Van ons lesers

Kinders—Word hulle te gou groot? Die reeks “Kinders—Word hulle te gou groot?” (22 April 2003) is baie goed geskryf. Dit het my gehelp om te verstaan waarom ek sekere probleme ondervind het. Ek het ’n hartseer kinderlewe gehad, en ek moet saamstem dat dit verstandig is om kinders toe te laat om teen hulle eie pas groot te word.

S. M., Japan

Die reeks het my hart werklik geraak. Ek het in ’n enkelouergesin grootgeword. Ek het nagte wakker gelê en luister hoe my ma huil weens al haar sorge. As dit nie vir die Christengemeente was nie, weet ek nie wat van my sou geword het nie. Dankie vir julle liefdevolle pogings om ons geestelik te voed.

D. B., Verenigde State

Ek is 11 jaar oud, en ek wou nog altyd vinnig grootword. Hierdie reeks het vir my gewys hoe belangrik dit is om my kinderjare te waardeer terwyl ek dit nog het.

G. M., Verenigde State

Ek kan my vereenselwig met die verhaal van Carmen en haar suster in die artikel. Hoewel ek nie soos hulle van die huis af weggeloop het nie, het ek stiefpa’s gehad wat my mishandel het en my ma het my verwaarloos. Aangesien my ouers ’n dwelmprobleem gehad het, moes ek my jonger boeties grootmaak, en dít toe ek maar net tien jaar oud was! Dit het natuurlik daartoe gelei dat ek ook probleme gehad het. Ek is Jehovah ewig dankbaar vir die hulp wat ek deur die jare heen ontvang het.

D. S., Verenigde State

Krimpvarkie Ek is die bestuurshoof van die Britse Vereniging vir die Bewaring van Krimpvarkies, en ek was verheug om die wonderlike artikel “Die doring van die diereryk” (22 April 2003) te lees. Dit is pragtig geskryf en is feitelik akkuraat—anders as baie artikels in ander publikasies.

F. V., Brittanje

Baie dankie vir die Ontwaak! My ma sê altyd dat ek die tydskrifte moet lees. As ek eers begin lees, sit ek die tydskrif eers ná ’n uur of wat neer. Dit bevat baie artikels wat ek geniet, soos “Die doring van die diereryk”. Ek is 15 jaar oud. Hou aan met julle uitstekende werk!

K. G., Verenigde State

Aanneming Dankie vir die tydige artikel “Jongmense vra . . . Waarom moes ék ’n aangenome kind wees?” (22 April 2003). My dogter moes haar baba laat aanneem weens haar omstandighede, en dit het my gewete baie gekwel. Hierdie inligting het op net die regte tyd gekom. Ek het die artikel vir my dogter gestuur.

E. D., Guyana

Ek skryf om julle hartlik te bedank vir die tydige artikels oor aanneming in die nommers van 22 April en 22 Mei. Ek en my man het onlangs ’n babaseuntjie aangeneem. Ons sal mettertyd hierdie twee artikels gebruik om ons seun te help om te weet en te verstaan hoe lief Jehovah God sowel as ek en sy pa hom werklik het.

S. R., Verenigde State

Baie, baie dankie vir die artikel oor aanneming. Ek is 47 jaar oud en worstel steeds hiermee. My aanneemouers—wat ek respekteer en baie liefhet—kon nie my behoefte aan liefde en geneentheid bevredig nie. Ek is nooit werklik drukkies gegee of gesoen nie, selfs al het ek daarvoor gevra. Hierdie verwerping was vir my moeilik. Hoe dit ook al sy, die artikel was werklik baie vertroostend en bemoedigend.

D. H., Verenigde State