Mite of feit?

Die Christen- ouer man Timoteus het diegene wat die ware God wou aanbid, beveel om nie aan “wisselvallige idees” en “mites” aandag te skenk nie (1 Timoteus 1:3, 4, Byington). Is dit nodig om vandag versigtig te wees hiervoor? Ja, want wanopvattings omtrent die Bybel en die leringe daarin keer mense van ware aanbidding weg. Hieronder is ’n paar algemene opvattings oor die Bybel. Let op wat die Bybel self sê. Dit kan jou help om tussen mite en feit te onderskei.

◼ Mite: Die wonderwerke in die Bybel is onmoontlik.

Feit: Mense moet nog baie leer omtrent God se skepping. Geen wetenskaplike kan swaartekrag ten volle verklaar, al die komponente van ’n atoom presies opnoem of die presiese aard van tyd verduidelik nie. “Kan jy die diep dinge van God deurgrond, of kan jy die Almagtige tot die uiterste deurgrond?” (Job 11:7). Aangesien ons nie die skepping ten volle kan begryp nie, huiwer wetenskaplikes al hoe meer om te sê dat iets onmoontlik is.

◼ Mite: Alle godsdienste lei na God.

Feit: “As julle in my woord bly”, het Jesus gesê, “is julle werklik my dissipels, en julle sal die waarheid ken, en die waarheid sal julle vrymaak” (Johannes 8:31, 32). As alle godsdienste na God gelei het, sou hulle lede vrygemaak hoef te word? Trouens, Jesus het geleer dat daar betreklik min mense is op “die pad wat na die lewe lei”.—Matteus 7:13, 14.

◼ Mite: Alle goeie mense gaan hemel toe wanneer hulle sterf.

Feit: “Die sagmoediges sal die aarde besit, en hulle sal hulle inderdaad verlustig in die oorvloed van vrede. Die regverdiges sal die aarde besit, en hulle sal vir ewig daarop woon. Hoop op Jehovah en hou sy weg, en hy sal jou verhef om die aarde in besit te neem” (Psalm 37:11, 29, 34). Slegs 144 000 getroue mense gaan hemel toe. Hulle godgegewe toewysing is om “as konings oor die aarde [te] heers”.—Openbaring 5:9, 10; 14:1, 4.

◼ Mite: Die “Ou Testament” is nie meer vir Christene nuttig nie.

Feit: “Die hele Skrif is deur God geïnspireer en is nuttig” (2 Timoteus 3:16, 17). “Alles wat tevore geskryf is, is tot ons onderrigting geskryf, sodat ons deur ons volharding en deur die vertroosting van die Skrif hoop kan hê” (Romeine 15:4). Die “Ou Testament”, die Hebreeuse Geskrifte, is ’n noodsaaklike bron van geestelike onderrigting en gee ons ’n grondslag vir geloof in die “Nuwe Testament”, die Christelike Griekse Geskrifte.

◼ Mite: Baie dele van die boek Genesis, insluitende die verslag oor Adam en Eva, is allegories, oftewel ’n sinnebeeldige voorstelling.

Feit: Jesus se geslagslys tot by Adam is deur die Evangelieskrywer Lukas opgeteken (Lukas 3:23-38). As Genesis ’n mite is, waar in die geslagslys hou die werklike name dan op en begin die sogenaamde legendariese name? Jesus, wat in die hemel bestaan het voordat hy aarde toe gekom het, het geglo wat in Genesis geskryf is, insluitende die verslag oor Adam en Eva (Matteus 19:4-6). As ons die geloofwaardigheid van Genesis bevraagteken, ondermyn ons dus ook die geloofwaardigheid van Jesus self, sowel as dié van talle Bybelskrywers.—1 Kronieke 1:1; 1 Korintiërs 15:22; Judas 14.