Van ons lesers
Wanneer siekte iets van die verlede is! (Januarie 2007) Wanneer julle sê dat party mense “geld en tyd [mors] op behandelings en geneesmiddels wat ondoeltreffend of selfs skadelik is”, klink dit asof julle na alternatiewe vorme van geneeskunde verwys, aangesien die artikel vrae geopper het oor die doeltreffendheid en veiligheid van sommige alternatiewe vorme van behandeling. Beteken dit dat Ontwaak! konvensionele geneeskunde as veiliger en doeltreffender beskou? Volgens die Amerikaanse Algemene Rekeningkantoor is daar baie bewyse van die teendeel.
G. C., Verenigde State
“Ontwaak!” antwoord: Daar is bewys dat ’n aantal algemeen aanvaarde behandelings wat voorheen as veilig en doeltreffend beskou is, onveilig is. Dit het al in konvensionele geneeskunde sowel as alternatiewe gesondheidsorg plaasgevind. Dit is verstandig om redelik ingelig te wees oor die moontlike voordele en risiko’s wat gepaardgaan met die behandeling wat jy oorweeg, hetsy dit konvensioneel of alternatief is, en om seker te maak dat dit nie in stryd is met Bybelbeginsels nie. Dit behels persoonlike besluite. Soos ons al dikwels gesê het, “Ontwaak!” beveel geen spesifieke behandeling aan nie. En Christene veroordeel of kritiseer nie die keuses wat ander aangaande gesondheidsorg maak nie. Soos die artikels getoon het, kan nóg alternatiewe nóg moderne geneeskunde per slot van rekening al die mensdom se siektes genees. Net God se Koninkryk sal ’n tyd bring wanneer daar geen siekte meer sal wees nie.—Openbaring 21:3, 4.
Ek sal “net soos ’n takbok klim” (Augustus 2006) Francesco Abbatemarco se geduld en nederigheid het my werklik laat dink. Hy het nie net sy fisiese gebrek probeer oorkom om Jehovah te dien nie, maar hy het ook hard daaraan gewerk om sy negatiewe gevoelens te oorkom. Sy ondervinding het my gehelp om in gedagte te hou dat ons, ongeag voor watter situasies ons te staan kom, Jehovah na die beste van ons vermoë kan dien. Dit was ook vir my aanmoedigend om te sien hoe die toepassing van God se Woord hom gehelp het om dramatiese veranderinge in sy lewe aan te bring.
N. G., Kambodjay
Francesco het soveel struikelblokke gehad om te oorkom. Maar toe hy eers die waarheid gevind het, was hy gretig en gewillig om dit te oorkom. Hy is so ’n wonderlike voorbeeld van vasberadenheid! Ek hoop sy verhaal sal ander aanspoor soos dit my aangespoor het.
M. D., Suid-Afrika
Ek het hierdie artikel so geniet! Ek wens ek kon self vir Francesco Abbatemarco sê hoeveel dit my aangespoor het om harder te probeer om meer in my diens aan Jehovah te doen.
J. B., Verenigde State
Dankie, Francesco, vir jou wonderlike voorbeeld van ywer en volharding. Ek is seker dat jy in die nuwe stelsel soos ’n takbok sal klim. Jy moet onthou dat jy broers en susters het wat werklik lief is vir jou en wat vir jou bid.
S. G., Rusland