Hoe om ’n gelukkige huwelik te bou
“’n Man . . . sal sy vrou aankleef en hulle sal een vlees word.”—GENESIS 2:24.
ONS Maker, Jehovah God, het die huwelik ingestel as ’n permanente verbintenis tussen ’n man en ’n vrou. Genesis 2:18, 22-24 sê: “Jehovah God het verder gesê: ‘Dit is nie goed dat die mens alleen bly nie. Ek gaan vir hom ’n helper maak, as ’n komplement van hom.’ En daarna het Jehovah God die ribbebeen wat hy van die mens geneem het, tot ’n vrou gebou en haar na die mens toe gebring. Toe het die mens gesê: ‘Dit is eindelik been van my gebeente en vlees van my vlees. Sy sal Mannin genoem word, want sy is uit die man geneem.’ Daarom sal ’n man sy vader en sy moeder verlaat, en hy sal sy vrou aankleef en hulle sal een vlees word.”
Dit is weliswaar nie maklik om ’n blywende, gelukkige huwelik te bou nie, maar dit is beslis moontlik. Baie egpare is al 50 jaar, 60 jaar of langer gelukkig getroud. Hoe doen hulle dit? Hulle werk voortdurend en onselfsugtig aan hulle huwelik sodat hulle hulle maat se “goedkeuring kan verkry” (1 Korintiërs 7:33, 34). Dit verg inspanning. As jy bereid is om tyd en moeite daaraan te bestee, kan jy ook ’n gelukkige huwelik bou, een wat lank staande sal bly.
Volg die bouplan noukeurig
’n Betroubare kontrakteur sal nooit ’n bouprojek begin sonder om eers die plan te raadpleeg nie. Net so kan ons ook nie daarin slaag om ’n gelukkige huwelik te bou sonder dat ons God se bouplan vir die projek noukeurig ondersoek nie. Hierdie bouplan word in God se Woord gevind. Die apostel Paulus het geskryf: “Die hele Skrif is deur God geïnspireer en is nuttig . . . om dinge reg te stel.”—2 Timoteus 3:16.
Mans en vrouens kan baie oor die huwelik leer deur te kyk hoe Jesus sy dissipels behandel het. Hoe so? In die Bybel word die verhouding tussen Jesus en diegene wat saam met hom in die hemel gaan regeer, vergelyk met die verhouding tussen ’n man en sy vrou (2 Korintiërs 11:2). Jesus het aan sy metgeselle getrou gebly, selfs in baie moeilike tye. Hy het “hulle tot die einde toe liefgehad” (Johannes 13:1). As ’n simpatieke leier het Jesus altyd sy volgelinge se beperkinge en swakhede in ag geneem. Hy het nooit méér van hulle verwag as wat hulle kon doen of gee nie.—Johannes 16:12.
Selfs toe sy intiemste vriende hom teleurgestel het, het Jesus sagmoedig gebly. Hy het hulle nie berispe nie, maar hulle eerder met godvrugtige nederigheid en goedhartigheid probeer reghelp (Matteus 11:28-30; Markus 14:34-38; Johannes 13:5-17). As jy dus noukeurig let op die tere manier waarop Jesus sy volgelinge behandel het en hoe hulle hom op hulle beurt liefgehad het, sal jy praktiese lesse leer oor hoe om ’n gelukkige huwelik te bou.—1 Petrus 2:21.
Bou op ’n stewige fondament
Dit is onvermydelik dat stormagtige beproewinge die fondament van julle huwelik sal skud. Dit sal die grondslag van jou verhouding met jou huweliksmaat toets. Die stewigste fondament waarop ’n gelukkige huwelik egter gebou kan word, is lojale verbondenheid wat op liefde gegrond is. Jesus het beklemtoon hoe belangrik verbondenheid is, toe hy gesê het: “Niemand mag ’n egpaar wat God saamgevoeg het, skei nie” (Matteus 19:6, Contemporary English Version). Die uitdrukking “niemand” sal die man en sy vrou insluit, wat ’n gelofte afgelê het om aan mekaar getrou te bly.
Sommige beskou verbondenheid dalk as ’n las, die eise en opofferings wat daarmee gepaardgaan, as te veel. Vandag weeg gerief gewoonlik swaarder as die opoffering om aan iemand verbonde te wees.
Wat kan verbondenheid in die huwelik versterk? Die apostel Paulus het geskryf: “Mans [behoort] hulle vrouens lief te hê soos hulle eie liggaam” (Efesiërs 5:28, 29). Om “saamgevoeg” te wees, beteken dus deels dat jy net so besorg oor die welsyn van jou maat is as oor jou eie. Getroude mense moet hulle denke verander van “myne” na “ons s’n” en van “ek” na “ons”.
As jy stormagtige aanvalle op jou huwelik met welslae afweer, sal dit jou wys maak. Wysheid wat so verkry word, kan tot geluk lei. “Gelukkig is die mens wat wysheid gevind het”, sê Spreuke 3:13.
Gebruik vuurvaste materiaal
’n Huis moet goed gebou wees om staande te kan bly en veilig te wees. Neem jou dus voor om jou huwelik met ’n blywende toekoms in gedagte te bou. Gebruik duursame materiaal, die soort wat vurige toetse van jou lojaliteit kan deurstaan. Kosbare eienskappe soos goddelike wysheid, vrygewigheid, onderskeidingsvermoë, vrees vir God, hartlikheid, liefdevolle waardering vir God se wette en ware geloof moet vir jou so waardevol soos goud wees.
