Binnekort—’n Einde aan alle rampe

“Kinders en kindskinders. Luister! . . . Vroeër of later gaan hierdie berg aan die brand slaan. Maar voordat dit gebeur, sal daar ’n gebrom en ’n gebrul en aardbewings wees. Rook en vlamme en weerlig sal uitskiet; die lug sal bewe en dreun en loei. Vlug terwyl julle nog kan . . . As julle dit minag, as julle wêreldse besittings vir julle kosbaarder is as julle lewe, sal dit julle straf vir julle onverskilligheid en gierigheid. Moet julle nie kwel oor julle huis of haard nie, maar vlug sonder versuim.”

DAARDIE waarskuwing, uit die boek Earth Shock deur Andrew Robinson, is gegraveer op ’n gedenkplaat in Portici—’n dorp aan die voet van die berg Vesuvius in Italië—nadat die vulkaan in 1631 uitgebars het. Die uitbarsting het meer as 4 000 lewens geëis. “Ironies genoeg”, sê Robinson, “dit was hierdie uitbarsting in 1631 . . . wat Vesuvius so alombekend laat word het.” Hoe so? Die herbouing van Portici het tot die ontdekking van Herkulaneum en Pompeji gelei. Albei stede is onder die as begrawe toe Vesuvius in 79 G.J. uitgebars het.

Plinius die Jongere, ’n Romein wat daardie ramp oorleef en later goewerneur geword het, het geskryf van vreemde waarskuwende skuddings. Hy, sy moeder en ander het op die waarskuwing gereageer en bly lewe.

’n Waarskuwingsteken vir ons tyd

Die einde van die ekonomiese, maatskaplike en politieke wêreldstelsels kom vinnig nader. Hoe weet ons dit? Want Jesus Christus het ’n hele aantal verwikkelinge in die wêreld voorspel wat ’n teken sou voorsien dat God se dag van afrekening naby is. Soos ’n vulkaan wat dreun, rook uitblaas en as uitspu, sluit daardie saamgestelde teken groot oorloë, aardbewings, hongersnode en pessiektes in—dinge wat die wêreld sedert 1914 op ’n ongeëwenaarde skaal geteister het.—Matteus 24:3-8; Lukas 21:10, 11; Openbaring 6:1-8.

Maar Jesus se waarskuwingsteken bevat ook ’n boodskap van hoop. “Hierdie goeie nuus van die koninkryk”, het hy gesê, “sal in die hele bewoonde aarde verkondig word as ’n getuienis vir al die nasies; en dan sal die einde kom” (Matteus 24:14). Let op dat Jesus die Koninkryksboodskap “goeie nuus” noem. Dit is inderdaad goeie nuus, want God se Koninkryk, ’n hemelse regering in die hande van Christus Jesus, sal al die skade wat die mens aangerig het, ongedaan maak. Daarbenewens sal dit alle natuurrampe tot ’n einde bring.—Lukas 4:43; Openbaring 21:3, 4.

Trouens, Jesus het as ’n mens op die aarde sy krag oor die elemente getoon deur ’n lewensgevaarlike storm te laat bedaar. Sy vreesbevange dissipels het met ontsag gesê: “Wie is hy tog, want hy beveel selfs die winde en die water, en dit gehoorsaam hom?” (Lukas 8:22-25). Vandag is Jesus nie net ’n blote mens nie, maar ’n magtige geespersoon. Daarom sal dit glad nie vir hom moeilik wees om die natuurelemente te beheer sodat dit sy onderdane geen leed aandoen nie!—Psalm 2:6-9; Openbaring 11:15.

Party beskou dit dalk as wensdenkery. Maar onthou dat Bybelprofesieë—anders as mense se beloftes en voorspellings—nog altyd bewaarheid is, en dit sluit die profesieë in wat sedert 1914 vervul is (Jesaja 46:10; 55:10, 11). Ja, die aarde se vreedsame toekoms is gewaarborg. Ons toekoms sal ook gewaarborg wees as ons God se Woord ter harte neem en ag slaan op die liefdevolle waarskuwing daarin aangaande die aardskuddende gebeure wat binnekort gaan plaasvind.—Matteus 24:42, 44; Johannes 17:3.

[Venster/Prent op bladsy 11]

WATTER HOOP VIR ONS GELIEFDES WAT GESTERF HET?

WANNEER ons ’n geliefde aan die dood afstaan, kan ons oorweldig word deur hartseer. Die Bybel sê dat Jesus gehuil het toe sy geliefde vriend Lasarus gesterf het. Tog het Jesus net ’n paar minute later ’n verstommende wonderwerk verrig—hy het Lasarus weer lewend gemaak! (Johannes 11:32-44). Sodoende het hy die hele mensdom ’n vaste grondslag gegee vir geloof in die wonderlike belofte wat hy vroeër in sy bediening gemaak het, toe hy gesê het: “Die uur kom waarin almal wat in die gedenkgrafte is, [Jesus se] stem sal hoor en sal uitkom” (Johannes 5:28, 29). Mag die kosbare hoop om ’n opstanding tot lewe op ’n paradysaarde te ontvang, almal vertroos wat geliefdes aan die dood afgestaan het.—Handelinge 24:15.

[Prente op bladsy 10]

Slaan jy ag op die waarskuwing dat dit die laaste dae van hierdie wêreld is?

[Foto-erkenning op bladsy 10]

USGS, David A. Johnston, Cascades Volcano Observatory