Die Bybel se beskouing

Is etniese haat geregverdig?

HOE sou jy voel as jy as slinks, gewelddadig, dom of onsedelik beskou word net omdat jy aan ’n sekere etniese groep behoort?a Jy sou ongetwyfeld gegrief voel. Ongelukkig het miljoene mense dit al ondervind. En deur die geskiedenis heen is tallose onskuldige mense mishandel en selfs vermoor, bloot weens hulle ras of nasionaliteit. Trouens, die meeste van die bloedige konflikte wat vandag aan die gang is, spruit voort uit etniese haat. Tog sê baie wat hierdie geweld steun, dat hulle aan God en die Bybel glo. En daar is mense wat beweer dat rassisme altyd sal bestaan—dat dit ’n deel van die mensenatuur is.

Vergoelik die Bybel sulke etniese haat? Is daar omstandighede wat dit regverdig om mense van ’n ander kultuur of ras te haat? Is daar enige hoop op ’n toekoms sonder etniese haat? Wat is die Bybelse beskouing?

Veroordeel weens hulle dade

’n Oppervlakkige ondersoek van God se vroeë handelinge met die mensdom kan ’n mens die verkeerde gevolgtrekking laat maak—naamlik dat God in werklikheid etniese haat bevorder het. Beskryf verskeie Bybelverslae dan nie hoe God hele stamme en nasies uitgeroei het nie? Ja, maar ’n nadere ondersoek toon dat God hierdie volke weens hulle onsedelike verontagsaming van sy wette veroordeel het en nie weens hulle etniese agtergrond nie.

Jehovah God het die Kanaäniete byvoorbeeld weens hulle verdorwe seksuele en demonistiese rituele veroordeel. Hulle het selfs kinders as offerandes aan valse gode verbrand! (Deuteronomium 7:5; 18:9-12). Maar in sommige gevalle het sekere Kanaäniete geloof in God gestel en berou getoon. Gevolglik het Jehovah hulle lewe gespaar en hulle geseën (Josua 9:3, 25-27; Hebreërs 11:31). ’n Kanaänitiese vrou, Ragab, het selfs ’n voorouer van die beloofde Messias, Jesus Christus, geword.—Matteus 1:5.

Die Wet wat God die Israeliete gegee het, toon dat hy nie partydig is nie. Inteendeel, hy is waarlik besorg oor die welsyn van alle volke. In Levitikus 19:33, 34 vind ons die volgende medelydende bevel van God aan die Israeliete: “As ’n inwonende vreemdeling by jou woon as ’n vreemdeling in julle land, mag julle hom nie mishandel nie. Die inwonende vreemdeling wat as ’n vreemdeling by julle woon, moet vir julle soos ’n boorling onder julle word; en jy moet hom liefhê soos jouself, want julle het inwonende vreemdelinge in Egipteland geword. Ek is Jehovah julle God.” Daar is soortgelyke bevele in die boeke Eksodus en Deuteronomium. Dit is duidelik dat Jehovah nie etniese haat goedgekeur het nie. Hy het op etniese harmonie aangedring.

Jesus het etniese verdraagsaamheid bevorder

Toe Jesus op die aarde was, was Jode en Samaritane geneig om mekaar te verag. By een geleentheid het die mense in ’n Samaritaanse dorpie Jesus weggewys bloot omdat hy ’n Jood was wat op pad was na Jerusalem. Hoe sou jy daarop gereageer het? Jesus se dissipels het moontlik die vooroordele van daardie tyd weerspieël toe hulle hom gevra het: “Here, wil u hê ons moet sê dat vuur uit die hemel neerdaal en hulle verdelg?” (Lukas 9:51-56). Het Jesus toegelaat dat sy dissipels se verbitterde gees hom beïnvloed? Inteendeel, hy het hulle bestraf en vreedsaam in ’n ander dorpie verblyf gaan soek. Kort daarna het Jesus die gelykenis van die barmhartige Samaritaan vertel. Dit het duidelik toegelig dat iemand se etniese agtergrond op sigself hom nie ’n vyand maak nie. Trouens, hy is dalk ’n besonder barmhartige persoon!

Etniese groepe in die Christengemeente

Gedurende Jesus se aardse bediening het hy hom hoofsaaklik daarop toegespits om onder mense van sy eie nasie dissipels te maak. Maar hy het aangedui dat ander later sy volgelinge sou word (Matteus 28:19). Sou mense van alle etniese groepe aanvaar word? Ja! Die apostel Petrus het gesê: “Ek sien vir seker dat God nie partydig is nie, maar in elke nasie is die mens wat hom vrees en regverdigheid beoefen, vir hom aanneemlik” (Handelinge 10:34, 35). Die apostel Paulus het later hierdie gedagte bevestig deur uitdruklik te sê dat ’n mens se etniese agtergrond nie saak maak in die Christengemeente nie.—Kolossense 3:11.

Nog ’n aanduiding dat God mense van alle etniese groepe aanvaar, word in die Bybelboek Openbaring gevind. In ’n goddelik geïnspireerde visioen het die apostel Johannes “’n groot menigte . . . uit alle nasies en stamme en volke en tale” gesien wat redding van God ontvang het (Openbaring 7:9, 10). Hierdie “groot menigte” sal die grondslag van ’n nuwe mensegemeenskap wees waarin mense van alle agtergronde in vrede met mekaar sal lewe, verenig deur hulle liefde vir God.

Intussen moet Christene die drang weerstaan om ander weens hulle etniese agtergrond te veroordeel. Dit is regverdig en liefdevol om mense as individue te beskou, soos God hulle beskou, en nie net as lede van etniese groepe nie. Is dit nie hoe jy beskou wil word nie? Jesus vermaan ons gepas: “Alles wat julle dan wil hê dat die mense aan julle moet doen, moet julle ook net so aan hulle doen” (Matteus 7:12). Dit is verkwikkend om sonder etniese haat te lewe. Dit lei tot groter gemoedsrus en vrede met ander. Nog belangriker, dit bring ons beskouing in ooreenstemming met dié van ons onpartydige Skepper, Jehovah God. Wat ’n dwingende rede is dit tog om etniese haat te verwerp!

[Voetnoot]