Waaroor handel die Bybel?
SOMMIGE mense beskou die Bybel as ’n geskiedenisboek, aangesien duisende jare van God se handelinge met die mensdom daarin opgeteken is. Ander beskou dit as ’n boek van etiek. Hulle verwys na die meer as 600 wette en regulasies in verband met regs-, huishoudelike, sedelike en godsdienssake wat God aan die nasie Israel gegee het. Nog ander beskou die Bybel as ’n geestelike gids wat God se denke openbaar.
In werklikheid is al hierdie beskrywings korrek. Die Bybel sê van homself: “Die hele Skrif is deur God geïnspireer en is nuttig om te onderrig, om tereg te wys, om dinge reg te stel, om in regverdigheid te dissiplineer, sodat die mens van God volkome bevoeg kan wees, ten volle toegerus vir elke goeie werk” (2 Timoteus 3:16, 17). Ja, alles in God se Woord—insluitende geskiedkundige verslae, wette en raad op geestelike gebied—is waardevol.
Maar die Bybel is baie meer as net ’n boek met nuttige inligting. Die Bybel is uniek omdat dit ’n openbaring van Jehovah God af is. Dit voorsien praktiese, goddelik geïnspireerde raad vir die daaglikse lewe. Dit openbaar ook Jehovah se voorneme met die aarde en die mensdom en toon hoe hy die oorsake van menselyding uit die weg gaan ruim. Bowenal verduidelik die Bybel dat God opsetlik verkeerd voorgestel is en sê dit vir ons hoe hy hierdie universele geskil gaan besleg.
God word ’n leuenaar en ’n slegte heerser genoem
Die Bybel sê dat God die eerste mense, Adam en Eva, met volmaakte verstande en liggame geskep het en hulle in ’n ideale omgewing geplaas het. Hy het hulle oor die aarde en die diereryk aangestel (Genesis 1:28). As God se kinders het Adam en Eva die geleentheid gehad om vir ewig op die aarde te lewe, mits hulle hulle hemelse Vader gehoorsaam het. Hy het slegs een beperking op hulle geplaas. “Van al die bome van die tuin mag jy tot versadiging toe eet”, het Jehovah gesê, “maar wat die boom van die kennis van goed en kwaad betref, daarvan mag jy nie eet nie, want die dag as jy daarvan eet, sal jy sekerlik sterf.”—Genesis 2:16, 17.
’n Geesskepsel wat in die Bybel as Satan die Duiwel geïdentifiseer word, het egter presies die teenoorgestelde gesê: “Julle sal sekerlik nie sterf nie” (Genesis 3:1-5). Deur God openlik te weerspreek, het Satan nie net gesê dat die Skepper ’n leuenaar is nie, maar hy het ook geïmpliseer dat Sy manier van regeer verkeerd is—dat die mens beter sou vaar sonder God. Satan het Eva daarvan oortuig dat ongehoorsaamheid aan God vryheid en sedelike onafhanklikheid sou meebring. Hy het gesê dat sy “soos God” sou wees! Satan het dus Jehovah se goeie naam en voorneme aangeval.
Daardie gesprek het verreikende gevolge gehad. Trouens, Jehovah se voorneme om sy naam en reputasie te suiwer, is die hooftema van die Bybel. Dit word opgesom in Jesus se modelgebed—wat dikwels die Onse Vader genoem word. Jesus het sy volgelinge geleer om te bid: “Laat u naam geheilig word. Laat u koninkryk kom. Laat u wil geskied . . . op die aarde.”—Matteus 6:9, 10.
Hoe God sy naam suiwer
Satan het ’n paar fundamentele kwessies geopper: Wie het die waarheid gepraat—Jehovah of Satan? Is Jehovah se heerskappy oor sy skepping regverdig en goed? Het hy die reg om te verwag dat mense hom gehoorsaam? Sou die mensdom werklik beter daaraan toe wees as hulle oor hulleself regeer? Om hierdie vrae te beantwoord, het Jehovah tydelik toegelaat dat mense oor hulleself regeer.
Wat was die gevolg? Sedert daardie eerste leuen in Eden is die mensegeskiedenis gevul met teëspoed en lyding, wat bewys dat Satan ’n gruwelike leuenaar is en dat onafhanklikheid van God slegs tot rampspoed lei. Maar weens Jehovah se liefde en onbeperkte wysheid, het hy hom voorgeneem om sy naam te suiwer deur al die probleme wat in Eden ontstaan het, ongedaan te maak. Hy sal dit deur middel van die Messiaanse Koninkryk doen. Wat is daardie Koninkryk?
