Die Bybel se beskouing

Is dit verkeerd om van godsdiens te verander?

Toe Avtar die Bybel begin studeer het, was haar Sikh-familie baie ontsteld. “In my geboorteland”, sê sy, “word jy van die gemeenskap afgesny as jy van godsdiens verander. Selfs ons name het ’n godsdienstige betekenis. As jy van godsdiens verander, is dit vir mense asof jy jou identiteit verwerp het en jou familie minag.”

AVTAR het later een van Jehovah se Getuies geword. Was dit verkeerd van haar om van godsdiens te verander? Dalk kan jy jou met haar familie vereenselwig. Jy voel dalk dat jou godsdiens onlosmaaklik verbind is met jou familiegeskiedenis en kultuur en dat jy dit nie mag verander nie.

Dit is belangrik om jou familie te respekteer. Die Bybel sê: “Luister na jou vader wat jou geboorte veroorsaak het” (Spreuke 23:22). Maar dit is belangriker om na die waarheid omtrent ons Skepper en sy voornemens te soek (Jesaja 55:6). Is dit moontlik om hierna te soek? Indien wel, hoe belangrik is dit vir jou?

Jou soeke na godsdienswaarheid

Die wêreld se godsdienste leer teenstrydige idees. Dit is logies dat nie al hierdie leringe waar kan wees nie. Gevolglik moet daar baie mense wees wat, soos die Bybel sê, “’n ywer vir God het; maar nie ooreenkomstig juiste kennis nie” (Romeine 10:2). Maar soos die apostel Paulus in 1 Timoteus 2:4 sê, is dit God se wil dat “alle soorte mense . . . tot juiste kennis van die waarheid moet kom”. Hoe kan hierdie juiste kennis gevind word?

Kyk na redes om die Bybel te ondersoek. Paulus, wat ’n geïnspireerde Bybelskrywer was, het gesê: “Die hele Skrif is deur God geïnspireer en is nuttig om te onderrig” (2 Timoteus 3:16). As deel van jou soeke na die waarheid, moet jy die bewyse ondersoek dat hierdie stelling in die Bybel waar is. Ondersoek self die ongeëwenaarde wysheid, geskiedkundige akkuraatheid en vervulde profesieë daarin.

Die Bybel toon nie dat alle godsdienste vir God ewe aanvaarbaar is nie; dit sê eerder vir dié wat dit lees, om nie alles te glo wat hulle hoor nie, maar om “die geïnspireerde uitinge op die proef [te stel] om te sien of hulle hulle oorsprong by God het” (1 Johannes 4:1). Byvoorbeeld, enige lering wat werklik sy oorsprong by God het, moet ooreenstem met sy persoonlikheid, insluitende sy vernaamste eienskap van liefde.—1 Johannes 4:8.

Die Bybel verseker ons dat God wil hê dat ons “hom werklik [moet] vind” (Handelinge 17:26, 27). Aangesien ons Skepper wil hê dat ons na die waarheid moet soek, kan dit nie verkeerd wees om in ooreenstemming met die bewyse wat ons vind, op te tree nie—al beteken dit dat ons van godsdiens moet verander. Maar wat van die probleme wat dit kan meebring?

Lojaliteit aan jou familie

Wanneer mense hulle oortuigings verander, besluit hulle dalk dat hulle nie meer aan sekere godsdiensrituele sal deelneem of sekere vakansiedae sal vier nie. Dit is verstaanbaar dat familielede moontlik sterk hieroor sal voel. Jesus het dit erken. Hy het vir sy volgelinge gesê: “Ek het gekom om verdeeldheid te veroorsaak: ’n man teen sy vader, en ’n dogter teen haar moeder, en ’n jong vrou teen haar skoonmoeder” (Matteus 10:35). Het Jesus bedoel dat Bybelleringe veronderstel was om ’n onvermybare bron van twis te wees? Nee. Hy het bloot vooruitgesien wat moontlik kan gebeur wanneer familielede negatief reageer teenoor iemand wat ferm standpunt inneem vir oortuigings wat van hulle s’n verskil.

Moet konflik in die familie ten alle koste vermy word? Die Bybel leer dat kinders aan hulle ouers gehoorsaam moet wees en dat vrouens aan hulle mans onderdanig moet wees (Efesiërs 5:22; 6:1). Maar dit beveel diegene wat God liefhet om “eerder aan God as heerser gehoorsaam [te] wees as aan mense” (Handelinge 5:29). Soms sal lojaliteit aan God jou dus beweeg om ’n besluit te neem wat nie deur party familielede goedgekeur word nie.

Hoewel die Bybel ’n duidelike onderskeid tref tussen ware en valse leringe, gun God elke mens die vryheid om te kies hoe hy of sy sal reageer (Deuteronomium 30:19, 20). Niemand moet gedwing word om op ’n manier te aanbid wat hy onaanvaarbaar vind of om tussen sy oortuigings en sy familie te kies nie. Veroorsaak ’n studie van die Bybel die verbrokkeling van gesinne? Nee. Trouens, in die Bybel word ’n man en vrou wat verskillende godsdienste beoefen, aangemoedig om as ’n gesin saam te bly.—1 Korintiërs 7:12, 13.

Oorkom jou vrese

Jy is dalk bang oor hoe die gemeenskap sal reageer as jy die Bybel saam met Jehovah se Getuies studeer. Mariamma sê: “My gesin was bekommerd dat ek nie ’n goeie man sou kon vind wat vir my sou kon sorg nie. Dit is hoekom hulle my Bybelstudie teëgestaan het.” Mariamma het op Jehovah God vertrou en aangehou om te studeer (Psalm 37:3, 4). Jy kan dieselfde doen. Dink eerder aan die voordele as om die gevolge te vrees. Die Bybel se boodskap verander mense se lewe en persoonlikheid ten goede. Hulle leer om onselfsugtige liefde vir hulle gesin te toon. Slegte gewoontes, soos skeltaal, gewelddadigheid en alkohol- en dwelmmisbruik, kan oorkom word (2 Korintiërs 7:1). Die Bybel bevorder heilsame eienskappe soos lojaliteit, eerlikheid en vlytigheid (Spreuke 31:10-31; Efesiërs 4:24, 28). Maak gerus ’n studie van die Bybel en kyk hoe dit jou tot voordeel strek as jy die leringe daarin in jou lewe toepas.

HET JY AL GEWONDER?

◼ Waarom moet jy jou godsdiensoortuigings ondersoek?—Spreuke 23:23; 1 Timoteus 2:3, 4.

◼ Hoe kan jy ware leringe identifiseer?—2 Timoteus 3:16; 1 Johannes 4:1.

◼ Moet jy toelaat dat familieteenstand jou verhinder om die Bybel te bestudeer?—Handelinge 5:29.

[Lokteks op bladsy 29]

Die Bybel se boodskap verander mense se lewe en persoonlikheid ten goede

[Prent op bladsy 29]

Mariamma en haar man