Waarom laat God lyding toe?

SOMS soek iemand wat die vraag “Waarom?” vra, vertroosting sowel as antwoorde, want wanneer die vraag weens ’n ernstige verlies ontstaan, is daar ’n groot behoefte aan bemoediging. Voorsien die Bybel sulke vertroosting? Kyk na drie belangrike Bybelwaarhede wat met hierdie saak verband hou.

Eerstens is dit nie verkeerd om te vra waarom God lyding toelaat nie. Sommige mense is bekommerd dat dit ’n gebrek aan geloof in God of oneerbiedigheid teenoor hom toon wanneer ’n mens so ’n vraag vra. Inteendeel, as jy daardie vraag uit ’n opregte hart vra, is jy in goeie geselskap. Die getroue profeet Habakuk het God gevra: “Waarom laat u toe dat ek sulke verskriklike onregverdigheid aanskou? Waarom laat u toe dat geweld, wetteloosheid, misdaad en wreedheid oral versprei?” (Habakuk 1:3, Contemporary English Version). Jehovah God het Habakuk nie berispe nie. Hy het eerder daardie getroue man se vrae laat opteken sodat ons almal dit kan lees.—Romeine 15:4.

Tweedens is dit belangrik om te verstaan dat God meegevoel met jou het in jou moeilike situasie. Hy is nie afsydig en geheimsinnig nie; hy “het geregtigheid lief”, en hy verafsku goddeloosheid en die lyding wat dit veroorsaak (Psalm 37:28; Spreuke 6:16-19). In die dae van Noag het God “gekrenk gevoel in sy hart” weens die geweld wat oor die aarde versprei het (Genesis 6:5, 6). God het nie verander nie; hy voel dieselfde oor wat vandag gebeur.—Maleagi 3:6.

Derdens is God nooit die oorsaak van boosheid nie. Die Bybel stel dit baie duidelik. Diegene wat dinge soos moord en terrorisme aan God toeskryf, belaster hom. Let op wat Job 34:10 sê: “Ver is dit van die ware God om goddeloos te handel, en van die Almagtige om onregverdig te handel!” Jakobus 1:13 sê ook: “Laat niemand, wanneer hy beproef word, sê: ‘Ek word deur God beproef’ nie. Want met bose dinge kan God nie beproef word nie, en ook beproef hy self niemand nie.” As jy lyding verduur het, kan jy dus seker wees dat God nie die oorsaak is nie.

Wie heers oor die wêreld?

Die voorgaande laat ons nog steeds met die vraag: As God liefdevol, regverdig en magtig is, waarom word ons dan deur die kwaad omring? Een algemene wanbegrip moet eers uit die weg geruim word. Baie mense dink aan God die Almagtige as die heerser van hierdie wêreld, die een wat regstreeks beheer oor alles uitoefen. “Nie een atoom of molekule in die heelal is buite sy aktiewe beheer nie”, het die hoof van ’n kweekskool gesê. Is dit werklik wat die Bybel leer?

Glad nie. Baie mense is verbaas om uit te vind wat die Bybel werklik sê in verband met wie oor die wêreld heers. Byvoorbeeld, 1 Johannes 5:19 sê: “Die hele wêreld lê in die mag van die bose.” Wie is hierdie bose? Jesus Christus het hom geïdentifiseer as Satan die Duiwel, wat hy “die heerser van die wêreld” genoem het (Johannes 14:30). Maak dit nie sin nie? Satan is wreed, bedrieglik en haatdraend—eienskappe wat die grondliggende oorsaak is van baie van die lyding wat mense ervaar. Maar waarom laat God dan toe dat Satan heers?

’n Geskil wat in Eden geopper is

Hoe sou ’n liefdevolle en bekwame ouer voel as hy in die openbaar daarvan beskuldig word dat hy vir sy kinders leuens vertel, sy gesag oor hulle misbruik en goeie dinge van hulle weerhou? Sou hy daardie lasterlike beskuldigings verkeerd bewys as hy sy beskuldiger fisies aanrand? Natuurlik nie! Trouens, deur so te reageer, sal hy moontlik geloofwaardigheid aan die beskuldigings verleen.

Hierdie illustrasie help om te verduidelik hoe Jehovah God ’n aantyging hanteer wat aan die begin van die mensegeskiedenis teen hom gemaak is in ’n plek met die naam Eden. Daar het God die eerste twee mense, Adam en Eva, ingelig oor ’n wonderlike projek vir sy aardse kinders. Hulle moes die aarde vul, dit onderwerp en die hele aarde in ’n paradys omskep (Genesis 1:28). Bowendien het honderdmiljoene geesseuns van God intens belanggestel in hierdie opwindende projek.—Job 38:4, 7; Daniël 7:10.

