Van ons lesers
Weerstandbiedende kieme Ek lees julle tydskrif met groot belangstelling. Ek het veral gehou van die reeks “Weerstandbiedende kieme—’n wêreldwye gevaar” (22 Oktober 2003). Ek wil baie graag julle tydskrif in die toekoms ontvang en ook die Bybel saam met Jehovah se Getuies studeer.
J. G., Rusland
Ouers se skaduwee Baie dankie vir die artikel “Jongmense vra . . . Wat kan ek doen om nie meer in my ouers se skaduwee te lewe nie?” (22 Oktober 2003). My pa is ’n ouer man in ’n gemeente van Jehovah se Getuies, en ek is nog altyd beskou as ’n goeie voorbeeld om na te volg. Ek wou in opstand kom om my eie identiteit te behou. Danksy hierdie artikel het ek geleer dat ek later spyt sou wees. Ek besef nou dat ek vir my ’n goeie naam in die gemeente moet maak en dat ek net myself moet wees.
L. D., Frankryk
Ek verstaan die gevoelens van die jongmense wat in die artikel aangehaal word. In die verlede was ek oorbewus daarvan dat die gemeente baie van my verwag omdat my pa en oom so bekend is. My familienaam was soos ’n handelsnaam op ’n produk wat my gevolg het waar ek ook al gaan. Wanneer ek nie aan die verwagtinge kon voldoen nie, het ek soos ’n mislukking gevoel. Maar ek leer nou dat Jehovah se beskouing van ons die belangrikste is.
S. S., Japan
God se naam In 1983 het ek vir my kinders ’n boek oor Hawaii gekoop. Dit het vertel van hoe ’n hoofman se vrou in omstreeks die jaar 1800 oor haar God, Jehovah, getuig het. In Slowakye, wat ’n sosialistiese land was, was dit destyds baie ongewoon om God se naam in gepubliseerde lektuur te lees. En dit was jare lank vir ons ’n raaisel hoe die hoofman se vrou God se naam destyds kon geken het. Ons was dus verheug om die verduideliking in die artikel “Jehovah se naam op die eilande van die Stille Oseaan” (22 Oktober 2003) te lees.
E. G., Slowakye
Sendeling in Afrika Ek het die lewensverhaal van Ernest Pandachuk, “My grondslag vir ’n doelgerigte lewe” (22 Oktober 2003), baie waardeer. Ek het met verskeie probleme te kampe, soos die feit dat ek my seun alleen moet grootmaak en met swak gesondheid sukkel. Maar in vergelyking met wat ons Christenbroers in Afrika deurmaak, is my probleme nie so erg nie. Die artikel het my geraak en my beweeg om na te dink oor Jesus se belofte in Matteus 6:33 dat Jehovah sal sorg vir dié wat eers die Koninkryk soek.
M. C., Rusland
Ons beskou die wêreld Ek wil my waardering uitspreek vir die deel “Ons beskou die wêreld”. Dit is die deel van die tydskrif wat ek altyd eerste lees, en ek kan nie wag om die prentjies te sien nie. Die tekeninge moedig my aan om oor onderwerpe te lees wat ek nie normaalweg sou lees nie—byvoorbeeld die brokkie “Lawaaierige visse” in die Ontwaak! van 22 Oktober 2003. Dit was skreeusnaaks!
N. N., Verenigde State
In die brokkie “Beskerming teen muskiete” in “Ons beskou die wêreld” (8 Augustus 2003) verwys julle na ’n verslag wat aanbeveel dat “300 milligram vitamien B1 daagliks” geneem word. ’n Daaglikse inname van hierdie hoeveelheid sal ’n nadelige uitwerking op die liggaam hê.
H. M., Japan
“Ontwaak!” antwoord: Kenners stem nie almal saam oor hoeveel vitamien B1 (tiamien) skadelik is nie. Party beveel ’n daaglikse inname van so min as 1,1 milligram aan. Maar ’n verslag wat deur die Wêreldgesondheidsorganisasie uitgegee is, sê na aanleiding van sommige verslae dat “mondelinge dosisse van 500 mg wat ’n maand lank daagliks geneem is, onskadelik was”. Hoe dit ook al sy, daar sal ongetwyfeld nog navorsing hieroor gedoen word.