Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • g03 8/8 bl. 2-4
  • Die weer—Is iets fout?

Video nie beskikbaar nie.

Jammer, die video kon nie laai nie.

  • Die weer—Is iets fout?
  • Ontwaak!—2003
  • Onderhofies
  • Soortgelyke materiaal
  • Nie beperk tot Europa nie
  • Wat is El Nino?
    Ontwaak!—2000
  • Uiterste weerstoestande – Kan die Bybel jou help?
    Nog onderwerpe
  • Die kuns en wetenskap van weervoorspelling
    Ontwaak!—2001
  • Mense praat oor die weer
    Ontwaak!—1998
Sien nog
Ontwaak!—2003
g03 8/8 bl. 2-4

Die weer—Is iets fout?

“WANNEER twee Engelsmanne mekaar raakloop, praat hulle heel eerste oor die weer.” Dit is wat die bekende skrywer Samuel Johnson skertsend gesê het. Maar in onlangse jare het die weer meer as net ’n onderwerp geword waarmee ’n mens ’n geselsie aanknoop. Dit het vir mense oor die hele wêreld ’n bron van groot kommer geword. Waarom? Omdat dit lyk of die weer—wat in elk geval nog altyd onvoorspelbaar was—al hoe wispelturiger raak.

Gedurende die somer van 2002 was daar byvoorbeeld buitengewone swaar reënstorms in Europa. Trouens, dit het gelei tot wat beskryf is as “die ergste vloede in meer as ’n eeu in Sentraal-Europa”. Let op die volgende nuusberigte:

OOSTENRYK: “Die provinsies Salzburg, Karintië en Tirol het veral swaar deurgeloop onder hewige reënstorms. Baie strate was toe onder die slyk, met modder en puin wat tot 15 meter hoog gelê het. By Wene se Südbahnhof-stasie het ’n donderstorm ’n treinongeluk veroorsaak waarin etlike mense beseer is.”

TSJEGGIESE REPUBLIEK: “Dit was ’n nagmerrie vir Praag. Maar in die provinsies het ’n baie erger tragedie hom afgespeel. Tot 200 000 mense moes hulle huise ontruim. Hele dorpe het onder die vloedwater verdwyn.”

FRANKRYK: “Drie-en-twintig dood, 9 vermis en duisende swaar getref . . . Weerlig het drie mense in Maandag se storms doodgeslaan. . . . ’n Brandweerman is dood nadat hy ’n egpaar gered het wat in nood was; hulle is in hulle motor deur die waters meegesleur.”

DUITSLAND: “Nog nooit in die geskiedenis van die Bondsrepubliek is stede en dorpe op so ’n groot skaal ontruim soos nou gedurende hierdie ‘vloed van die eeu’ nie. Inwoners het hulle tuisdorpe by die duisende verlaat. Die meeste het dit as ’n voorsorgmaatreël gedoen. Party is op die laaste oomblik met ’n boot of helikopter van die vloedwater gered.”

ROEMENIË: “Sedert die middel van Julie het omtrent 12 mense hulle lewe weens die storms verloor.”

RUSLAND: “Ten minste 58 mense het by die Swart See gesterf . . . Ongeveer 30 motors en busse is nog op die seebodem, en aangesien nuwe stormwaarskuwings uitgereik is, is ’n soektog onmoontlik.”

Nie beperk tot Europa nie

In Augustus 2002 het die Duitse dagblad Süddeutsche Zeitung berig: “Swaar reënbuie en storms het weer oor Asië, Europa en Suid-Amerika uitgesak en verwoesting gesaai. Woensdag is ten minste 50 mense dood in ’n modderstorting in Nepal. ’n Tifoon het agt lewens in die suide van China geëis en swaar reënval in Sentraal-China veroorsaak. Weens die vloede in China het die Mekong-rivier sy hoogste watervlak in 30 jaar bereik en meer as 100 huise in die noordooste van Thailand oorstroom. . . . In Argentinië het ten minste vyf mense ná swaar reëns verdrink. . . . Meer as duisend mense het weens die somerstorms in China omgekom.”

Terwyl water skade aangerig het in baie dele van die wêreld, het die Verenigde State ’n ernstige droogte ondervind. Een berig het gesê: “Daar is landwyd kommer oor lae watervlakke in putte en oor droë putte, oor strome wat op baie plekke rekord- lae vlakke bereik het en oor die feit dat daar meer as dubbel die normale aantal veldbrande vir die seisoen was. As gevolg van mislukte oeste en die verlies aan weiveld, die tekort aan drinkwater, veldbrande en stofstorms, voorspel kenners dat die ongunstige ekonomiese uitwerking van 2002 se droogte miljarde dollars sal beloop.”

Dele van Noord-Afrika ondervind sedert die 1960’s ’n verwoestende droogte. Volgens verslae “was die reënval twintig tot nege-en-veertig persent laer as in die eerste helfte van die 20ste eeu, wat wydverspreide hongersnood en lewensverlies meebring”.

Die El Niño-weerpatroon—wat ontstaan weens die verwarming van die waters in die ooste van die Stille Oseaan—veroorsaak van tyd tot tyd oorstromings en ander versteurings van die weerpatrone in Noord- en Suid-Amerika.a Die CNN-nuusorganisasie berig dat die El Niño van 1983/84 “vir meer as 1 000 sterftes verantwoordelik [was], op feitlik elke vasteland weerverwante rampe veroorsaak het en altesaam $10 miljard [R80 miljard] se skade aan eiendom en lewende hawe aangerig het”. Hierdie verskynsel keer gereeld terug (omtrent elke vier jaar) sedert dit die eerste keer in die 19de eeu geïdentifiseer is. Maar party kenners glo dat El Niño in die toekoms “meer dikwels [sal] voorkom”.

’n Artikel wat deur die Amerikaanse Nasionale Lugvaart- en Ruimte-administrasie uitgegee is, gee hierdie versekering: “Die meeste van die ‘vreemde’ weer wat ons ondervind het—daardie buitengewone warm herfs of daardie besondere nat winter—kan aan normale streeksweerveranderinge toegeskryf word.” Nietemin is daar tekens dat daar moontlik ’n ernstige probleem is. Greenpeace, die aktiviste-organisasie wat hom vir die bewaring van die omgewing beywer, voorspel: “Gevaarlike weerpatrone insluitende kragtiger orkane en swaar reëns sal aanhou om oor die hele planeet verwoesting te saai. Ernstiger droogtes en vloede sal letterlik verander hoe die aarde lyk, wat tot die verlies van kusgebiede en die vernietiging van woude sal lei.” Steek daar enige waarheid in sulke bewerings? Indien wel, wat is die oorsaak van hierdie “gevaarlike weerpatrone”?

[Voetnoot]

a Sien die artikel “Wat is El Niño?” in die Ontwaak! van 22 Maart 2000.

[Prente op bladsy 2, 3]

Vloede in Duitsland (bo) en in die Tsjeggiese Republiek (links)

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel