Waarom hy so belangrik is

OOR die afgelope 2 000 jaar is baie aandag op die geboorte van Jesus gevestig. Volgens die eerste-eeuse geneesheer Lukas het ’n engel vir ’n jong maagd met die naam Maria gesê: “Kyk! jy sal in jou moederskoot ontvang en aan ’n seun geboorte gee, en jy moet hom Jesus noem.” Wat het die engeleboodskapper omtrent Jesus gesê? “Hy sal groot wees en die Seun van die Allerhoogste genoem word”, het hy gesê. ‘Hy [Jesus] sal as koning heers’, en “daar sal geen einde aan sy koninkryk wees nie”.—Lukas 1:31-33.

Dit is sekerlik wat die mensdom nodig het—’n regverdige wêreldheerser om die aarde se aangeleenthede op ’n liefdevolle wyse te bestuur! Trouens, lank voordat Jesus gebore is, het die Bybel voorspel: “’n Kind is vir ons gebore, ’n seun is vir ons gegee; en die regering sal op sy skouers wees. En hy sal genoem word: . . . Ewige Vader, Vredevors. Aan die vermeerdering van sy regering en aan vrede sal daar geen einde wees nie.”—Jesaja 9:6, 7, New International Version.

’n Regverdige regering en vrede—watter wonderlike vooruitsigte! Maar let op dat daar voorspel is dat hierdie regering op die skouers van ’n vors sou wees—die “Vredevors”—wat toon dat die Koning oor almal, God die Almagtige, hierdie heerskappy aan Sy Seun toevertrou. Daarom het Jesus herhaaldelik van hierdie regering waarvan hy die Heerser sou wees, as “die koninkryk van God” gepraat.—Lukas 9:27, 60, 62.

Vroeg in sy bediening het Jesus gesê: “Ek [moet] die goeie nuus van die koninkryk van God bekend maak, want hiervoor is ek uitgestuur” (Lukas 4:43). Jesus het selfs sy volgelinge geleer om te bid dat God se Koninkryk kom (Matteus 6:9, 10). Die tydskrif Christianity and Crisis sê dat “die Koninkryk die hooftema van [Jesus se] lering was”, en voeg by: “Daar is nie nog ’n onderwerp waarop hy soveel gekonsentreer het of wat so ’n belangrike deel van sy boodskap uitgemaak het nie. Dit word meer as honderd keer in die Evangelieverslae gemeld.”

Vrae om oor na te dink

Hoe stel jy jou Jesus vandag voor? Gedurende dié tyd van die jaar word hy dikwels as ’n baba in ’n krip uitgebeeld. En hy was wel vir ’n kort tydjie ’n hulpelose baba (Lukas 2:15-20). Maar is dit hoe hy hoofsaaklik onthou moet word? Dink hieraan: Waarom is Jesus as ’n mens gebore? Wie was hy werklik?

“Was Jesus die Seun van God, die beloofde Messias van die Hebreeuse Bybel?” het die Encarta Yearbook van 1996 gevra. “Of was hy ’n doodgewone mens, dalk ’n uitsonderlike mens, maar nietemin ’n mens?” Ons moet ernstig nadink oor sulke vrae. Waarom? Omdat ons lewe en geluk afhang van hoe ons Jesus beskou en teenoor hom optree. “Hy wat geloof in die Seun beoefen, het die ewige lewe”, sê die Bybel, maar “hy wat aan die Seun ongehoorsaam is, sal die lewe nie sien nie”.—Johannes 3:36.

Nie ’n gewone mens nie

Ná ’n beskrywing van Jesus se bedrywighede by die tempel in Jerusalem toe hy 12 jaar oud was, sê die Bybel dat hy teruggekeer het huis toe saam met Maria en haar man, Josef, en “[Jesus] het aan hulle onderdanig gebly” (Lukas 2:51, 52). Maar nadat Jesus grootgeword het, het dit duidelik geword dat hy nie ’n gewone mens is nie.

Toe Jesus ’n stormagtige see laat bedaar het, het ’n vreesbevange vriend uitgeroep: “Wie is hy tog?” (Markus 4:41). Uiteindelik is Jesus op valse aanklagte aan die Romeinse goewerneur Pontius Pilatus oorgelewer. Pilatus, wat seker was van Jesus se onskuld en diep getref was deur Jesus se waardigheid ondanks wrede, onregverdige behandeling, het Jesus voor die skare gebring en met bewondering uitgeroep: “Kyk! Die mens!” Maar die Jode het geantwoord: “Ons het ’n wet, en volgens die wet behoort hy te sterf, omdat hy homself God se seun gemaak het.”—Johannes 19:4-7.

Toe Pilatus hoor dat daar na Jesus verwys word as “God se seun”, het hy bang geword. Hy het vroeër ’n boodskap ontvang oor sy vrou se droom van Jesus, wat sy “daardie regverdige man” genoem het (Matteus 27:19). Pilatus het dus gewonder wie Jesus werklik is! Hoewel hy geweet het dat Jesus van Galilea was, het Pilatus gevra: “Waar kom jy vandaan?” Toe Jesus geweier het om hom te antwoord, het die gesprek gou geëindig.—Johannes 19:9, 10.

