Van ons lesers

Wonderlike sintuie Ek is 15 jaar oud en lees julle tydskrifte al vandat ek kan lees. Dankie vir die reeks “Jou wonderlike sintuie—Waardeer jy dit?” (8 Maart 2003). Die artikels was baie interessant. Dankie vir julle harde werk en die navorsing wat julle vir elke Ontwaak! doen. Ek kan nie wag om die volgende een te lees nie!

H. S., Verenigde State

Hierdie reeks het my vir die eerste keer regtig laat besef hoe kompleks ons is. Ek was verbaas om uit te vind dat die mens se vingerpunt ’n puntjie kan voel wat net drie mikron hoog is! Jehovah moet regtig vir sy skeppingswerke omgee as hy soveel aandag aan iets so kleins gegee het.

E. R., Australië

Spaanse martelaar Ek wil julle hartlik bedank vir die artikel “’n Man wat gekies het om God te gehoorsaam” (8 Maart 2003). Dit het my diep getref toe ek gelees het hoe Antonio Gargallo, wat net 19 jaar oud en ’n pas gedoopte Christen was, sy onkreukbaarheid gehandhaaf het toe hy skielik so ’n ernstige besluit moes neem. Dit het my laat besef hoeveel krag en innerlike vrede Jehovah ons kan gee as ons vasbeslote is om sy wil te doen.

M. T., Italië

Baie dankie vir hierdie kort maar kragtige ondervinding. Die trane het oor my wange gerol terwyl ek dit gelees het. Wat my hart veral geraak het, was die brief wat Antonio Gargallo aan sy ma en suster geskryf het voor hy tereggestel is. Hou asseblief aan om te skryf oor Christene wat hulle onkreukbaarheid teenoor Jehovah gehandhaaf het toe hulle voor die dood te staan gekom het sodat dit ons geloof kan versterk.

R. O., Nigerië

Skoene Dankie vir die artikel “Is jou skoene werklik gemaklik?” (8 Maart 2003). Ek ondervind al jare lank voetprobleme en het verskeie klein toonoperasies gehad. Ek het uiteindelik uitgevind dat een van my voete effens groter is as die ander een. Omdat ek jare lank die verkeerde skoengrootte gedra het, moet ek nou ortopediese skoene dra.

R. G., Verenigde State

Dit was ’n baie goeie artikel. Maar iets wat julle nie genoem het nie, is dat die beste tyd van die dag om skoene te koop gewoonlik in die laatmiddag is, wanneer voete meer geneig is om te swel.

A. W., Kanada

“Ontwaak!” antwoord: Dankie vir jou opmerking. Sien asseblief die brokkie “Gesondheidsprobleme aan skoene gekoppel” wat in ons nommer van 8 Augustus 1999 in “Ons beskou die wêreld” verskyn het.

Afkykery Ek wil my waardering uitspreek vir die artikel “Jongmense vra . . . Wat is daarmee verkeerd om af te kyk?” (22 Januarie 2003). Ek is ’n universiteitstudent en het sedert ek in graad vyf was die gewoonte gehad om af te kyk. Ek het altyd gewonder of dit reg is om af te kyk, maar ek kon nooit ’n antwoord kry nie. Hierdie artikel is dus ’n ware skat. Ek gaan van my volgende toets af, waarvoor ek nou besig is om te leer, nie meer afkyk nie.

S. Y., die Oekraïne

Kinderprostitusie Dankie vir die reeks “Kinderprostitusie—’n tragiese werklikheid” (8 Februarie 2003). Dit was vir my besonder hartroerend dat die slagoffers hoop gegee is, al is dit so ’n hartverskeurende onderwerp. Die gevallestudies wat julle genoem het, weerspieël my persoonlike ondervinding. Dit toon dat die wonde van verskriklike trauma, selfs in hierdie ou stelsel, tot ’n groot mate genees kan word—met Jehovah se hulp.

P. R., Duitsland