Stap 3

Oefen jou gesag uit

Waarom is hierdie stap nodig? Studies toon dat “kinders wat grootgemaak word deur ouers wat liefdevol is maar hulle gesag laat geld—dié wat hulle kinders ondersteun en tog beperkings ferm handhaaf—op akademiese gebied presteer, beter sosiale vaardighede ontwikkel, ’n goeie selfbeeld het en oor die algemeen gelukkiger is as kinders wie se ouers óf te toegeeflik of uitermate streng is”, sê die tydskrif Parents.

Die uitdaging: Van kleintyd tot hulle tienerjare sal kinders jou reg om gesag oor hulle uit te oefen, uitdaag. “Kinders leer gou wanneer hulle ouers bang is om hulle gesag uit te oefen en wanneer hulle maklik sal toegee”, skryf John Rosemond, skrywer van die boek Parent Power! “As die ouers nie die leisels neem nie, sal die kinders dit doen”, sê hy.

Die oplossing: Moenie bekommerd wees dat jy jou kinders sal vervreem of hulle moed sal breek as jy jou gesag uitoefen nie. Jehovah God, die Insteller van die gesinslewe, het nie in gedagte gehad dat kinders ewe veel sê in die bestuur van die gesin moet hê nie. Hy het ouers eerder in hulle gesagsposisie aangestel en kinders beveel: “Wees gehoorsaam aan julle ouers.”—Efesiërs 3:14, 15; 6:1-4.

Jy kan jou gesag uitoefen sonder om ’n tiran te wees. Hoe? Deur Jehovah se voorbeeld te volg. Hy het die krag om sy mensekinders te dwing om sy wil te doen, maar hy doen ’n beroep op die goeie in ons. “Ag, as jy maar aan my gebooie aandag sal skenk! Dan sal jou vrede net soos ’n rivier word”, sê sy Woord (Jesaja 48:18). Jehovah wil hê dat ons hom moet gehoorsaam, nie omdat ons ’n morbiede vrees vir hom het nie, maar omdat ons hom liefhet (1 Johannes 5:3). Hy is redelik in wat hy van ons verwag en hy weet dat ons daarby sal baat vind as ons volgens sy sedelike standaarde lewe.—Psalm 19:7-11.

Hoe kan jy die vertroue opbou om jou ouerlike gesag op ’n gebalanseerde manier uit te oefen? Eerstens moet jy daarvan oortuig wees dat God dit van jou vereis. Tweedens moet jy seker wees dat dit die beste vir jou en jou kinders is om volgens God se sedelike standaarde te lewe.—Romeine 12:2.

Presies wat moet jy doen om jou gesag uit te oefen?

[Lokteks op bladsy 5]

“Dissiplineer jou kinders, en . . . hulle sal jou hart verbly.”—Spreuke 29:17, New Revised Standard Version