God se oplossing—die Koninkryk
Miljoene mense sê gereeld die Onse Vader op. Neem gerus ’n oomblik om na te dink oor wat dit beteken. Dink aan die woorde: “Laat u koninkryk kom” (Matteus 6:10). Daardie Koninkryk is nie bloot ’n abstrakte hartstoestand, soos party meen nie. Dit is eerder, soos die term “koning” te kenne gee, ’n hemelse regering in die hande van Jesus Christus, die “Koning van die konings” (Openbaring 19:13, 16; Daniël 2:44; 7:13, 14). Die Bybel leer dat hy oor die hele aarde gaan regeer, blywende vrede en harmonie onder alle mense gaan bewerkstellig en alle goddeloosheid van die aarde sal verwyder (Jesaja 9:6, 7; 2 Tessalonisense 1:6-10). Sodoende sal God se Koninkryk—nie enige menseregering nie—Jesus se woorde vervul: “Laat u wil geskied . . . op die aarde.”
Om te verseker dat daardie woorde vervul word, het Jesus sy lewe as ’n losprys gegee om Adam se afstammelinge van sonde en die dood los te koop (Johannes 3:16; Romeine 6:23). Onder God se Koninkryk sal almal wat geloof in Christus se offerande toon, dus sien hoe die gevolge van Adam se sonde ongedaan gemaak word en menslike volmaaktheid progressief herstel word (Psalm 37:11, 29). Die gesondheidsprobleme waaronder ons gebuk gaan, veral wanneer ons bejaard is, sal uiteindelik iets van die verlede wees. Selfs die emosionele pyn wat siekte en die dood vir die mensegesin meebring, sal uit die weg geruim word.—Openbaring 21:4.
Hoe kan ons seker wees dat God sy beloftes gaan nakom? Om maar een ding te noem, letterlik honderde profesieë in die Bybel is reeds vervul. (Sien bladsy 9.) Dit is dus duidelik dat geloof in die Bybel nie blinde goedgelowigheid of wensdenkery is nie, maar dat dit gegrond is op gesonde verstand en oorvloedige bewyse.—Hebreërs 11:1.
Praktiese raad vir ons dag
Die Bybel gee ons nie net ’n vaste grondslag vir hoop in die toekoms nie, maar help ons ook om vandag ’n gelukkiger lewe te lei. God se Woord gee byvoorbeeld onoortreflike, praktiese raad in verband met die huwelik, die gesinslewe, menseverhoudings, hoe om geluk te vind en baie ander onderwerpe. Kom ons kyk na net ’n paar voorbeelde.
◼ Dink voordat jy praat. “Daar is een wat onnadenkend praat soos met swaardsteke, maar die tong van die wyses is genesing.”—Spreuke 12:18.
◼ Vermy kleinlike jaloesie. “’n Kalm hart is die lewe van die vlees, maar jaloesie is verrotting vir die gebeente.”—Spreuke 14:30.
◼ Dissiplineer jou kinders. “Lei ’n seun op volgens die weg vir hom; ook as hy oud word, sal hy nie daarvan afwyk nie.” “’n Seun wat aan homself oorgelaat word, sal sy moeder in die skande steek.”—Spreuke 22:6; 29:15.
◼ Wees vergewensgesind. Jesus het gesê: “Gelukkig is die barmhartiges, want aan hulle sal barmhartigheid bewys word” (Matteus 5:7). Die wyse koning Salomo het geskryf: “Liefde bedek alle oortredings” (Spreuke 10:12). As iemand so ernstig teen jou gesondig het dat jy dit nie bloot kan vergewe en vergeet nie, raai die Bybel aan: “Gaan lê sy fout tussen jou en hom alleen bloot.”—Matteus 18:15.
◼ Vermy die liefde vir geld. “Die liefde vir geld is ’n wortel van allerhande skadelike dinge, en deur hierdie liefde na te streef, [het] party . . . hulleself oral met baie pyne deurboor” (1 Timoteus 6:10). Let wel dat die Bybel “die liefde vir geld” veroordeel, nie geld self nie.
