Jongmense vra . . .

Waarom moet ek volgens Bybelstandaarde lewe?

DIT is pouse, en jy eet jou middagete saam met twee meisies by die skool. Een van hulle hou die nuwe ou dop.

“Jy weet”, sê die eerste meisie, “hy hou regtig van jou. Ek kan mos sien hoe kyk hy vir jou. Hy kan sy oë nie van jou afhou nie!”

“En raai wat?” fluister die tweede meisie terwyl sy na jou oorleun. “Hy’s beskikbaar!”

“Dis jammer ek’s nie”, sê die eerste meisie. “Ek sou nie twee keer dink om met hom uit te gaan nie!”

Dan sê die eerste meisie iets wat jy altyd haat om te hoor.

“Hoe is dit dan dat jy nie ’n kêrel het nie?”

Jy het dit sien kom. Die feit is dat jy graag ’n kêrel wil hê. Maar daar is vir jou gesê dat jy eerder moet wag totdat jy reg is om te trou voordat jy begin uitgaan. Die probleem is . . . 

“Jou godsdiens, nè?” sê die tweede meisie.

‘Het sy my gedagtes gelees?’ dink jy.

“By jou is dit altyd net Bybel, Bybel, Bybel”, terg die eerste meisie jou. “Hoekom kan jy nie net partykeer ’n bietjie pret hê nie?”

Was jy al ooit in so ’n situasie—waar mense jou spot omdat jy volgens Bybelstandaarde probeer lewe? Hoe het jy gereageer?

◼ Jy het jou sedelike oortuigings met vertroue verdedig.

◼ Jy het ongemaklik gevoel, maar jou bes probeer om jou oortuigings te verduidelik.

◼ Jy het besluit dat jou skoolvriende reg is—jy is besig om al die pret mis te loop!

Het jy al ooit gewonder: ‘Is dit regtig die moeite werd om volgens Bybelstandaarde te lewe?’ ’n Meisie met die naam Deborah het daaroor gedink.a “My skoolmaats kon doen wat hulle wou”, sê sy. “Dit het gelyk asof hulle niks aan enigiemand hoef te verduidelik nie. Bybelstandaarde het beperkend gevoel. My skoolvriende se lewens, waarin hulle kon doen net wat hulle wou, was vir my aantreklik.”

Is dit verkeerd om te wonder?

Die Bybelskrywer Asaf het deur ’n tydperk in sy lewe gegaan toe hy gewonder het of dit die moeite werd is om op ’n manier te lewe wat God gelukkig maak. “Ek het afgunstig geraak op die grootpraters toe ek die vrede van die goddeloses sien”, het hy geskryf. Hy het selfs gesê: “Waarlik, tevergeefs het ek my hart gereinig en was ek my hande in onskuld.”—Psalm 73:3, 13.

Dit is duidelik dat Jehovah God verstaan dat mense soms sal wonder of dit die moeite werd is om volgens sy standaarde te lewe. Hy het immers Asaf se gedagtes in die Bybel laat opteken. Asaf het op die ou end besluit dat dit die beste lewenswyse is om volgens God se wette te lewe (Psalm 73:28). Hoe het hy tot daardie gevolgtrekking gekom? Wel, Asaf was wys. Hy het sy besluit geneem, nie omdat hy enige persoonlike rampspoed ervaar het nie, maar omdat hy uit ander se foute geleer het (Psalm 73:16-19). Kan jy dieselfde doen?

Die werklikheid

In teenstelling met Asaf het koning Dawid op die harde manier geleer dat diegene wat God se standaarde ignoreer, sleg daarvan afkom. Dawid het egbreuk gepleeg met die vrou van een van sy knegte en dit toe probeer wegsteek. Gevolglik het hy ander, insluitende God, seergemaak en ernstige angs ondervind (2 Samuel 11:1–12:23). Nadat Dawid berou getoon het, het Jehovah hom geïnspireer om sy gevoelens in ’n lied uit te druk, en hy het seker gemaak dat daardie woorde behoue gebly het in die Bybel sodat ons daarby kan baat vind (Psalm 51:1-19; Romeine 15:4). Dit is dus wys en skriftuurlik om uit ander se foute te leer.

