Jongmense vra . . . 

Moet ek ’n tatoeëermerk kry?

“Party tatoeëermerke is oulik. Hulle is baie kunstig.”—Jalene.a

“Ek het twee jaar lank oor my eerste tatoeëermerk gedroom.”—Michelle.

A LMAL het tatoeëermerke—of dit lyk ten minste so. Rock-, sport- en filmsterre sowel as modelle spog daarmee. So ook baie tieners, wat met trots tatoeëermerke op hulle skouers, hande, middellyf en enkels vertoon. Andrew sê: “Tatoeëermerke is cool. Om een te hê of nie is ’n persoonlike besluit.”

Die World Book Encyclopedia sê: “Tatoeëring is die gebruik om permanente ontwerpe op die liggaam aan te bring. Dit word gedoen deur klein gaatjies in die vel te maak met ’n skerpgemaakte stokkie, beentjie of naald wat in natuurlike kleurstowwe gedoop is.”

Hoewel dit moeilik is om die presiese syfers te kry, skat een bron dat 25 persent van al die 15- tot 25-jariges in die Verenigde State ’n tatoeëermerk het. Sandy sê: “Dis die in ding om te doen.” Waarom wil sommige jongmense so graag ’n tatoeëermerk hê?

Waarom so gewild?

Vir sommige is ’n tatoeëermerk ’n groot romantiese gebaar. Michelle vertel: “My broer het die naam van ’n meisie met wie hy uitgegaan het, op sy enkel laat tatoeëer.” Die probleem? “Hulle gaan nie meer uit nie.” Volgens die tydskrif Teen “skat dokters dat meer as 30 persent van alle tatoeëermerkverwydering onder tienermeisies voorkom wat ’n ekskêrel se naam wil laat verwyder”.

Party jongmense beskou tatoeëermerke as kunswerke. Ander beskou dit as ’n simbool van onafhanklikheid. “Ek is in beheer van my lewe”, het Josie gesê en bygevoeg dat die besluit om ’n tatoeëermerk te kry, “die enigste groot besluit is wat ek nog gemaak het”. Tatoeëring gee vir party jongmense die geleentheid om te eksperimenteer—om te voel dat hulle beheer oor hulle voorkoms het. Tatoeëermerke kan ook ’n simbool van opstandigheid of van ’n alternatiewe lewenswyse wees. Daarom bevat sommige tatoeëermerke onwelvoeglike woorde en tekeninge of suggestiewe slagspreuke.

Maar die meeste jongmense word dalk bloot deur ’n gier meegevoer. Beteken dit dan dat jy ’n tatoeëermerk moet kry net omdat dit lyk asof almal dit kry?

Tatoeëring—’n eeue oue kuns

Tatoeëring is geensins ’n hedendaagse gebruik nie. In Egipte en Libië is daar al mummies met tatoeëermerke gevind, wat uit ’n tydperk honderde jare voor Christus dateer. Getatoeëerde mummies is ook in Suid-Amerika gevind. Baie van hulle tatoeëermerke het direk verband gehou met die aanbidding van heidense gode. Volgens die navorser Steve Gilbert “beeld die oudste bekende tatoeëermerk wat ’n prentjie van iets is en nie ’n abstrakte patroon nie, die god Bes af. In Egiptiese mitologie is Bes die wellustige god van fuiwery.”

Dit is betekenisvol dat die Mosaïese Wet God se volk verbied het om tatoeëermerke op hulle aan te bring. Levitikus 19:28 sê: “Julle mag geen snye in julle vlees maak vir ’n afgestorwe siel nie, en julle mag geen tatoeëermerke op julle aanbring nie. Ek is Jehovah.” Afgodsaanbidders, soos die Egiptenare, het die name of simbole van hulle gode op hulle bors of arms laat tatoeëer. As die Israeliete gehoor gegee het aan Jehovah se verbod op tatoeëermerke, sou dit duidelik wees dat hulle anders as al die ander nasies is.—Deuteronomium 14:1, 2.

Hoewel Christene nie vandag onder die Wet van Moses is nie, laat die feit dat dit tatoeëermerke verbied het, ’n mens dink (Efesiërs 2:15; Kolossense 2:14, 15). As jy ’n Christen is, sal jy sekerlik nie eers tydelike merke op jou liggaam wil maak wat enigiets met heidense of valse aanbidding te doen het nie.—2 Korintiërs 6:15-18.

