Stap 7
Leer jou kind deur jou voorbeeld
Waarom is hierdie stap nodig? Woorde wek, maar voorbeelde trek. Woorde dra dikwels slegs inligting oor. Byvoorbeeld, ouers sal dalk vir hulle kinders sê om respekvol te wees en die waarheid te praat. Maar as daardie selfde ouers op mekaar of op hulle kinders skreeu en leuens vertel om ongerieflike verpligtinge te ontduik, leer hulle hulle kinders dat dit is hoe volwassenes moet optree. Die skrywer dr. Sal Severe sê dat “een van die kragtigste maniere waarop kinders leer”, is deur hulle ouers se voorbeeld na te volg.
Die uitdaging: Ouers is onvolmaak. “Almal het gesondig en skiet te kort aan die heerlikheid van God”, het die apostel Paulus geskryf (Romeine 3:23). Wat die beheer van ons spraak betref, het die dissipel Jakobus geskryf: ‘Geen mens kan die tong tem nie’ (Jakobus 3:8). Daarbenewens is dit niks ongewoons dat kinders hulle ouers se geduld tot die uiterste beproef nie. “Ek was verstom oor hoe maklik my kinders my kon kry om my humeur te verloor”, sê Larry, ’n vader van twee, wat gewoonlik kalm en selfbeheersd is.
Die oplossing: Probeer om ’n goeie voorbeeld te wees—nie ’n volmaakte voorbeeld nie. En gebruik die kere wanneer jy jou soms swak gedra, om ’n positiewe les oor te dra. “As ek my vererg het vir my kinders of as ek ’n slegte besluit geneem het wat ’n negatiewe uitwerking op hulle gehad het”, sê Chris, ’n vader van twee, “het ek my fout erken en om verskoning gevra. Dit het my kinders geleer dat ouers ook foute maak en dat ons almal daaraan moet werk om ons gedrag te verbeter.” Kostas, wat vroeër genoem is, sê: “Omdat ek om verskoning vra wanneer ek my humeur verloor, het ek gevind dat my dogters geleer het om jammer te sê wanneer hulle foute maak.”
Jehovah God sê: “Moenie julle kinders irriteer nie, maar hou aan om hulle in die dissipline en verstandsregulering van Jehovah op te voed” (Efesiërs 6:4). Wanneer iemand wat in ’n gesagsposisie is, een ding sê maar iets anders doen, irriteer dit kinders net soveel, of moontlik selfs meer, as wat dit volwassenes irriteer. Daarom kan jy jou gerus hierdie vrae aan die einde van elke dag afvra: As ek vandag nie ’n woord gesê het nie, watter lesse het my kinders uit my dade geleer? Is dit dieselfde lesse wat ek mondelings aan hulle probeer oordra?
[Lokteks op bladsy 9]
“Leer jy, die een wat iemand anders leer, . . . nie jouself nie?”—Romeine 2:21
[Prente op bladsy 9]
Wanneer ’n ouer om verskoning vra, leer ’n kind om dit ook te doen