Die Bybel se beskouing
Alternatiewe lewenswyses—Keur God dit goed?
“WANNEER sal ek weet wat my seksuele voorkeur is?” Dit is wat ’n 13-jarige meisie aan ’n adviesrubriek vir tieners geskryf het. Haar vraag weerspieël die gesindheid van baie wat meen dat mense vry is om enige seksuele lewenswyse van hulle keuse te volg.
Party mense is werklik verward oor hulle seksuele gevoelens. Ander neem openlik alternatiewe lewenswyses soos homoseksualiteit aan. Nog ander sal onbeskaamd soos die teenoorgestelde geslag optree of aantrek. Party ondergaan ’n geslagsveranderingsoperasie. Daar is selfs sommige wat aanvoer dat volwassenes toegelaat moet word om geslagsomgang met kinders te hê.
Is seksuele gebruike en geslag werklik ’n saak van persoonlike keuse? Wat sê God se Woord hieroor?
“Man en vrou het hy hulle geskep”
Volgens die Bybelboek Genesis het God self die verskille tussen mans en vroue geskep. Die verslag sê: “God het die mens na sy beeld begin skep . . . Man en vrou het hy hulle geskep. Verder het God hulle geseën, en God het vir hulle gesê: ‘Wees vrugbaar en word baie en vul die aarde en onderwerp dit.’”—Genesis 1:27, 28.
God het die mens met wilsvryheid geskep en hulle geleenthede gegee om hulle vryheid te geniet (Psalm 115:16). Die mens is die verantwoordelikheid gegee om na alle lewende wesens op aarde om te sien, en hy is selfs toegelaat om gepaste name vir hulle te kies (Genesis 2:19). Maar in sake wat met seksualiteit verband hou, het God spesifieke riglyne gegee.—Genesis 2:24.
Weens Adam se ongehoorsaamheid het ons almal onvolmaaktheid geërf. Ons moet dus veg teen vleeslike swakhede en sterk begeertes wat in stryd is met God se oorspronklike voorneme. Gevolglik het God in die wette wat hy deur Moses gegee het, spesifieke seksuele gebruike genoem wat vir hom afskuwelik is—naamlik egbreuk, bloedskande, homoseksualiteit en bestialiteit (Levitikus 18:6-23). God het ook uitdruklik verbied dat iemand hom vir onsedelike doeleindes as ’n lid van die teenoorgestelde geslag voordoen (Deuteronomium 22:5). Die Bybel leer deurgaans dat die enigste geslagsgemeenskap wat God goedkeur, met iemand van die teenoorgestelde geslag binne die huweliksreëling is (Genesis 20:1-5, 14; 39:7-9; Spreuke 5:15-19; Hebreërs 13:4). Is hierdie standaarde redelik?
Wie se keuse is dit?
Die Bybel vergelyk die mens se posisie voor sy Skepper met klei in die hande van ’n pottebakker. Dit sê: “O mens, wie is jy dan tog om God terug te antwoord? Sal wat gevorm is, vir hom wat dit gevorm het, sê: ‘Waarom het jy my so gemaak?’” (Romeine 9:20). Dit is duidelik uit die manier waarop God mans en vroue gemaak het dat dit vir hulle natuurlik is om seksueel aangetrokke tot mekaar te voel. Seksuele aangetrokkenheid tot iemand van dieselfde geslag, tot ’n dier of tot ’n kind is derhalwe onnatuurlik.—Romeine 1:26, 27, 32.
Daarom is mense wat in ooreenstemming met sulke onnatuurlike seksuele neigings optree in verset teen God. Die Bybel bevat hierdie waarskuwing: “Wee hom wat met sy Formeerder getwis het, soos ’n erdeskerf met die ander erdeskerwe van die grond! Moet die klei vir sy vormer sê: ‘Wat maak jy?’” (Jesaja 45:9). Dit is tog seker redelik dat die Maker van die mens leiding gee oor seksuele sake. Is dit dan nie ook redelik dat mense sulke leiding moet volg nie?
Elkeen moet sy eie vat in besit kry
Die Bybelskrywer Paulus het ’n soortgelyke illustrasie gebruik toe hy aan Christene leiding gegee het oor seksuele gedrag. Hy het gesê: “Elkeen van julle moet weet hoe om in heiliging en eer sy eie vat in besit te kry, nie in hebsugtige geslagsdrif . . . nie” (1 Tessalonisense 4:4, 5). Paulus vergelyk ’n mens se liggaam met ’n vat. Om besit te kry van daardie vat beteken dat ’n mens jou gedagtes en begeertes in ooreenstemming met God se sedewette moet bring.
Dit is natuurlik nie altyd maklik nie. Iemand wat as kind seksueel gemolesteer is, iemand wat ouers of ander oppassers gehad het wat ’n verwronge voorbeeld van manlikheid of vroulikheid gestel het of iemand wat op ’n vroeë ouderdom aan pornografie blootgestel is, kan begryplikerwys probleme ondervind. Genetiese, hormonale en sielkundige faktore kan ook tot verwronge seksuele gevoelens lei. Dit is egter gerusstellend om te weet dat ons Skepper hulp en ondersteuning kan voorsien aan diegene wat dit nodig het.—Psalm 33:20; Hebreërs 4:16.