Aangesien Jehovah ’n vrygewige God is, het hy Adam en Eva ’n pragtige tuintuiste met allerhande heerlike vrugtesoorte gegee. Net een boom was vir hulle verbode—“die boom van die kennis van goed en kwaad”. Deur nie van hierdie boom te eet nie, sou Adam en Eva toon dat hulle ten volle op hulle Vader vertrou en erken dat hy die reg het om te besluit wat goed en wat sleg is vir sy kinders.—Genesis 2:16, 17.

Ongelukkig het een van God se geesseuns, aangedryf deur die begeerte om self aanbid te word, vir Eva gesê dat sy nie sal sterf as sy die verbode vrug eet nie (Genesis 2:17; 3:1-5). Sodoende het hierdie bose engel, Satan, God skaamteloos weerspreek en hom in werklikheid ’n leuenaar genoem! Satan het God ook daarvan beskuldig dat hy belangrike kennis van Adam en Eva weerhou. Satan het geïmpliseer dat mense self behoort te kan besluit wat goed en wat sleg is. Kortom, Satan het God daarvan beskuldig dat hy ’n onbevoegde Heerser en Vader is en geïmpliseer dat hy, Satan, beter sou vaar.

Deur middel van hierdie listige en kwaadwillige leuens het die engel homself Satan die Duiwel gemaak. Hierdie name beteken “Teenstander” en “Lasteraar”. Wat het Adam en Eva gedoen? Hulle het Satan se kant gekies en hulle rug op God gedraai.—Genesis 3:6.

Jehovah kon die rebelle daar en dan vernietig het. Maar soos in ons illustrasie gemeld is, kan sulke geskille nie besleg word deur gewelddadig wraak te neem nie. Hou ook in gedagte dat miljoene engele gehoor het toe Satan God uitgedaag het. Trouens, ’n groot maar onbekende getal engele het later by Satan in sy opstand aangesluit en hulleself sodoende demone gemaak.—Markus 1:34; 2 Petrus 2:4; Judas 6.

Waarom het God nie ingegryp nie?

Deur Adam en Eva te verlei om onafhanklikheid van hulle Skepper te kies, het Satan as ’t ware die grondslag gelê vir ’n gesin wat nie waarlik onafhanklik is nie, maar wat onder sy gesag is. Hierdie gesin, wat wetend of onwetend beïnvloed word deur hulle “vader”, die Duiwel, sou hulle eie doelwitte en gedragstandaarde stel (Johannes 8:44). Maar sou hierdie lewenswyse ware vryheid en blywende geluk vir hulle meebring? Jehovah het goed geweet dat dit nie sou nie. Nogtans het hy die rebelle toegelaat om hulle onafhanklike weg te volg, aangesien dit die enigste manier was om die geskille wat in Eden geopper is, eens en vir altyd te besleg.

Die mensdom bou nou al meer as 6 000 jaar lank ’n wêreldstelsel van dinge en het allerhande soorte regerings en gedragskodes probeer. Is jy ingenome met die resultate? Is die mensdom werklik gelukkig, vreedsaam en verenig? Die antwoord is ongetwyfeld nee! Die mensdom word eerder deur oorloë, hongersnode, natuurrampe, siekte en die dood geteister, wat “nietigheid”, “pyn” en ‘gekreun’ veroorsaak, net soos die Bybel sê.—Romeine 8:19-22; Prediker 8:9.

Maar sommige vra dalk: ‘Waarom het God nie gekeer dat tragedies plaasvind nie?’ Dit sou in werklikheid ’n onreg gewees het, en sou die saak vertroebel het deur die indruk te skep dat opstand teen God geen nagevolge het nie. Jehovah was dus nie agter die skerms besig om al die misdade en tragedies te verhoed wat as ’n direkte of indirekte gevolg van ongehoorsaamheid aan hom plaasvind nie.a Jehovah sou nooit ’n aandeel hê aan die skadelike leuen dat Satan se stelsel kan slaag, dat dit die sleutel tot geluk gevind het nie! Nietemin staan Jehovah nie onverskillig teenoor gebeure nie. Trouens, hy is baie bedrywig, soos ons nou sal sien.

