Kommunikasie—Noodsaaklik vir die aarde se web van die lewe
TOE Julie ’n baba was, het haar ouers gretig gewag vir die oomblik wanneer sy haar eerste woorde sou sê. “Om ’n baba ‘Mamma’ en ‘Pappa’ te hoor sê, laat ’n onbeskryflike gevoel by ouers ontstaan”, het Julie se ma gesê. “Toe Julie my die eerste keer ‘Mamma’ genoem het, was dit asof sy haar armpies om my gesit en gesê het: ‘Jy is my ma. Ek is lief vir jou, en ek wil met jou praat.’ Ek sal altyd daardie spesiale oomblik onthou.” Ja, die vermoë om te kommunikeer, is waarlik ’n kosbare gawe!
Dit is natuurlik nie net mense wat die vermoë het om te kommunikeer nie. Hoewel diere meer deur instink gelei word, kommunikeer hulle ook op merkwaardige maniere. Wanneer keiserpikkewyne byvoorbeeld voor die winter in die ysige Antarktika mekaar die hof maak, trompetter hulle vir mekaar—maar nie vir die pret nie. Die kuikens wat later uitgebroei gaan word, se lewe hang daarvan af. Hoe so?
Nadat die wyfie haar eier gelê het, gee sy dit vir haar maat om dit onder sy huidplooi uit te broei terwyl sy see toe gaan om kos te soek. Ongeveer 65 dae later kom sy terug nadat sy tot 150 kilometer ver oor die ys gewaggel en op haar maag gegly het. Die feit dat sy die kolonie vind, is op sigself ’n wonderwerk, maar hoe vind sy haar maat en hulle pas uitgebroeide kuiken tussen tienduisende trompetterende keiserpikkewyne? Gedurende die hofmakery memoriseer elke voël sy maat se roep só goed dat hulle mekaar kan vind selfs nadat hulle maande lank geskei was!
Benewens ’n verstommende verskeidenheid geluide sluit dierekommunikasie gebare, helder kleure, flitsende ligte en komplekse reuke in. En hoewel dit dalk ongelooflik klink, kan selfs plante met mekaar en met sekere diere kommunikeer, soos ons sal sien. Ja, kommunikasie is inderdaad noodsaaklik vir die aarde se onderling afhanklike en uiters komplekse web van die lewe.
Wil jy meer leer oor sommige van die verstommende vorme van kommunikasie in die wêreld om ons? En sal jy graag jou waardering vir jou eie kommunikasievaardighede wil vergroot en dit selfs verbeter? Die volgende artikels sal jou moontlik help.
[Prent op bladsy 3]
Hoe vind ’n wyfiekeiserpikkewyn haar maat?