Die Bybel se beskouing

Was Jesus werklik die Seun van God?

MET vaste oortuiging het die apostel Petrus vir Jesus gesê: “U is die Christus, die Seun van die lewende God” (Matteus 16:16). Dit is maar net een van die talle plekke waar die Bybel na Jesus as die Seun van God verwys, ’n stelling wat al ’n wye verskeidenheid reaksies onder godsdienstige mense uitgelok het.

Baie mense wat glo dat Jesus Christus God is, vind dit moeilik om te verduidelik waarom hy die Seun van God genoem word. Logies gesproke kan hy nie albei wees nie. Ander dink aan Jesus as ’n belangrike geskiedkundige persoon, ’n wyse man, of dalk selfs ’n ware profeet van God, maar niks meer as dit nie. Wat leer die Bybel werklik? Maak dit saak wat jy glo?

God se eersgeborene

Die Bybel toon dat daar ’n tyd was toe God alleen was. Uit liefde het hy besluit om die gawe van lewe met ander te deel deur ’n vader te word—maar nie in die menslike sin nie. Jehovah het eerder sy ondeurgrondelike skeppingskrag gebruik om ’n lewende, intelligente geespersoon te skep—“die begin van die skepping deur God”, wat ons vandag as Jesus Christus ken (Openbaring 3:14; Spreuke 8:22). Omdat Jesus direk deur God geskep is toe God heeltemal alleen was, word Jesus tereg die “enigverwekte seun” en “die eersgeborene van die hele skepping” genoem.—Johannes 1:14; Kolossense 1:15.

Dit is dus duidelik dat Jesus, as God se heel eerste skepping, nie die Skepper, “die enigste God”, kan wees nie (1 Timoteus 1:17). Aan die ander kant het God sy Seun talle voorregte gegee. Deur middel van Jesus het God byvoorbeeld “alle ander dinge”, waaronder selfs die engele, geskep. Hierdie engele word “seuns van God” genoem, aangesien Jehovah ook húlle Lewegewer is.—Kolossense 1:16; Job 1:6; 38:7.

Nadat God die aarde voorberei het sodat mense daarop kon woon, het hy hierdie woorde blykbaar vir sy eersgebore Seun gesê: “Laat ons mense maak na ons beeld” (Genesis 1:26; Spreuke 8:22-31). Jehovah het dus ook die eerste menseseun van God, Adam, geskep deur middel van die geesskepsel wat later Jesus geword het.—Lukas 3:38.

Jesus word ’n menseseun van God

Die apostel Johannes sê dat God se geesseun op die bestemde tyd “vlees geword en onder ons gewoon” het (Johannes 1:14). Om dit moontlik te maak, het God op wonderdadige wyse Jesus se lewe uit die hemel na die baarmoeder van die Joodse maagd Maria oorgeplaas. Jesus was dus nog steeds God se Seun, al was hy ’n mens. En aangesien God, en nie enige mens nie, Jesus die lewe gegee het, was Jesus volmaak gebore, sonder sonde. “Wat gebore word, [sal] heilig, God se Seun, genoem word”, het die engel Gabriël vir Maria gesê.—Lukas 1:35; Hebreërs 7:26.

Terwyl Jesus in die vlees was, het die Vader self bevestig dat hy sy Seun is. By Jesus se doop het Johannes die Doper gesien hoe die hemele geopen is en ’n stem uit die hemel hoor sê: “Dit is my Seun, die geliefde, wat ek goedgekeur het” (Matteus 3:16, 17). Geen wonder nie dat Johannes vir sy dissipels gesê het: “Ek het dit gesien, en ek het getuig dat dié een die Seun van God is.”—Johannes 1:34.

Gedurende sy aardse bediening het Jesus nie die feit dat hy die Messias, die Seun van God, is, uitgebasuin nie (Markus 8:29, 30). Hy het mense dikwels self tot daardie slotsom laat kom deur hulle die geleentheid te gee om na sy leringe te luister, te sien hoe hy sy lewe lei en sy talle wonderwerke waar te neem, waarvan die meeste in die openbaar gedoen is. Hy het byvoorbeeld “almal . . . met wie dit sleg gegaan het, wat deur allerhande kwale en pyne gekwel is”, genees (Matteus 4:24, 25; 7:28, 29; 12:15). Die blindes, die dowes, die kreupeles en die siekes het almal na Jesus toe gekom, en hy het hulle genees. Hy het selfs die dooies opgewek! (Matteus 11:4-6). Jesus het voor die oë van die dissipels op wonderdadige wyse op water geloop en die winde en golwe tydens ’n hewige storm laat bedaar. Hierdie demonstrasie van krag het die dissipels beweeg om te sê: “U is werklik God se Seun.”—Matteus 14:24-33.

Hoe God se Seun jou kan help

Waarom het God sy enigverwekte Seun van die hemel af aarde toe laat kom, waar hy uiteindelik ’n wrede dood gesterf het? “Sodat elkeen wat geloof in hom beoefen, nie vernietig sal word nie maar die ewige lewe kan hê” (Johannes 3:16). Ja, slegs deur te sterf, kon Jesus “sy siel . . . gee as ’n losprys in ruil vir baie” (Matteus 20:28). Waarlik, in die hele geskiedenis het niemand groter liefde aan die mensdom geopenbaar as Jehovah en sy eersgebore Seun nie.—Romeine 8:32.

Ná sy dood is Jesus op ’n baie spesiale en magtige manier “as God se Seun verklaar”, “deur middel van ’n opstanding uit die dode” tot lewe as ’n geesseun van God (Romeine 1:4; 1 Petrus 3:18). Nadat Jesus byna 19 eeue geduldig langs sy Vader gewag het, is hy aangestel as Koning van God se Koninkryk—’n hemelse regering wat binnekort oor die hele aarde gaan heers.—Psalm 2:7, 8; Daniël 7:13, 14.

Wil jy die guns van hierdie magtige Seun van God verkry? Indien wel, spoor ons jou aan om sy leringe te ondersoek en dit in jou lewe toe te pas. Jesus self het gesê: “Dít beteken die ewige lewe, dat hulle kennis inneem van u, die enigste ware God, en van die een wat u uitgestuur het, Jesus Christus” (Johannes 17:3). Ja, dit maak wel saak wat ’n mens omtrent die Seun van God glo!—Johannes 3:18; 14:6; 1 Timoteus 6:19.

HET JY AL GEWONDER?

◼ In watter opsig is Jesus die enigverwekte Seun van God?—Johannes 1:3, 14; Openbaring 3:14.

◼ Waarom kan jy glo dat Jesus die Seun van God is?—Matteus 3:16, 17.

◼ Hoe kan jy daarby baat vind as jy glo dat Jesus die Seun van God is?—Johannes 3:16; 14:6; 17:3.

[Prente op bladsy 12, 13]

Jesus se wyse leringe en kragtige wonderwerke het bewys dat hy nie ’n gewone mens was nie