“My Vader het . . . aangehou werk”

Hierdie woorde van Jesus toon dat God nie ledig sit en kyk hoe gebeure ontvou nie (Johannes 5:17). Inteendeel, sedert die opstand in Eden is hy baie besig. Byvoorbeeld, hy het Bybelskrywers geïnspireer om sy belofte op te teken dat ’n toekomstige “saad” Satan en almal wat aan hom lojaal is, sal verbrysel (Genesis 3:15). Daarbenewens sal God, deur middel van hierdie Saad, ’n regering tot stand bring, ’n hemelse Koninkryk, wat gehoorsame mense sal seën en ’n einde sal maak aan alles wat lyding veroorsaak, selfs die dood.—Genesis 22:18; Psalm 46:9; 72:16; Jesaja 25:8; 33:24; Daniël 7:13, 14.

As ’n stap in die vervulling van hierdie wonderlike beloftes het Jehovah die Een wat die vernaamste Heerser van daardie Koninkryk sou word, na die aarde toe gestuur. Dit was niemand anders nie as Jesus Christus, die Seun van God (Galasiërs 3:16). In ooreenstemming met God se voorneme vir hom het Jesus God se Koninkryk die middelpunt van sy lering gemaak (Lukas 4:43). Trouens, Christus het ’n lewende voorskou gegee van wat hy as Koning van daardie Koninkryk sal vermag. Hy het duisende honger mense kos gegee, die siekes genees, die dooies opgewek en selfs sy mag oor die natuurkragte getoon deur ’n hewige storm te laat bedaar (Matteus 14:14-21; Markus 4:37-39; Johannes 11:43, 44). Die Bybel sê aangaande Jesus: “Ongeag hoeveel beloftes van God daar is, hulle het deur middel van hom Ja geword.”—2 Korintiërs 1:20.

Diegene wat na Jesus luister en “uit die wêreld” kom—die stelsel van dinge wat van God vervreemd is en waaroor Satan heers—word in Jehovah se gesin verwelkom (Johannes 15:19). Hierdie wêreldwye gesin van ware Christene word gerig deur liefde, streef vrede na en word gekenmerk deur vasbeslotenheid om enige sweempie van vooroordeel en rassisme onder hulle uit te verwyder.—Maleagi 3:17, 18; Johannes 13:34, 35.

Ware Christene bevorder nie die teenswoordige wêreld se belange nie, maar ondersteun en verkondig eerder God se Koninkryk in gehoorsaamheid aan Jesus se bevel in Matteus 24:14. Dink net: Wie verkondig die “goeie nuus van die koninkryk” wêreldwyd? Wie het, as ’n wêreldwye geestelike gesin, geweier om ’n aandeel te hê aan oorlog en verdelende geskille tussen nasies en stamme? En wie laat hulle gedrag deur God se Woord rig, hetsy die verhewe standaarde daarin gewild is of nie? (1 Johannes 5:3). Baie het gesien dat Jehovah se Getuies hierdie dinge doen. Ondersoek asseblief die bewyse vir jouself.

Kies God se heerskappy!

Die mensdom, wat van God vervreemd is en deur Satan mislei word, het ’n wêreldstelsel gebou wat al hoe meer ellende en wanhoop veroorsaak. Selfs die aarde word verderf! Daarenteen het Jehovah ’n hemelse regering tot stand gebring wat miljoene mense se lewens verbeter het en aan elkeen ’n vaste hoop gegee het (1 Timoteus 4:10). Wat sal jy kies?

Dit is nou die tyd om te besluit, want God sal nie toelaat dat Satan en sy goddelose wêreld vir ewig voortbestaan nie. God se oorspronklike voorneme om hierdie aarde ’n paradys te maak, het nooit verander nie. Daarom sal sy Koninkryk en diegene wat dit ondersteun, van krag tot krag gaan, terwyl die wêreld onder Satan se beheer toenemende “weë van benoudheid” sal ervaar totdat God ’n einde daaraan maak (Matteus 24:3, 7, 8). As jy dus opreg “Waarom?” tot God uitgeroep het, moet jy na hom luister deur die Bybel se boodskap van vertroosting en hoop ter harte te neem. Jou trane van droefheid kan selfs nou al trane van vreugde word.—Matteus 5:4; Openbaring 21:3, 4.

[Voetnoot]

[Prent op bladsy 7]

Is jy tevrede met die resultate van menseheerskappy?

[[Foto-erkennings op bladsy 7]

Baba: © J. B. Russell/Panos Pictures; huilende vrou: © Paul Lowe/Panos Pictures

[Prent op bladsy 8]

Jesus sal die Paradys herstel—en selfs die dooies opwek