Van ons lesers

Kinders Toe ek die reeks “Kinders—Wat hulle van hulle ouers nodig het” (22 Desember 2003) ontvang het, het ek dit onmiddellik verslind. As ’n moeder van vyf, is my hart diep geraak deur daardie artikels. Ek wens dat alle moeders in die wêreld dit kon lees.

C. M., Frankryk

Julle artikels is altyd baie tydig. Toe ek en my man uitgevind het dat ons ’n baba gaan hê, het julle inligting oor swanger vroue gepubliseer (8 Januarie 2003). Noudat ons die gelukkige ouers van ’n drie maande oue seuntjie is, het julle wonderlike wenke oor die grootmaak van kinders gepubliseer. Hierdie artikels is vir ’n jong moeder baie nuttig.

D. K., Pole

Lewensverhaal Ek wil vir julle dankie sê vir al julle artikels, maar ek geniet veral die lewensverhale. Die verhaal van Eileen Brumbaugh, “Kleredrag en persoonsversorging was my struikelblok” (22 Desember 2003), het my hart geroer. Wat ’n opregte begeerte het sy tog gehad om die ware geloof te vind!

L. M., Rusland

Ek het veral in Eileen Brumbaugh se verhaal belanggestel omdat daar baie Amiese en Mennonitiese gesinne in ons gebied is. In die verlede het ek gedink dat dit tevergeefs is om met hulle oor die Bybel te praat omdat dit lyk of hulle so oortuig is van hulle geloof. Uit haar ondervinding kan ek sien dat ons, deur persoonlike aandag en opregte belangstelling te toon, alle soorte mense kan help om tot juiste kennis van God te kom.

M. H., Verenigde State

Ek het ook met die gedagte geworstel dat grimering en juwele baie “wêrelds” is. Dit was die ongeveinsde liefde onder Jehovah se Getuies sowel as hulle respek vir die Heilige Skrif wat my gehelp het om nie na hulle uiterlike voorkoms te kyk nie.

A. C., Verenigde State

Kruiemedisyne Ek het dit geniet om die artikel “Kruiemedisyne—Kan dit jou help?” (22 Desember 2003) te lees. Ek is ’n geregistreerde verpleegster, en ek gebruik ’n verskeidenheid natuurlike middels vir my gewrigte. Ek het gevind dat dit my baie help. Julle het egter nie gemeld dat sommige kruie uitermatige bloeding tydens ’n operasie kan veroorsaak nie. Dit is belangrik vir Jehovah se Getuies om te weet dat die gebruik van sekere kruie voor ’n operasie gestaak moet word.

J. H., Verenigde State

“Ontwaak!” antwoord: Ons waardeer hierdie belangrike herinnering. Dit is noodsaaklik dat ’n pasiënt sy dokter voor ’n operasie inlig oor alle medisyne wat hy gebruik—met inbegrip van kruie. Dit is veral belangrik vir diegene wat die Bybel se gebod gehoorsaam om ‘hulle van bloed te onthou’.—Handelinge 15:29.

Openbare spreekkuns Ek het dit werklik geniet om die artikel “Jongmense vra . . . Hoe kan ek ’n suksesvolle openbare spreker wees?” (22 Desember 2003) te lees. Ek werk al tien jaar lank as ’n joernalis, maar ek raak nog steeds ’n bietjie senuweeagtig wanneer ek ’n aanbieding voor ’n groot groep mense moet doen. Selfs met al die sekulêre opleiding wat ek gekry het, vergelyk niks met die uitstekende onderrigting wat ek ontvang het as ’n student op die Teokratiese Bedieningskool nie, wat by Koninkryksale van Jehovah se Getuies aangebied word. Hierdie opleiding het my nie net gehelp om in die deur-tot-deur-bediening te verbeter nie, maar ook om in my sekulêre werk welslae te behaal.

L. B., Verenigde State