Van ons lesers

Wanvoeding Ek het die reeks “Wanvoeding—‘die stille noodtoestand’ (22 Februarie 2003) met baie belangstelling gelees. In Japan het ons nie eintlik so ’n probleem nie, en dus was ek baie verbaas oor wat ek gelees het. Ek hoop dat die goeie nuus van God se Koninkryk in groter mate verkondig kan word aan mense wat weens wanvoeding ly.

J. T., Japan

Musiekvideo’s Ek kry soms julle tydskrifte van ’n vriend wat een van Jehovah se Getuies is. Ek het gedink die artikel “Jongmense vra . . . Behoort ek na musiekvideo’s te kyk?” (22 Februarie 2003) is baie goed geskryf. Dit was nogal spesifiek en het die gevare uitgewys wat in moderne musiek skuil.

M. M., Japan

Toe ek die artikel gekry het, het ek dit dadelik deurgelees. Baie van my vriende kyk na musiekvideo’s, en hulle is lief om daaroor te praat. Die artikel het my gehelp om nie te swig voor die versoeking om daarna te kyk nie. Ek is 12 jaar oud, en die artikel het net op die regte tyd vir my gekom.

K. W., Verenigde State

Ek het die artikel regtig geniet. Ek is ’n voltydse bedienaar en weet dat dit belangrik is om ’n goeie voorbeeld vir ander jongmense te stel. Wanneer jongmense my dus nou vra waarom ek nie ’n sekere musiekvideo gesien het nie, kan ek sê dit is omdat ek nie my verhouding met Jehovah wil skaad nie. Hou asseblief aan om leersame “Jongmense vra . . . ”-artikels te druk.

R. B., Verenigde State

Ek is amper 21, en ek geniet dit om musiekvideo’s te kyk. Julle is egter korrek wanneer julle sê dat hierdie video’s ’n uitwerking het op diegene wat daarna kyk. Jongmense hou dikwels van ’n liedjie weens die wysie of ritme, maar hulle skenk nie altyd aandag aan die woorde nie. Dit is veral die geval wanneer die woorde in ’n vreemde taal is. Die video’s verraai dikwels watter boodskap daardie musiek eintlik oordra. Ek is baie keer verras om die video te sien van ’n liedjie wat ek gedink het, gepas is! Wanneer ek ’n verderflike video sien, verander ek van kanaal en luister ek nie weer na daardie liedjie nie.

T. G., Frankryk

Wildebeeste Ek het regtig van die artikel “Die groot migrasie” (22 Februarie 2003) gehou. Ek is lief vir diere, en wanneer ’n nuwe nommer van die Ontwaak! verskyn, sal ek heel eerste enige artikels oor hulle lees. Ek was verbaas om te lees dat wanneer gevaar dreig, die koei die geboorteproses kan onderbreek en dit later op ’n veiliger plek en tyd voltooi! Hou asseblief aan om hierdie pragtige artikels te publiseer.

K. R., Italië

Onvergeeflike sonde Ek weet nie hoe om my dankbaarheid teenoor Jehovah en teenoor julle uit te spreek nie vir die artikel “Die Bybelse beskouing: Is daar ’n onvergeeflike sonde?” (8 Februarie 2003). Ek is al ’n geruime tyd op soek na sulke inligting. Ek het Hebreërs 10:26 probeer verstaan, en ek het gedink dat dit net van toepassing is op die 144 000, wat hemel toe gaan. Dankie dat julle dit duidelik gemaak het.

R. A. P., Ghana

Sirië Ek het die oorspronklike manier waarop die artikel “Sirië—spore van ’n interessante verlede” (8 Februarie 2003) aangebied is, werklik waardeer. Aangesien ek baie in geskiedenis en geografie belangstel, het ek dit interessant gevind om Bybelverse met ’n presiese plek op die kaart te kan verbind. Ek hoop dat julle ander soortgelyke artikels sal publiseer.

M. P., Frankryk

[Foto-erkenning op bladsy 30]

UN/DPI Photo by Eskinder Debebe