Laat die Groot Pottebakker toe om jou te vorm
’n Stuk klei moet in die middel van die pottebakkerswiel geplaas word voordat die pottebakker dit kan begin vorm. Daarna, terwyl die wiel draai, oefen die pottebakker op vaardige wyse liggies druk uit om die klei in die vorm te kry waarin hy dit wil hê. Voordat ons gevorm kan word tot die persoon wat God wil hê ons moet wees, moet God se ewige beginsels en wette die middelpunt van ons lewe wees. Sodra ons ’n poging begin aanwend, oefen God op liefdevolle wyse druk op ons uit deur middel van die Bybel, sy heilige gees en die Christenbroederskap. ’n Mens begin dan God se persoonlike besorgdheid in jou lewe voel en ondervind.
Ons moet natuurlik ons vertroue in die Skepper se wysheid opbou en glo dat hy weet wat vir ons die beste is. Hierdie vertroue word deur gebed en ’n ywerige studie van die Bybel opgebou. Iemand wat die kwessie van verkeerde seksuele gevoelens met daardie gesindheid benader, word vormbaar in die hande van die Skepper. Eerste Petrus 5:6, 7 sê: “Verneder julle dan onder die magtige hand van God, sodat hy julle op die bestemde tyd kan verhef; terwyl julle al julle sorge op hom werp, want hy sorg vir julle.”
As ons die Bybel gereeld lees, leer ons van talle getroue knegte van God wat met vleeslike begeertes geworstel het maar nooit tou opgegooi het nie. Hoe aanmoedigend is hierdie voorbeelde tog! Ons kan hoor hoe gefrustreerd die apostel Paulus partykeer met homself was toe hy uitgeroep het: “Ellendige mens wat ek is! Wie sal my red van die liggaam wat hierdie dood ondergaan?” Maar hy het ook ons aandag op die hoofbron van hulp gevestig toe hy sy eie vraag beantwoord het: “Aan God die dank deur middel van Jesus Christus, ons Here!”—Romeine 7:24, 25.
’n Krag wat ’n mens help om te verander
Ons kan ook die hulp van God se heilige gees ontvang. Dit is ’n sterk krag wat ’n mens help om te verander. Heilige gees help ons om ‘die ou persoonlikheid af te lê’ en ons ‘met die nuwe persoonlikheid te beklee, wat na God se wil in ware regverdigheid en lojaliteit geskep is’ (Efesiërs 4:22-24). Ons liefdevolle hemelse Vader sal altyd gehoor gee aan opregte versoeke dat sy heilige gees ons moet help om hierdie verandering te maak. Jesus verseker ons dat die Vader “heilige gees [sal] gee aan dié wat hom vra” (Lukas 11:13). Dit is egter noodsaaklik om in gebed te volhard, soos aangedui word deur sy woorde: “Hou aan vra, en vir julle sal gegee word” (Matteus 7:7). Dit sal veral van toepassing wees wanneer ons sterk seksuele begeertes onder beheer moet bring.
God help ons ook deur middel van die ware Christenbroederskap, wat mense van alle agtergronde insluit. Party Christene in die eerste-eeuse gemeente in Korinte was voorheen in die kategorie van “mans wat vir onnatuurlike doeleindes aangehou word” en “mans wat by mans lê”. Maar hulle het verander. Christus se bloed het hulle gereinig, en hulle het aanneemlik in God se oë geword (1 Korintiërs 6:9-11). Vandag moet party soortgelyke veranderings maak. En die Christengemeente kan hulle ondersteun in hulle stryd teen verkeerde begeertes.
Beteken dit dat iemand wat ’n Christen word, outomaties genees sal word van alle afwykende begeertes of verwarring oor geslag? Nie noodwendig nie. Die volgehoue toepassing van Bybelbeginsels het party in staat gestel om normale lewens te lei. Nogtans moet hierdie Christene dikwels ’n daaglikse stryd teen verkeerde begeertes voer. Hulle dien God dus ten spyte daarvan dat hulle ’n figuurlike “doring in die vlees” het (2 Korintiërs 12:7). Solank hulle die stryd teen verkeerde neigings voortsit en regverdige gedrag handhaaf, beskou God hulle as getroue knegte en as rein in sy oë. Hulle kan uitsien na die tyd in die toekoms wanneer die hele mensdom “van die slawerny aan die verderflikheid vrygemaak sal word en die glorieryke vryheid van die kinders van God sal hê”.—Romeine 8:21.
Intussen moet almal wat God wil behaag, by sy regverdige standaarde bly. Ware Christene kies om God te dien—nie om in ooreenstemming met hulle eie selfsugtige neigings op te tree nie. Diegene wat hulle op alle gebiede van die lewe nederig aan God se wil onderwerp, sal met ewige vreugde en geluk beloon word.—Psalm 128:1; Johannes 17:3.
[Lokteks op bladsy 13]
In sake wat met seksualiteit verband hou, het God spesifieke riglyne gegee
[Lokteks op bladsy 14]
Party Christene in die eerste-eeuse gemeente in Korinte was voorheen ‘mans wat vir onnatuurlike doeleindes aangehou is’ en ‘mans wat by mans gelê het’. Maar hulle het verander
[Prent op bladsy 15]
Bybelstudie help ’n mens om hoë sedelike standaarde aan te kweek