Jongmense vra . . .

Waarom moet ek lees?

“Ek het nie die geduld om te lees nie. Ek sal eerder televisie kyk.”—Margarita, 13, Rusland.

“As ek ’n keuse het tussen boeklees en basketbal speel, sal ek eerder basketbal speel.”—Oscar, 19, Verenigde State.

AS JY die tyd geneem het om tot hiertoe te lees, besef jy waarskynlik dat lees ’n belangrike vaardigheid is om aan te leer. Maar dalk is die vooruitsig om ’n boek of selfs ’n artikel in ’n tydskrif te lees vir jou amper soos om medisyne te drink: Jy weet dit is goed vir jou, maar jy sal verkies om dit nie te doen nie.

Ontwaak! het onderhoude met jongmense uit 11 lande gevoer om uit te vind wat hulle te sê het oor die uitdagings en die voordele van lees. Hier volg wat hulle gesê het:

Waarom is lees vir jou so ’n uitdaging?

“Ek kry selde tyd daarvoor.”—Semsihan, 19, Duitsland.

“Dis harde werk om te lees. Ek dink ek is ’n bietjie lui.”—Ezekiel, 19, Filippyne.

“Ek haat dit wanneer ek gedwing word om oor vervelige onderwerpe te lees.”—Christian, 15, Engeland.

“Ek sal nog ’n dun boek lees, maar ’n dik boek intimideer my.”—Eriko, 18, Japan.

“Ander dinge trek maklik my aandag af. Ek kan nie konsentreer nie.”—Francisco, 13, Suid-Afrika.

Jong Christene word aangemoedig om die Bybel te lees (Psalm 1:1-3). Is dit vir jou moeilik? Indien wel, waarom?

“Die Bybel is so ’n groot boek! Ek dink nie ek sal dit ooit in my leeftyd kan deurlees nie!”—Anna, 13, Rusland.

“Party dele van die Bybel is moeilik en nie baie interessant nie.”—Jezreel, 11, Indië.

“Dis vir my moeilik om die Bybel gereeld te lees omdat my rooster so ongeorganiseerd is.”—Elsa, 19, Engeland.

“Dis vir my moeilik omdat takies by die huis en skoolwerk soveel van my tyd in beslag neem.”—Zurisadai, 14, Mexiko.

“Ek vind dit moeilik om die Bybel te lees omdat ek dit nie kan regkry om minder tyd aan my stokperdjies te bestee nie.”—Sjo, 14, Japan.

Dit is duidelik dat lees ’n uitdaging kan wees. Maar is dit die moeite werd? Hoe het jy al by lees baat gevind?

“Lees het my kennis laat uitbrei, en dit het my groter selfvertroue gegee wanneer ek met mense praat.”—Monisha, 14, Indië.

“Wanneer ek lees, laat dit my ontspan en dink ek nie aan my probleme nie.”—Alison, 17, Australië.

“Lees neem my na plekke wat ek nie andersins sou kon besoek nie.”—Duane, 19, Suid-Afrika.

“Lees help my om dinge self te ondersoek, in plaas daarvan om staat te maak op wat ander my vertel.”—Abihú, 16, Mexiko.

Wat het jou gehelp om lees te geniet?

“Van kleins af het my ouers my aangemoedig om hardop te lees.”—Tanya, 18, Indië.

“My ouers het my aangemoedig om my verbeelding te gebruik terwyl ek lees, om die gebeure te visualiseer.”—Daniel, 18, Engeland.

“My pa het voorgestel dat ek die Bybelboeke begin lees waarvan ek die meeste hou, soos Psalms en Spreuke. Nou geniet ek dit om die Bybel te lees; dis nie meer ’n las nie.”—Charene, 16, Suid-Afrika.

“Teen die tyd dat ek vier was, het my ouers vir my ’n lessenaar en ’n boekrak gegee met al die boeke wat hulle vir my gebêre het vandat ek gebore is.”—Airi, 14, Japan.

Waarom dink jy is dit belangrik om die Bybel te lees?

“Mense glo baie dinge oor die Bybel wat nie waar is nie. Dis baie beter as jy hierdie dinge self kan ondersoek” (Handelinge 17:11).—Matthew, 15, Verenigde State.

“Bybellees verg baie dinkwerk. Maar dit het my gehelp om my duidelik en met vrymoedigheid uit te druk wanneer ek met ander oor my oortuigings praat” (1 Timoteus 4:13).—Jane, 19, Engeland.

“Wanneer ek die Bybel lees, voel dit asof Jehovah self met my praat. Soms raak dit my emosies” (Hebreërs 4:12).—Obadiah, 15, Indië.

“Ek begin dit al hoe meer geniet om die Bybel te lees omdat dit vir my sê wat Jehovah van my dink en my goeie raad gee” (Jesaja 48:17, 18).—Wiktorija, 14, Rusland.

Wanneer kry jy tyd om die Bybel en Bybellektuur te lees?

“Ek het ’n rooster. Ek lees een hoofstuk uit die Bybel sodra ek in die oggend opstaan.”—Lais, 17, Brasilië.

“Ek lees die Bybel en ander Christelike lektuur op die trein op pad skool toe. Ek is al die afgelope vier jaar in hierdie roetine.”—Taitsji, 19, Japan.

“Elke aand voordat ek gaan slaap, lees ek ’n stukkie uit die Bybel.”—Maria, 15, Rusland.

“Ek lees elke dag vier bladsye van ‘Die Wagtoring’ of die ‘Ontwaak!’ Ek kan ’n hele tydskrif deurlees voordat die volgende een kom.”—Eriko, 18, Japan.

“Elke oggend voordat ek skool toe gaan, lees ek die Bybel.”—James, 17, Engeland.

Soos in die kommentare hierbo gesien kan word, kan lees jou groter selfvertroue gee en jou kennis laat uitbrei. Wanneer jy die Bybel en Bybellektuur—insluitende hierdie tydskrif—lees, sal dit jou ook help om ‘nader aan God te kom’ (Jakobus 4:8). Daarom moet jy nooit ophou lees nie, selfs al is dit vir jou ’n uitdaging!

IETS OM OOR TE DINK

◼ Waarom is dit belangrik dat jy God se Woord lees?

◼ Hoe kan jy die ‘tyd uitkoop’ om die Bybel en Bybellektuur te lees?—Efesiërs 5:15, 16.

[Venster op bladsy 16]

SIEN DIE VERBAND

Verbind wat jy lees met wat jy reeds oor jouself en jou milieu weet. Vra jou die volgende vrae af:

◼ Teks met teks Kom die situasies of probleme wat beskryf word, ooreen met dié in ander boeke, tydskrifte of verhale wat ek al gelees het? Het die karakters enige eienskappe in gemeen met ander mense van wie ek al geleer het?

◼ Teks met self Hoe hou hierdie inligting verband met my omstandighede, my kultuur, my dilemmas? Kan ek die inligting gebruik om my te help om my probleme die hoof te bied of om my lewe te verbeter?

◼ Teks met milieu Wat leer hierdie materiaal my omtrent die natuur, die omgewing, verskillende kulture of probleme in die samelewing? Wat leer hierdie inligting my omtrent die Skepper?