Dit is duidelik dat Jesus wel ’n mens was, maar hy het verskil van ander mense omdat hy voorheen ’n geespersoon was, wat in die hemel as die Woord bekend gestaan het. Sy lewe is toe wonderdadig deur God na die baarmoeder van Maria oorgeplaas. “Die Woord het vlees geword”, het die apostel Johannes geskryf, “en onder ons gewoon.”—Johannes 1:1, 2, 14, 18; Openbaring 3:14.

Waarom hy ’n goddelike oorsprong moes hê

Voordat die eerste man, Adam, kinders verwek het, het hy voor sonde geswig. ’n Opstandige engel, wat Duiwel en Satan genoem is, het hom sover gekry om aan God ongehoorsaam te wees. Gevolglik het Adam die verhouding wat hy, as God se seun, met Hom gehad het, verloor, net soos God gesê het die geval sou wees indien hy ongehoorsaam was. Adam het dus die gevolge daarvan gedra. Hy het onvolmaak en oud geword en uiteindelik gesterf.—Genesis 2:15-17; 3:17-19; Openbaring 12:9.

Die Bybel beskryf die uitwerking wat Adam se ongehoorsaamheid op ons almal, sy nakomelinge, gehad het en verduidelik: ‘Deur een mens [Adam] het die sonde in die wêreld ingekom en die dood deur die sonde en die dood het só tot alle mense deurgedring omdat hulle almal gesondig het’ (Romeine 5:12). Ongelukkig het ons almal sonde van ons voorvader Adam geërf, tesame met die droewige gevolge daarvan, naamlik veroudering en die dood.—Job 14:4; Romeine 3:23.

Die enigste manier om van hierdie gevolge bevry te word, is om ’n volmaakte vader te hê, iemand wat nie sonde en die verskriklike gevolge daarvan geërf het nie. Kom ons sien hoe hierdie nuwe vader, wat met die volmaakte Adam ooreenkom, voorsien is.

Die Een wat nodig was, word voorsien

Die beloofde “Vredevors”, soos jy sal onthou, word ook “Ewige Vader” genoem. Sy geboorte as ’n mens is só voorspel: “Die maagd sal swanger word en ’n seun baar” (Jesaja 7:14; Matteus 1:20-23, Ou Afrikaanse Bybelvertaling). Jesus het nie ’n mensevader gehad nie, en Adam, die eerste mens, ook nie. Wanneer die Bybelgeskiedskrywer Lukas Jesus se geslagslyn tot die begin van die mensegeskiedenis terugvoer, toon hy dat Adam as ’n “seun van God” in aansyn gekom het (Lukas 3:38). Maar, soos ons geleer het, het Adam daardie verhouding wat hy, as God se seun, met Hom gehad het, verloor—vir homself en vir al sy nakomelinge. Ons almal het dus as ’t ware ’n nuwe vader nodig wat volmaak is—soos Adam was toe hy geskep is.

God het sy Seun van die hemel gestuur om daardie nuwe Adam te wees om die eerste een te vervang. Die Bybel sê: “‘Die eerste mens, Adam, het ’n lewende siel geword.’ Die laaste Adam het ’n lewegewende gees geword. Die eerste mens is uit die aarde en is van stof gemaak; die tweede mens is uit die hemel” (1 Korintiërs 15:45, 47). Jesus, “die laaste Adam”, is soos “die eerste mens, Adam”, in die sin dat Hy ’n volmaakte man was, in staat om volmaakte menslike nakomelinge te verwek, wat vir ewig in volmaaktheid op aarde kan lewe.—Psalm 37:29; Openbaring 21:3, 4.

Jesus, wat geen kinders verwek het nie, het tot sy dood getrou aan God gebly, ondanks al Satan se aanvalle. Die volmaakte menselewe van onkreukbaarheid wat Jesus opgeoffer, of prysgegee het, word die losprys genoem. “Ons [het] die bevryding [van sonde en die dood wat van Adam oorgeërf is] deur ’n losprys deur die bloed van [Jesus]”, verduidelik die Bybel. Dit sê ook: “Net soos baie deur die ongehoorsaamheid van [Adam] sondaars gemaak is, so sal ook baie deur die gehoorsaamheid van [Jesus] regverdig gemaak word.”—Efesiërs 1:7; Romeine 5:18, 19; Matteus 20:28.

As ons geloof in Jesus beoefen, sal hy ons “Ewige Vader” sowel as ons “Redder” word. Hy sal sy vorstelike heerskappy op ’n wonderlike wyse uitoefen wanneer hy as Heerser van sy Vader se Koninkryk dien. Kom ons kyk nou hoe dit sal wees om onder daardie heerskappy te lewe en wanneer ons kan verwag om hierdie ryk seëninge te geniet.—Lukas 2:8-11.

[Prente op bladsy 5]

Hoe stel jy jou Jesus vandag voor?

[Prent op bladsy 6]

Waarom word Jesus “die laaste Adam” genoem?