Sleutel 6: Vergifnis

“Hou aan om mekaar te verdra en mekaar vryelik te vergewe.”—Kolossense 3:13.

Wat dit behels. Suksesvolle egpare leer uit die verlede; maar hulle hou nie boek van ou griewe en gebruik dit dan om veralgemenings te maak, soos “Jy is altyd laat” of “Jy luister nooit” nie. Die man en vrou glo albei dat “dit . . . mooi [is] om die oortreding oor te sien”.—Spreuke 19:11.

Waarom dit saak maak. God is “vergewensgesind”, maar dit is nie altyd die geval met mense nie (Psalm 86:5). Ou onregte wat nie reggestel word nie, kan lae van gegriefdheid veroorsaak wat opbou totdat dit voel asof vergifnis onmoontlik is. Albei huweliksmaats onttrek hulle dalk emosioneel en gee nie om hoe die ander een voel nie. Al twee voel vasgevang in ’n liefdelose huwelik.

Probeer hierdie oefening. Kyk na ou foto’s van jou en jou maat wat vroeër in julle huwelik of gedurende julle hofmakery geneem is. Probeer weer die liefde aanwakker wat jy gehad het voordat probleme opgeduik het en jou beskouing van jou maat vertroebel het. Dink dan aan die eienskappe wat jou aanvanklik tot jou maat aangetrokke laat voel het.

◼ Watter eienskappe van jou maat bewonder jy nou die meeste?

◼ Dink aan ’n paar opsigte waarin dit ’n positiewe uitwerking op jou kinders kan hê as jy ’n meer vergewensgesinde persoon is.

Stel ’n doelwit. Dink aan een of twee maniere waarop jy kan verseker dat jy nie ou koeie uit die sloot grawe wanneer julle ’n meningsverskil het nie.

Prys jou maat vir die eienskappe wat jy in hom of haar bewonder.—Spreuke 31:28, 29.

Dink aan ’n paar maniere waarop jy vergewensgesind teenoor jou kinders kan wees.

Bespreek vergifnis met jou kinders en hoe die vermoë om te vergewe elke gesinslid tot voordeel strek.

[Prent op bladsy 8]

Wanneer jy vergewe, is die skuld gekanselleer. Moet dit nie probeer terugeis nie