Hoe jongmense hulp kan vind

In ’n ideale wêreld sou alle ouers konsekwente en liefdevolle leiding en onderrigting aan hulle kinders gee. Hulle sou met hulle praat, vir hulle lees, saam met hulle eet, hulle verstaan. Ouers is egter nie volmaak nie. Die Bybel sê tereg: “Almal het gesondig en skiet te kort aan die heerlikheid van God.”—Romeine 3:23. As jy ’n jong persoon is, voel jy dalk dat jou huislewe nie juis ideaal is nie—en jy is moontlik reg. Daar is nogtans baie wat jy kan doen om jou angs te verminder en gelukkiger te wees. Kyk na net ’n paar maniere waarop die toepassing van Bybelbeginsels jou kan help.

Wenk 1

Kies assosiasie bo afsondering

“Wie hom afsonder, sal sy eie selfsugtige verlange soek; teen alle praktiese wysheid sal hy losbreek” (Spreuke 18:1). Party jongmense voel ongemaklik tussen mense en vind dit makliker om TV te kyk of ’n videospeletjie te speel. Ander is uiters skaam en sonder hulle dus af. Elizabeth is ’n meisie wat haarself beskryf as iemand wat “heeltyd skaam voel”. Sy sê: “My skaamheid is soos vrees. Ek vind dit baie moeilik om mense te nader en met hulle te praat.”

Hoe het Elizabeth die uitdaging van skaamheid die hoof gebied? Sy is een van Jehovah se Getuies, en as deel van haar aanbidding woon sy gereeld Christelike vergaderinge by. Elizabeth sê: “Al is ek so skaam, probeer ek om by elke vergadering met een persoon te praat. As ek dit nie regkry nie, probeer ek om nie mismoedig te voel nie. Ek konsentreer eerder op wat ek wel regkry. Ek vind dat ek regtig daarby baat gevind het om ander te leer ken.”

Skryf gerus die name van twee of drie mense neer wat jy graag beter wil leer ken. Neem jou voor om in die volgende week of wat iets nuuts oor een van hulle te leer. Skryf dan een goeie ding neer wat jy gedurende die volgende maand vir elkeen van hierdie mense kan doen, en doen dit dan.—Handelinge 20:35.

As jy jou van probleme en mense afsny, sal jy ongetwyfeld meer besorg oor jouself raak as wat gesond is. Aan die ander kant maan die Bybel ons om “nie uit persoonlike belangstelling ’n oog op net [ons] eie sake [te] hou nie, maar ook uit persoonlike belangstelling op dié van die ander” (Filippense 2:4). As jy hierdie beginsel in jou verhoudings met jou gesinslede en ander toepas, sal jy jou eie probleme in perspektief sien en dit beter kan hanteer.

Wenk 2

Vlug vir onsedelikheid

“Vlug vir onsedelikheid. Alle ander sondes wat ’n man pleeg, is buite sy liggaam, maar hy wat seksueel sondig, sondig teen sy eie liggaam” (1 Korintiërs 6:18, New International Version). Hoe kan jy die druk weerstaan om by onsedelikheid betrokke te raak, wanneer dit onder ander jongmense so algemeen is?

Eerstens moet jy hierdie onderwerp deurdink voordat jy voor druk of versoeking te staan kom. “Die skerpsinnige gee ag op sy voetstappe”, sê ’n wyse spreuk (Spreuke 14:15). Mbali, ’n jong vrou wat in Suid-Afrika woon, sê: “Op hoërskool het ’n jong man in my klas my aanhoudend gevra om met hom uit te gaan. Die meisies in die klas het druk op my geplaas om met hom uit te gaan omdat hy so aantreklik was—hy was ’n model en het vir die skool se sokkerspan gespeel. Hy was vir my aantreklik, maar ek het reeds besluit om nie my sedelike standaarde prys te gee nie. Vir my portuurs was daar nie werklik iets fout met los seks nie. Maar ek het geweet wat die verskil tussen reg en verkeerd is en het besluit wat ek sou doen lank voordat ek voor hierdie soort situasie te staan gekom het.”

Tweedens moet jy vir God se hulp bid om by sy sedelike standaarde te bly. Maggie, ’n meisie wat in Engeland woon, sê: “Gebed help my om die nodige krag te hê wanneer ek onder druk geplaas word om seks te hê. Ek dink nooit dat ek die situasie op my eie kan hanteer nie. Ek praat ook met my ouers oor die saak en soms bespreek ek die probleem met ander volwasse vriende.”

