Jongmense vra

Sal seks ons verhouding verbeter?

Heather gaan nog net twee maande met Mike uit, maar dit voel vir haar asof sy hom al haar hele lewe lank ken. Hulle SMS mekaar gedurig, hulle gesels ure aaneen oor die telefoon en hulle kan selfs mekaar se sinne voltooi! Maar nou, terwyl hulle in ’n geparkeerde motor in die maanlig sit, wil Mike meer doen as om net te gesels.

Gedurende die afgelope twee maande het Mike en Heather net hande vasgehou en mekaar vlugtig gesoen. Heather wil nie verder gaan nie. Maar sy wil Mike ook nie verloor nie. Niemand anders laat haar so mooi, so spesiaal, voel nie. ‘Wat meer is’, sê sy vir haarself, ‘ek en Mike is mos verlief.’

JY KAN seker raai waarop hierdie scenario afstuur. Maar wat jy dalk nie besef nie, is hoe drasties seks dinge vir Mike en Heather sal verander—en nie met goeie gevolge nie. Dink hieraan:

As jy ’n fisiese wet ignoreer, soos die swaartekragwet, sal jy die gevolge dra. Dieselfde geld as jy ’n sedewet oortree, soos die een wat sê: “Onthou [jou] van hoerery”a (1 Tessalonisense 4:3). Wat is die gevolge as ’n mens ongehoorsaam is aan hierdie gebod? Die Bybel sê: “Hy wat hoerery beoefen, sondig teen sy eie liggaam” (1 Korintiërs 6:18). Hoe so? Kyk of jy hieronder drie skadelike gevolge kan neerskryf wat diegene kan ondervind wat hulle aan voorhuwelikse seks skuldig maak.

1. ․․․․․

2. ․․․․․

3. ․․․․․

Kyk nou na wat jy neergeskryf het. Het jy dinge ingesluit soos seksueel oordraagbare siektes, ongewenste swangerskappe of die verlies van God se guns? Dit is beslis verwoestende gevolge wat oor enigiemand kan kom wat God se sedewet oor hoerery oortree.

Jy kom dalk nogtans in die versoeking om seks te hê. ‘Niks sal met my gebeur nie’, redeneer jy miskien. Is dit nie iets wat almal doen nie? Jou skoolmaats spog oor hulle eskapades, en dit lyk nie of hulle enigiets oorkom nie. Dalk voel jy, soos Heather in die scenario aan die begin van die artikel, dat seks jou en jou vriend(in) nader aan mekaar sal bring. Wat meer is, ’n mens wil mos nie gespot word omdat jy ’n maagd is nie. Is dit nie beter om in te gee nie?

Wag ’n bietjie! In die eerste plek doen nie almal dit nie. Jy lees dalk wel van statistiek wat toon dat ’n kommerwekkende aantal jongmense seks het. Byvoorbeeld, volgens ’n studie in die VSA is 2 uit 3 jongmense in dié land seksueel aktief teen die tyd dat hulle met hoërskool klaarmaak. Maar dit beteken ook dat 1 uit 3—’n redelike aantal—nie seksueel aktief is nie. Maar wat van dié wat wel seksueel aktief is? Navorsers het gevind dat baie van hierdie jongmense een of meer van die volgende wrede ontnugterings ervaar.

Wrede ontnugtering #1: ONTSTELTENIS. Die meeste jongmense wat voorhuwelikse seks gehad het, sê dat hulle agterna daaroor spyt was.

Wrede ontnugtering #2: WANTROUE. Nadat ’n paartjie seks gehad het, begin al twee wonder: ‘Met wie anders het hy/sy al seks gehad?’

Wrede ontnugtering #3: DISLOJALITEIT. Nadat ’n seun met sy meisie seks gehad het, is die moontlikheid groter dat hy haar sal los en met iemand anders sal begin uitgaan.

Wrede ontnugtering #4: TELEURSTELLING. Diep in haar hart sou ’n meisie iemand verkies het wat haar sou beskerm, nie gebruik nie.

Dink ook hieraan: Baie seuns het al gesê dat hulle nooit met ’n meisie sal trou met wie hulle seks gehad het nie. Waarom nie? Omdat hulle iemand met hoër sedes verkies!

