Die Bybel se beskouing

Wat van saambly voor die huwelik?

SOU jy ’n pak of ’n rok koop sonder om dit eers aan te pas? Waarskynlik nie. As jy later uitvind dat die kledingstuk jou nie pas nie, sou jy jou tyd en geld gemors het.

Baie mense volg ’n soortgelyke redenasie wanneer dit by die huwelik kom. Hulle voel dat dit beter is vir ’n man en vrou om saam te bly voordat hulle hulle in die huwelik verbind. ‘As dinge nie uitwerk nie’, redeneer hulle, ‘kan ’n man en vrou uitmekaargaan sonder om die ingewikkelde en duur proses van egskeiding deur te maak.’

Dalk het party wat so voel, gesien hoe ’n getroude vriend of vriendin fisiese of emosionele mishandeling moes verduur. Of hulle het moontlik die traumatiese gevolge van ’n liefdelose huwelik gesien. Daarom beskou hulle dit dalk as ’n verstandige voorsorgmaatreël om eers saam te bly.

Wat is die Bybel se beskouing van hierdie saak? Om hierdie vraag te beantwoord, moet ons eers kyk na wat God se Woord oor die instelling van die huwelik sê.

“Een vlees”

Die Bybel bevorder ’n verhewe beskouing van die huwelik, en dit is nie verbasend nie, aangesien die reëling deur Jehovah God self goedgekeur en ingestel is (Genesis 2:21-24). Van die begin af was dit Jehovah se voorneme dat ’n man en vrou deur middel van die huwelik “een vlees” sal word (Genesis 2:24). Nadat Jesus hierdie Skrifgedeelte aangehaal het, het hy bygevoeg: “Wat God . . . onder een juk saamgevoeg het, moet geen mens skei nie.”—Matteus 19:6.

Dit is wel so dat party wat trou, later sal skei.a Maar wanneer dit gebeur, is dit nie omdat daar iets fout is met die huweliksreëling nie; dit is eerder omdat een of al twee maats nie hulle huweliksgeloftes nagekom het nie.

Ter toeligting: Gestel ’n man en vrou besit ’n motor, maar hulle hou dit nie volgens die vervaardiger se instruksies in stand nie. Wie se skuld is dit as die motor dan probleme gee? Die vervaardiger of die eienaars s’n, wat dit nie gereeld gediens het nie?

Dieselfde beginsel geld vir die huwelik. Wanneer ’n man en vrou hulle verhouding in stand hou en vasbeslote is om hulle probleme uit te stryk deur Bybelbeginsels toe te pas, is dit minder waarskynlik dat hulle sal skei. Daar is ’n gevoel van veiligheid in die huwelik omdat elke maat hom persoonlik daartoe verbind het. Dan word die huwelik die grondslag vir ’n liefdevolle verhouding.

‘Onthou julle van hoerery’

Nogtans wonder party dalk: ‘Waarom nie eers saambly nie? Sou dit nie respek vir die heiligheid van die huwelik toon om die verhouding eers op die proef te stel voordat jy so ’n verbintenis aangaan nie?’

Die Bybel se antwoord is duidelik. Paulus het geskryf: ‘Onthou julle van hoerery’ (1 Tessalonisense 4:3). Die woord “hoerery” verwys na enige geslagsomgang buite die huwelik. Dit sluit geslagsomgang in tussen ’n paartjie wat saambly, al is hulle van plan om te trou. Volgens die Bybel sou dit dus verkeerd wees vir ’n paartjie om saam te bly—al wil hulle later trou.

Is die Bybel se beskouing ouderwets? Party dink dalk so. In baie lande word dit immers as normaal beskou om saam te bly—hetsy die paartjie wil trou of nie. Maar dink aan die gevolge. Het dié wat saambly, die sleutel tot gesinsgeluk gevind? Is hulle gelukkiger as paartjies wat trou? Is paartjies wat voor die huwelik saamgebly het, oor die algemeen meer getrou aan mekaar as dié wat nie saamgebly het nie? Volgens studies is die teenoorgestelde waar. Trouens, daar is bevind dat egpare wat vroeër saamgebly het, meer dikwels huweliksprobleme ondervind en skei.

Party deskundiges sal sê dat sulke studies nie betroubaar is nie. “Mense wat besluit om nie [saam te bly] voordat hulle trou nie, val klaar in ’n ander kategorie as dié wat besluit om eers [saam te bly]”, skryf een sielkundige. Sy beweer dat dit nie werklik ’n verskil maak of paartjies saambly of nie, maar of hulle “waarde heg aan die huwelik”.

Selfs al is dit waar, beklemtoon dit bloot hoe belangrik dit is om God se beskouing van die huwelik te verkry. Die Bybel sê: “Laat die huwelik onder almal eerbaar wees” (Hebreërs 13:4). Wanneer ’n man en vrou die gelofte aflê om een vlees te bly en dan respek vir die huweliksreëling toon, smee hulle ’n band wat nie maklik verbreek kan word nie.—Prediker 4:12.

Om terug te keer na die illustrasie in die inleiding; dit maak wel sin om ’n pak of ’n rok aan te pas voordat jy dit koop. Maar om saam te bly, kan nie daarmee vergelyk word nie. Wat wel daarmee ooreenstem, is om genoeg tyd te neem om die persoon wat jy as ’n huweliksmaat oorweeg, te leer ken. Hierdie noodsaaklike stap wat dikwels oor die hoof gesien word, is een van die talle sleutels tot ’n suksesvolle gesinslewe.

[Voetnoot]

HET JY AL GEWONDER?

◼ Waarom beperk die Bybel seksuele intimiteit tot egpare?—Psalm 84:11; 1 Korintiërs 6:18.

◼ Na watter eienskappe moet jy in ’n maat soek?—Rut 1:16, 17; Spreuke 31:10-31.

‘SONDE TEEN JOU EIE LIGGAAM’

Die Bybel sê: “Hy wat hoerery beoefen, sondig teen sy eie liggaam” (1 Korintiërs 6:18). In onlangse dekades is die waarheid van hierdie woorde bewys deur die feit dat miljoene aan vigs en ander seksueel oordraagbare siektes gesterf het. Maar dit is nie al nie. Studies toon dat depressie en pogings tot selfmoord algemener is onder jongmense wat seksueel aktief is. Promiskuïteit het ook ongewenste swangerskap tot gevolg, wat tot die versoeking kan lei om ’n aborsie te hê. In die lig van hierdie feite, kan ons tot die slotsom kom dat die Bybel se sedewet nie ouderwets is nie.