.”—Spreuke 5:18, 19; sien ook Genesis 1:28; 2:24; 1 Korintiërs 7:3.
Die boodskap van pornografie
◼ Vroue is net goed vir een ding—om die seksuele behoeftes van mans te bevredig.
Die Bybel se beskouing
◼ “Ek [Jehovah God] gaan vir hom ’n helper maak, as ’n komplement van hom.”—Genesis 2:18; sien ook Efesiërs 5:28.
Die boodskap van pornografie
◼ Mans en vroue is slawe van hulle geslagsdrange.
Die Bybel se beskouing
◼ “Maak dan dood julle liggaamsdele wat op die aarde is ten opsigte van hoerery, onreinheid, geslagsdrif, skadelike begeertes en hebsug, wat afgodediens is.”—Kolossense 3:5.
“Elkeen van julle moet weet hoe om in heiliging en eer sy eie vat in besit te kry.”—1 Tessalonisense 4:4.
Beskou ‘ouer vroue as moeders, jonger vroue as susters met alle kuisheid’.—1 Timoteus 5:1, 2; sien ook 1 Korintiërs 9:27.
[Prent op bladsy 7]
Sommige navorsers sê dat blootstelling aan pornografie die natuurlike ontwikkeling van ’n kind se verstand kan aantas
[Prent op bladsy 8]
Pornografie kan vertroue en openhartigheid in ’n huwelik vernietig
[Prent op bladsy 10]
Vurige gebed sal resultate oplewer