Verbaas dit jou—maak dit jou dalk selfs kwaad? Dan moet jy, of jy nou ’n meisie of ’n seun is, die volgende onthou: Die werklikheid van voorhuwelikse seks verskil hemelsbreed van wat in films en op TV uitgebeeld word. Die vermaaklikheidsbedryf verheerlik tienerseks en laat dit soos ware liefde lyk. Maar moenie naïef wees nie! Diegene wat jou probeer ompraat om voorhuwelikse seks te hê, soek net hulle eie belang (1 Korintiërs 13:4, 5). Sal enigiemand wat werklik vir jou lief is, jou fisiese en emosionele welsyn in gevaar stel? (Spreuke 5:3, 4). En sal enigiemand wat werklik vir jou omgee, jou in die versoeking bring om jou verhouding met God op die spel te plaas?—Hebreërs 13:4.

Die feit is dat jy, as jy voor die versoeking swig om voorhuwelikse seks te hê, jouself verlaag deur iets kosbaars weg te gee (Romeine 1:24). Geen wonder dat baie agterna leeg en niks werd voel nie, asof hulle onverskillig toegelaat het dat ’n kosbare deel van hulle gesteel word! Moenie toelaat dat dit met jou gebeur nie. As iemand jou probeer ompraat om seks te hê deur te sê: “As jy vir my lief is, sal jy dit doen”, moet jy ferm antwoord: “As jy vir my lief is, sal jy dit nie vra nie!”

Jou liggaam is veels te kosbaar om weg te gee. Wys dat jy die karaktervastheid het om God se gebod te gehoorsaam om jou van hoerery te onthou. Later, as jy eendag trou, kan jy wel seks hê. En jy sal dit ten volle kan geniet, sonder die sorge, spyt en onsekerheid wat voorhuwelikse seks so dikwels tot gevolg het.—Spreuke 7:22, 23; 1 Korintiërs 7:3.

Nog artikels uit die reeks “Jongmense vra” kan gevind word op die webwerf www.watchtower.org/ype

[Voetnoot]

IETS OM OOR TE DINK

● Waarom is dit vir jou verkeerd om voorhuwelikse seks te hê, al is dit dalk vir die onvolmaakte vlees aanloklik?

● Wat sal jy doen as iemand jou vra om seks te hê?

[Venster/Prente op bladsy 27]

WAT JOU PORTUURS SÊ

“Om net nee te sê, sal nie keer dat die persoon wat jou vra, weer probeer nie. Dis hóé jy weier. As jy nee sê, maar onseker klink, sal die persoon dit agterkom. Jy moet ferm wees!”

“Om net nee te sê, werk nie altyd nie. Selfs as jy jou oortuigings verduidelik, werk dit dalk nie. Ek weet van party persone wat spog dat hulle ’n Christen kon ‘breek’. Soms moet jy net wegstap. Dis moeilik, maar dit werk.”

“As ’n Christen het jy eienskappe wat jou vir ander aantreklik sal maak. Daarom moet jy wakker wees en weier wanneer ander wil hê dat jy iets onsedeliks moet doen. Respekteer daardie eienskappe. Moenie ingee nie!”

[Prente]

Diana

James

Joshua

[Venster op bladsy 28]

WEES HAAR HELD!

Gaan jy met ’n meisie uit? Gee jy regtig vir haar om? Dan moet jy vir haar wys dat jy . . . 

● die krag het om God se wette te gehoorsaam

● die wysheid het om omstandighede te vermy wat julle in die versoeking kan bring

● die liefde het om haar belange eerste te stel

As jy dit doen, sal jou meisie waarskynlik voel soos die Sulammitiese meisie, wat gesê het: “My beminde is myne en ek is syne” (Hooglied 2:16). Kortom, jy sal haar held wees!

Sien Spreuke 22:3; 1 Korintiërs 6:18; 13:4-8.

[Venster op bladsy 28]

WENK

Volg gerus hierdie reël wat gedrag teenoor die teenoorgestelde geslag betref: As jy iets nie voor jou ouers sou wou doen nie, dan behoort jy dit glad nie te doen nie.

[Prent op bladsy 28]

Diegene wat voorhuwelikse seks het, misbruik ’n gawe van God. Dit is soos om ’n pragtige skildery wat iemand jou gegee het, as ’n deurmat te gebruik