Wenk 3

Leer om empatie met jou ouers te hê

“Julle [moet] almal eensgesind wees, meegevoel betoon, broederlike geneentheid en tere medelye hê” (1 Petrus 3:8). Of jou ouers uitmekaargaan of nie en of hulle albei voltyds moet werk of nie, is dinge wat buite jou beheer is. Maar iets waaroor jy wel ’n mate van beheer het, is of jy gaan toelaat dat sulke uitdagings jou verhouding met hulle vernietig. Een manier waarop jy jou angs kan verminder en gelukkiger kan wees, is deur te leer om empatie met jou ouers te hê, deur die uitdagings waarmee hulle te kampe het, te probeer verstaan.

’n Meisie met die naam Amber het hierdie raad toegepas. Sy erken dat daar soms baie spanning, misverstande en frustrasie in haar verhouding met haar ma is. Nogtans sê sy: “My ma het al soveel in haar lewe deurgemaak. Sy het ons vier kinders op haar eie grootgemaak. Sy het altyd gesorg dat ons ’n dak oor ons kop en kos op die tafel het, asook klere om te dra. Ek bewonder werklik hoe sterk sy is, en ek hoop dat ek eendag dieselfde deursettingsvermoë sal toon as ek deur moeilike tye gaan.”

As jy jou in jou ouers se situasie probeer indink en die emosies probeer ervaar wat hulle ervaar, kan dit jou help om jou probleme in perspektief te hou. Dit kan jou ook help om jou ouers se goeie eienskappe raak te sien en na te volg.

’n Bron van betroubare raad

Die wenke hierbo is net ’n voorbeeld van die praktiese wysheid wat in God se Woord, die Bybel, gevind word. Namate jy meer oor hierdie boek leer, sal jy die betroubare raad wat dit voorsien, waardeer.a

Een manier waarop jy meer oor die Bybel kan leer, is deur met Jehovah se Getuies te assosieer en die Bybel saam met hulle te studeer. Onder hierdie mense sal jy ware vriende vind wat jou deur moeilike tye sal ondersteun en jou sal help om die Bybel se wyse raad in jou lewe toe te pas. Om volgens Bybelstandaarde te lewe, is beslis nie maklik nie. Maar as jy hierdie lewenswyse kies, sal jy jouself vir altyd bevoordeel.—Jesaja 48:17, 18.

[Voetnoot]

[Venster/Prente op bladsy 8, 9]

Wat tieners van hulle ouers nodig het

Tyd saam met hulle: Jehovah God het vir ouers in Israel gesê dat hulle dikwels met hulle kinders moet praat—“wanneer jy in jou huis sit en wanneer jy op die pad loop” (Deuteronomium 6:6, 7). Dit vereis dat ouers tyd saam met hulle kinders moet deurbring. Jesus het klaarblyklik gevoel dat kinders sy tyd verdien. Hoe het Jesus byvoorbeeld gereageer toe “mense . . . jong kinders na hom toe begin bring [het] sodat hy hulle sou aanraak”? “Hy het die kinders in sy arms geneem en hulle begin seën” (Markus 10:13, 16). Wat ’n goeie voorbeeld vir ouers!

Eerlike, openhartige kommunikasie: Die Bybel sê: “Planne misluk waar daar geen vertroulike gesprekke is nie” (Spreuke 15:22). Vertroulike gesprekke met jou kinders was nodig toe hulle jonger was. Dit is veral gedurende die tienerjare noodsaaklik, wanneer jongmense waarskynlik minder by die huis is en meer tyd saam met skoolmaats of ander metgeselle deurbring. As daar geen vertroulike gesprekke is nie—geen eerlike en openhartige kommunikasie tussen kinders en ouers nie—kan tieners vreemdelinge in die huis word.

Gepaste dissipline: Dissipline dra die gedagte oor van regstelling en opleiding—hoewel dit ook straf kan insluit. “Iemand wat dwaas is, minag die dissipline van sy vader, maar iemand wat op teregwysing ag gee, is skerpsinnig”, sê Spreuke 15:5. ’n Tiener kan nie “op teregwysing ag gee” as dit nie gegee word nie. Ouers moet natuurlik gebalanseerd wees wanneer hulle tieners dissiplineer. Hulle moenie so streng wees dat hulle hulle kinders frustreer, dalk selfs hulle kinders se selfvertroue ’n knak gee nie (Kolossense 3:21). Tog wil ouers nie permissief wees en nalaat om hulle kinders noodsaaklike opleiding te gee nie. Permissiwiteit kan rampspoedig wees.b

[Voetnoot]