Om jou te help om Asaf se voorbeeld na te volg en Dawid se foute te vermy, kan jy gerus let op die kommentaar van ’n paar jongmense uit verskillende lande wat ’n tyd lank Bybelstandaarde verwerp het. Om spesifiek te wees, hulle het hulle aan voorhuwelikse seks skuldig gemaak. Hulle het, soos Dawid, berou getoon oor hulle foute en geniet weer ’n rein posisie voor God (Jesaja 1:18; 55:7). Kyk na wat hulle te sê het.

Ontwaak!: Watter faktore het jou denke en dade beïnvloed?

Deborah: “Toe ek op skool was, het ek gesien dat almal ’n kêrel of ’n meisie het, en dit het gelyk asof hulle gelukkig is. Wanneer ek saam met hulle uitgehang het en gesien het hoe hulle mekaar soen en vashou, het ek jaloers en eensaam gevoel. Ek het dikwels ure lank gedagdroom oor ’n sekere seun van wie ek gehou het. Dit het my begeerte vergroot om saam met hom te wees en om enigiets in my vermoë te doen om daardie begeerte te bevredig.”

Mike: “Ek het materiaal gelees en na programme gekyk wat seks verheerlik. Wanneer ek met my vriende oor seks gepraat het, het dit my nuuskieriger gemaak. Later, toe ek alleen saam met ’n meisie was, het ek gedink dat ek fisies intiem met haar kon wees sonder om seks te hê, dat ek enige tyd kon stop.”

Andrew: “Ek het die gewoonte gehad om na pornografie op die Internet te kyk. Ek het baie alkohol begin drink. En ek het na partytjies toe gegaan saam met jongmense wat min respek vir die Bybel se sedelike standaarde het.”

Tracy: “Toe ek 16 was, was die belangrikste ding vir my om saam met my kêrel te wees. Ek het geweet dat voorhuwelikse seks verkeerd is, maar ek het dit nie gehaat nie. Ek het nie beplan om ’n seksuele verhouding te begin voordat ek getroud is nie, maar my emosies het my denke oorweldig. ’n Tyd lank het my gewete my glad nie gepla nie.”

Ontwaak!: Het jou lewenstyl jou gelukkig gemaak?

Deborah: “Aan die begin het ek ’n oorweldigende gevoel van vryheid geniet, en ek was bly dat ek uiteindelik by my maats ingepas het. Maar daardie gevoelens het nie lank gehou nie. Ek het vuil begin voel, gestroop van my onskuld, leeg. Ek was ontsettend spyt dat ek my maagdelikheid, iets wat ek nooit kan terugkry nie, weggegooi het. Van toe af het ek my dikwels afgevra: ‘Wie het ek gedink is ek?’ En ‘Hoekom—hoekom het ek tog Jehovah se liefdevolle standaarde geïgnoreer?’”

Mike: “Ek het begin voel asof ’n deel van my doodgegaan het. Ek het die uitwerking wat my dade op ander gehad het, probeer ignoreer, maar ek kon nie. Dit was vir my pynlik om te besef dat ek ander seermaak omdat ek my eie genot najaag. Ek het gesukkel om te slaap. Mettertyd het die genot van onsedelike seks afgeneem, en gevoelens van pyn en skaamte het my denke oorheers.”

Andrew: “Dit het al hoe makliker geword om op verkeerde begeertes te reageer. Maar terselfdertyd is ek deur skuldgevoelens verteer, en ek was teleurgestel in myself.”

Tracy: “Dit het nie lank geneem voordat die harde werklikheid my soos ’n hou tussen die oë geslaan het nie. Onsedelikheid het my jeug verwoes. Ek het gedink dat ek en my kêrel soveel pret saam sou hê. Ons het nie. Ons het op die ou end vir mekaar pyn, ellende en hartseer veroorsaak. Ek het nag ná nag my oë uitgehuil op my bed en gewens dat ek eerder dinge op Jehovah se manier gedoen het.”