Gesondheidsrisiko’s

Daar is ook gesondheidsrisiko’s wat jy in ag moet neem. Dr. Robert Tomsick, ’n medeprofessor van dermatologie, sê: “Wat in werklikheid gebeur, is dat jy die vel breek en kleurstof daarin aanbring. Al gaan die naald nie diep in nie, bestaan die gevaar altyd dat jy ’n bakteriële of virusinfeksie kan kry wanneer jy die vel breek. Ek dink dat dit oor die algemeen gevaarlik is [om ’n tatoeëermerk te kry].” Dr. Tomsick sê verder: “Nadat die kleurstof aangebring is, bestaan daar nog altyd ’n kans dat jy kontakallergieë, velontsteking en allergiese reaksies kan kry wat die vel rooi, geswolle, skurf en jeukerig kan laat word, al is daar nie ’n infeksie nie.”

Hoewel tatoeëermerke bedoel is om permanent te wees, word verskeie metodes gebruik om dit te probeer verwyder: Laserverwydering (om die tatoeëermerk weg te brand), chirurgiese verwydering (om die tatoeëermerk weg te sny), dermabrasie (om die vel met ’n staalborsel te skrop om die epidermis en dermis te verwyder), salabrasie (om die getatoeëerde vel in ’n soutoplossing te week) en skarifisering (om die tatoeëermerk met ’n suuroplossing te verwyder en ’n litteken in die plek daarvan te laat). Hierdie metodes is duur en kan pynlik wees. “Dit is seerder om ’n tatoeëermerk met ’n laser te verwyder as om die oorspronklike tatoeëermerk te kry”, sê die tydskrif Teen.

Wat sal ander dink?

Jy moet ook ernstig nadink oor hoe ander dalk daaroor sal voel as jy ’n tatoeëermerk kry, aangesien baie mense negatief daarop reageer (1 Korintiërs 10:29-33). Li, ’n vrou in Taiwan, het op die ingewing van die oomblik ’n tatoeëermerk gekry toe sy 16 was. Nou is sy ’n 21-jarige kantoorwerker. “Ek hou nie van die manier waarop my medewerkers na die tatoeëermerk staar nie”, erken Li. Die Britse geestesgesondheidswerker Theodore Dalrymple sê dat tatoeëermerke vir baie mense “dikwels die sigbare teken is dat ’n man . . . aan ’n gewelddadige, wrede en antisosiale gekriminaliseerde subkultuur behoort”.

’n Artikel in die tydskrif American Demographics het eweneens opgemerk: “Dit is duidelik dat die meeste Amerikaners dit as ’n risiko beskou om sigbare lyfkuns te hê. Vyf-en-tagtig persent [van jongmense] stem saam met die stelling: ‘Mense wat sigbare tatoeëermerke het . . . , moet besef dat hierdie vorm van selfuitlewing waarskynlik ’n struikelblok in hulle loopbaan of persoonlike verhoudings sal veroorsaak.’”

Dink ook daaraan of jou besluit om ’n tatoeëermerk te kry, die bewering dat jy ’n Christen is, sal bevestig of ondermyn. Kan dit ’n “rede tot struikeling” vir ander wees? (2 Korintiërs 6:3). Party jongmense het nou wel tatoeëermerke op hulle liggaam waar ’n mens dit nie kan sien nie. Selfs hulle ouers weet miskien nie van hierdie geheime tatoeëermerke nie. Maar wees versigtig! As jy skielik dokter toe moet gaan of by die skool moet stort, sal jou geheim dalk algemene kennis word! Dit is beter om ‘ons in alles eerlik te gedra’ as om ander dwaaslik te probeer mislei.—Hebreërs 13:18.

Soos alle ander giere kan tatoeëermerke mettertyd hulle gewildheid verloor. Dink daaraan: Is daar enige kledingstuk—of dit nou jeans, ’n hemp, ’n rok of ’n paar skoene is—waarvoor jy so lief is dat jy dit vir die res van jou lewe wil dra? Natuurlik nie! Style, snitte en kleure verander. Maar anders as klere is dit nie so maklik om van tatoeëermerke ontslae te raak nie. En wat vir jou “cool” is wanneer jy 16 is, is moontlik glad nie so cool wanneer jy 30 is nie.

Baie was al spyt dat hulle permanente veranderinge aan hulle voorkoms gemaak het. “Ek het ’n tatoeëermerk gekry voordat ek van Jehovah geleer het”, vertel Amy. “Ek probeer dit altyd toehou. Wanneer iemand in die gemeente dit per toeval sien, voel ek verleë.” Die boodskap? Dink voor jy ink. Moenie ’n besluit maak waaroor jy dalk later spyt sal wees nie.

[Voetnoot]

[Prent op bladsy 26]

Tatoeëermerke word dikwels met ’n opstandige lewenswyse geassosieer

[Prent op bladsy 26]

Baie is later spyt dat hulle ’n tatoeëermerk gekry het

[Prent op bladsy 27]

Dink voor jy ink