Wees stiptelik!

“LAATKOMMERY is ’n chroniese probleem onder hoof- uitvoerende beamptes”, berig USA Today. “Hulle kom laat vir ses uit 10 vergaderinge”, voeg dit by na aanleiding van ’n opname onder 2 700 hoof- uitvoerende beamptes.

In die sakewêreld word laatkommery nie net as slegte maniere beskou nie. In ’n studie van 81 000 mense wat vir werk aansoek gedoen het, is bevind dat “verlore tyd as gevolg van laatkommery en afwesigheid sonder toestemming ’n vername rede is vir ’n verlies aan inkomste”. Dit is natuurlik nie net in die sakewêreld dat laatkommery probleme veroorsaak nie. ’n Opname onder skoolhoofde van hoërskole het getoon dat “leerlinge se laatkommery die vernaamste en algemeenste dissiplineprobleem is”.

Ons Skepper wou hê dat ons tydsbewus moet wees. Hy het “die twee groot ligte”—die son en die maan—geskep om ons te help om tyd te meet (Genesis 1:14-16). Deesdae kan ons met behulp van moderne horlosies ons tyd in minute en sekondes meet. Ten spyte van tegnologie is dit egter vir baie van ons steeds ’n probleem om stiptelik te wees—vir werk, skool of ander belangrike afsprake.

Is die probleem noodwendig ’n tekort aan tyd? Die eise wat werk en ’n gesin stel, kan weliswaar oorweldigend wees. Nietemin sê ’n werkende moeder genaamd Wanda Rosseland: “Ek het opgehou om te kerm oor ’n tekort aan tyd toe ek besef dat ons almal 24 uur per dag het. Ek het daaroor gedink en tot die slotsom gekom dat die probleem nie ’n tekort aan tyd is nie, maar die feit dat ons soveel onderbrekings en afleidings in ons moderne wêreld het.”

Kyk byvoorbeeld ook na Renee,a ’n moeder van vyf wat een van Jehovah se Getuies is. Sy sê: “Toe my kinders klein was, was dit ’n uitdaging om hulle vir skool en Christelike vergaderinge gereed te kry. Tog was ek altyd stiptelik. Maar noudat hulle almal groot is, het ek die slegte gewoonte ontwikkel om laat te wees.” Het jý ook hierdie slegte gewoonte? Indien wel, is dit moontlik om te verander! Hier is ’n paar dinge wat jy kan doen.

● DINK AAN DIE GEVOLGE. Chroniese laatkommery lyk dalk na iets onbelangriks. Maar dink aan die Bybel se woorde: “Dooie vlieë laat die olie van die salfmaker stink en borrel. Dit is wat ’n bietjie dwaasheid aan iemand doen wat kosbaar is weens wysheid en heerlikheid” (Prediker 10:1). Ja, net “’n bietjie dwaasheid” in die vorm van onbedagsaamheid teenoor ander kan ons reputasie by ’n onderwyser of ’n werkgewer skend.

Terwyl ’n vrou genaamd Marie ’n paar kursusse by ’n plaaslike kollege gevolg het, het sy opgemerk dat sommige van haar klasmaats “hulle glad nie aan tyd gesteur het nie” en dikwels laat was vir hulle klasse. “Maar hulle moes gou verander,” sê sy. “Twee van die professors was baie gesteld op stiptelikheid. As enige student dus net ’n paar minute laat was, is hy as afwesig aangeteken. En as jy ’n sekere aantal kere afwesig was, het jy gedruip.”

Chroniese laatkommery kan ook jou reputasie by vriende en portuurs skend. ’n Middeljarige man genaamd Joseph onthou ’n mede-Christen wat hy dekades gelede geken het. Hoewel hierdie man gerespekteer is vir sy onderrigtingsvermoë, het hy ’n hinderlike swakheid gehad. “Hy was altyd laat”, sê Joseph. “Ek bedoel laat vir alles! En dit het nie gelyk asof dit hom pla nie. Mense het grappe gemaak oor sy laatkommery.” Het mense al na jou begin verwys as iemand wat altyd laat is? Indien wel, kan hulle maklik jou goeie eienskappe miskyk.

● NEEM ANDER IN AG. Om laat te wees, is ongemanierd en steurend vir ander. En dit kan die indruk skep dat jy ’n meerderwaardige houding het. ’n Sakeman het verduidelik waarom so baie topbestuurders geneig is om laat te wees vir vergaderings en gesê: “Die meeste van ons is eenvoudig arrogant.” In teenstelling hiermee behandel Christene ander as hulle meerdere (Filippense 2:3). Hulle pas ook die gulde reël toe en behandel ander soos hulle graag behandel wil word (Matteus 7:12). Irriteer dit jou nie as jy vir ander moet wag nie? Moet dan nie dat ander vir jou wag nie.

● LEER HOE OM JOU TYD GOED TE BENUT. Stel jy dinge uit en skarrel jy dan op die nippertjie rond? Probeer jy om te veel dinge in te min tyd te doen? Die beginsel in Prediker 3:1 kan nuttig wees: “Vir alles is daar ’n vasgestelde tyd.” As jy “’n vasgestelde tyd” vir dinge het, stel dit jou in staat om dit op ’n ordelike wyse te doen.

Maak eerstens ’n lys van al die dinge wat jy moet doen. Dan moet jy die beginsel in Filippense 1:10 volg deur “seker [te] maak van die belangriker dinge”. Ja, besluit wat is belangrik. Wat is noodsaaklik om te doen? Watter dinge kan jy maar uitstel en later doen? Bereken laastens hoeveel tyd jy nodig het om dinge gedaan te kry en wanneer jy dit kan doen. Wees realisties en moenie te veel dinge in te min tyd probeer inpas nie.

’n Vrou genaamd Dorothy sê dat haar ouers haar geleer het om stiptelik te wees. Sy sê: “As ons teen 7:30 nm. by ’n Christelike vergadering moes wees, het my ma ons ’n uur en 45 minute voor die tyd gereed begin kry. Ons moes tyd toelaat om aandete te eet, die skottelgoed te was, aan te trek en na die vergadering te ry. Dit het eenvoudig ’n normale deel van ons lewe geword om stiptelik te wees.” Dit help soms om tyd toe te laat vir onverwagte gebeure. Dorothy onthou: “Ek moes onlangs ’n paar mense vir die vergadering optel. Op pad het ek ’n pap wiel gekry. Ek het dit laat regmaak en hulle nog steeds betyds opgetel. Jy sien, ek laat altyd tyd toe ingeval ek probleme met my motor het of swaar verkeer teëkom.”

● KRY WENKE VAN ANDER. Die Bybel sê in Spreuke 27:17: “Deur yster word yster geslyp. So slyp een man die aangesig van ’n ander.” In ooreenstemming met hierdie beginsel kan jy gerus met ander praat wat dieselfde omstandighede as jy het—maar wat dit regkry om stiptelik te wees. Hulle sal dikwels ’n hele paar nuttige wenke hê.

Renee, wat vroeër aangehaal is, is vasbeslote om nie meer laat te kom nie. Sy sê: “Ek het my onlangs voorgeneem om te verbeter. Hoewel dit nie maklik is nie, is ek besig om vordering te maak.” Jy kan ook. Met die regte gesindheid en met inspanning kán jy leer om stiptelik te wees!

[Voetnoot]

[Prente op bladsy 24]

Chroniese laatkommery kan ’n swak indruk skep by werkgewers en openbaar onbedag-saamheid teenoor ander

[Prent op bladsy 25]

Goeie persoonlike organisasie kan jou help om nie tyd te verkwis nie