Ontwaak!: Watter raad sou jy vir jongmense gee wat wonder of die Bybel se sedelike standaarde beperkend is?

Deborah: “Jou lewe sal nie beter wees as jy Bybelstandaarde verwerp nie. Dink oor hoe Jehovah gaan voel as jy sy raad volg. En dink baie mooi oor die gevolge wat dit het as jy sy raad ignoreer. Onthou, dit gaan nie net oor jou en wat jy wil hê nie. Jou dade sal ’n uitwerking op ander hê. En as jy God se raad ignoreer, gaan jy jouself skade aandoen.”

Mike: “Dis waar dat jou maats se lewenstyl op die oog af aantreklik lyk. Maar kyk dieper voordat jy iets doen. Van die waardevolste besittings wat Jehovah vir jou gee, is jou waardigheid en onskuld. As jy hierdie gawes weggooi net omdat jy nie selfbeheersing het nie, maak jy jouself goedkoop. Praat met jou ouers en ander mense wat geestelik ryp is, oor jou probleme. As jy ’n fout maak, wees gou om iets te sê, en stel die situasie reg. As jy dinge op Jehovah se manier doen, sal jy ’n ware gevoel van vrede kry.”

Andrew: “Wanneer jy onervare is, dink jy dat jou maats se lewenstyl opwindend is. Hulle gesindhede sal jou beïnvloed. Kies dus jou vriende wyslik. Vertrou op Jehovah, en jy sal baie teleurstelling vermy.”

Tracy: “Moenie dink dat dit nie met jou sal gebeur nie. My ma het reguit vir my gesê dat die weg wat ek inslaan, hartseer gevolge sal hê. Ek het so beledig gevoel! Ek het gedink dat ek beter weet. Ek het nie. Lewe volgens Jehovah se standaarde, en gaan met ander om wat dit ook doen. Jy sal dan gelukkiger wees.”

Bybelstandaarde —Beperkend of beskermend?

As jou maats jou terg omdat jy volgens Bybelstandaarde probeer lewe, kan jy jou hierdie vrae afvra: ‘Waarom verwerp hulle die idee om volgens die Bybel se sedewette te lewe? Het hulle self al die Bybel gelees en die voordele ondersoek wat dit inhou om God se wette te gehoorsaam? Het hulle ernstig nagedink oor die gevolge daarvan om daardie standaarde te ignoreer? Of doen hulle maar net wat die res doen?’

Jy ken moontlik mense wat bloot “die menigte . . . volg” (Eksodus 23:2). Wil jy nie beter as dit doen nie? Hoe kan jy dit regkry? Deur ag te slaan op die Bybel se raad om “seker [te] maak wat die goeie en aanneemlike en volmaakte wil van God is” (Romeine 12:2). Jehovah is “die gelukkige God”, en hy wil hê dat jy ook gelukkig moet wees (1 Timoteus 1:11; Prediker 11:9). Die standaarde wat in die Bybel opgeteken is, is vir jou beswil. Jy kan dit weliswaar beskou as iets wat jou vryheid beperk. Maar in werklikheid beskerm die Bybel se sedewette jou sodat jy nie skade ly nie.

Jy kan die Bybel beslis vertrou. As jy besluit om volgens die standaarde daarvan te lewe, sal jy nie net Jehovah gelukkig maak nie, maar jy sal jouself ook bevoordeel.—Jesaja 48:17.

Nog artikels uit die reeks “Jongmense vra . . . ” kan gevind word op die webwerf www.watchtower.org/ype

[Voetnoot]

IETS OM OOR TE DINK

◼ Wat kan dit vir jou moeilik maak om volgens Bybelstandaarde te lewe?

◼ Waarom moet jy vir jouself bewys dat dit die beste lewenswyse is om volgens God se standaarde te lewe?