’n “Brief” van ons hemelse Vader
Die Bybel handel dus oor baie dinge. Soos ons gesien het, handel dit hoofsaaklik oor God en sy voorneme. Maar dit handel ook oor ons—die mens—en hoe ons nou en tot in ewigheid gelukkig onder die heerskappy van God se Koninkryk kan lewe. In sekere sin is die Bybel soos ’n brief van ons “Vader in die hemele”, Jehovah (Matteus 6:9). Deur middel daarvan het Jehovah sy kosbare gedagtes aan ons meegedeel en sy wil sowel as sy pragtige persoonlikheid aan ons geopenbaar.
Deur die Bybel te lees en daaroor te peins, begin ons om God te “sien” soos hy werklik is. Ons ontvanklike hart kom nader aan hom in ’n liefdevolle band van eenheid (Jakobus 4:8). Ja, die Bybel handel oor meer as net geskiedenis, profesie en wette. Dit handel ook oor ’n persoonlike verhouding—ons verhouding met God. Dit maak hierdie boek waarlik uniek en baie kosbaar.—1 Johannes 4:8, 16.
[Lokteks op bladsy 19]
Die tema van die Bybel word pragtig opgesom in die eerste paar sinne van Jesus se modelgebed
[Venster/Prent op bladsy 21]
HOE OM DIE BYBEL TE LEES
Die Bybel is ’n fassinerende boek om te lees. Trouens, die verslae en sedelesse daarin is so bekend dat dit ’n groot rol speel in die literatuur van baie tale. Die Bybel help ons om ons Skepper, Jehovah God, te leer ken. Dit is ook ’n onuitputlike bron van praktiese wysheid. ’n Bybelspreuk sê: “Wysheid kom eerste. Verwerf wysheid; en by alles wat jy verwerf, verwerf begrip” (Spreuke 4:7). Hoe kan jy die grootste voordeel uit jou Bybellees trek?
Probeer om te lees wanneer jy gewoonlik op jou wakkerste is. En moenie vlugtig oor die materiaal lees nie. Jou doel behoort te wees om jou verstand te vul met God se gedagtes en dit jou eie te maak. Nadat jy ’n gedeelte gelees het, peins daaroor en vergelyk dit met wat jy reeds weet. Dit sal jou begrip en waardering vergroot.—Psalm 143:5.
Party wonder dalk: ‘Waar in die Bybel moet ek begin lees?’ Jy kan natuurlik heel voor begin. Maar party wat die Bybel vir die eerste keer lees, vind dit makliker om te begin by die Evangelies—Matteus, Markus, Lukas en Johannes—die verslae oor Jesus se lewe en bediening. Dan lees party die digterlike boeke—Psalms, Spreuke en Prediker—wat in pragtige taal geskryf en vol juwele van wysheid is. Daarna is jou aptyt dalk gewek om ander dele van die Bybel te lees. (Sien hieronder.) En moenie die wanopvatting glo dat jy net die deel hoef te lees wat gewoonlik die Nuwe Testament genoem word nie. Onthou: “Die hele Skrif is deur God geïnspireer en is nuttig.”—2 Timoteus 3:16.
’n Besonder doeltreffende manier om die Bybel te bestudeer, is volgens onderwerp. Byvoorbeeld, die studiehulp Wat leer die Bybel werklik?, wat deur Jehovah se Getuies in hulle openbare bediening gebruik word, sluit tydige onderwerpe in soos: “Hoe om jou gesinslewe gelukkig te maak”, “Aanbidding wat God se goedkeuring wegdra” en “Waar is die dooies?”—Sien die venster op bladsy 18.
[Venster op bladsy 21]
LEES DIE BYBEL VOLGENS ONDERWERP
Die oorsprong van lewe en die mens se sondeval Genesis
Die vorming van eertydse Israel Eksodus tot Deuteronomium
Aksiebelaaide verslae Josua tot Ester
Roerende gedigte en liedere Job, Psalms, Hooglied van Salomo
Wysheid vir die daaglikse lewe Spreuke, Prediker
Profesieë en sedelike riglyne Jesaja tot Maleagi en Openbaring
Jesus se lewe en leringe Matteus tot Johannes
Die stigting en verspreiding van die Christelike godsdiens Handelinge
Briewe aan die gemeentes Romeine tot Judas