Geluk en tevredenheid in die huwelik word nie op materiële besittings of sekulêre vooruitgang gebou nie. Dit word in die hart en die verstand gebou, en hierdie eienskappe word versterk deur die waarhede in die Woord van God. Die vermaning: “Laat elkeen aanhou let op hoe hy . . . bou”, kan ook op die huwelik van toepassing wees.—1 Korintiërs 3:10.
Wanneer probleme ontstaan
’n Gebou het ’n goeie instandhoudingsprogram nodig om die toets van die tyd te deurstaan. Wanneer ’n man en vrou mekaar gereeld in hulle doelwitte ondersteun en mekaar eer en respekteer, bly hulle huwelik sterk. Selfsug sal nie posvat nie, en woede word onder beheer gehou.
Opgekropte woede en frustrasie kan die liefde en geneentheid in ’n huwelik versmoor. Die apostel Paulus het mans gemaan: “Mans, hou aan om julle vrouens lief te hê en moenie vir hulle bitter kwaad wees nie” (Kolossense 3:19). Dieselfde beginsel geld vir vrouens. Wanneer huweliksmaats daarna streef om bedagsaam, goedhartig en simpatiek te wees, dra hulle by tot hulle geluk en tevredenheid. As ’n mens nie humeurig en bakleierig is nie, help dit om konflik te voorkom wanneer daar wel probleme ontstaan. “Word goedhartig teenoor mekaar”, het Paulus gemaan, “vol tere medelye, en vergewe mekaar vryelik.”—Efesiërs 4:32.
Sê nou jy is geïrriteerd omdat jy magteloos of ergerlik voel of meen dat jy nie ten volle waardeer word nie? Sê dan vir jou maat op ’n kalm, duidelike manier waarom jy ongelukkig voel. Maar dit sal dalk beter wees om nietige sake met liefde te bedek.—1 Petrus 4:8.
Een man, wat verskeie beproewinge in sy huwelik van 35 jaar ondervind het, sê dat ’n mens “nooit moet ophou praat nie”, ongeag hoe kwaad jy vir jou maat is. Hy voeg hierdie wyse woorde by: “Moet nooit ophou liefhê nie.”
Jy kan ’n gelukkige huwelik bou!
Dit is weliswaar nie maklik om ’n gelukkige huwelik te bou nie. Maar as huweliksmaats vasbeslote is om hard te werk om God deel van hulle huwelik te maak, sál dit geluk en geborgenheid tot gevolg hê. Let dus noukeurig op julle gesin se geestelikheid; behou ’n rotsvaste verbondenheid aan die huwelik. En onthou, soos Jesus gesê het, dat nie die man of die vrou al die eer vir ’n gelukkige huwelik kan ontvang nie. Dit is eerder die Insteller van die huwelik, Jehovah God, aan wie die eer hoofsaaklik toekom. “Wat God . . . onder een juk saamgevoeg het, moet geen mens skei nie.”—Matteus 19:6.
VERDERE LEESSTOF
Die boek Die geheim van gesinsgeluk, uitgegee deur Jehovah se Getuies, voorsien praktiese wenke om ’n gelukkige en suksesvolle huwelik te bou. Honderdduisende egpare regoor die wêreld het gevind dat die praktiese Bybelraad daarin hulle gehelp het om die gehalte van hulle verhouding te verbeter.—Sien bladsy 32 van hierdie tydskrif.
[Venster op bladsy 9]
Wat kan jou help om ’n gelukkige huwelik te bou?
◼ Bestudeer God se Woord gereeld saam met jou huweliksmaat, en bid tot God vir hulp en leiding om probleme op te los.—Spreuke 3:5, 6; Filippense 4:6, 7; 2 Timoteus 3:16, 17.
◼ Beperk seksuele belangstelling uitsluitlik tot jou maat.—Spreuke 5:15-21; Hebreërs 13:4.
◼ Kommunikeer openhartig, eerlik en liefdevol oor julle probleme en verskille.—Spreuke 15:22; 20:5; 25:11.
◼ Praat met jou maat op ’n vriendelike, bedagsame manier; vermy woedeuitbarstings, ’n geneul en skerp, kritiese aanmerkings.—Spreuke 15:1; 20:3; 21:9; 31:26, 28; Efesiërs 4:31, 32.
◼ Pas Bybelraad nederig toe, al voel jy dat jou maat nie alles doen wat hy of sy moet doen nie.—Romeine 14:12; 1 Petrus 3:1, 2.
◼ Werk hard om die geestelike eienskappe aan te kweek wat in die Bybel gemeld word.—Galasiërs 5:22, 23; Kolossense 3:12-14; 1 Petrus 3:3-6.
[Prente op bladsy 7]
Volg God se bouplan vir die huwelik, soos dit in die Bybel gevind word
[Prent op bladsy 7]
Bou op ’n stewige fondament van onselfsugtige liefde en lojaliteit
[Prente op bladsy 8]
Kweek geestelike eienskappe aan wat vurige toetse kan deurstaan
[Prente op bladsy 8]
’n Goeie huwelik moet in stand gehou word