Ons beskou die wêreld
’n Omsendbrief van pous Benediktus XVI sê: “Daar is ’n groot behoefte . . . aan ’n hervorming van die Verenigde Nasies asook ekonomiese instellings en die internasionale finansiewese sodat die konsep van die gemeenskap van nasies ware tande kan verkry.”—L’OSSERVATORE ROMANO; hulle kursiveer.
“Een uit drie Oekraïners rook omtrent ’n pakkie sigarette per dag.”—EXPRESS, DIE OEKRAÏNE.
In die Verenigde State het 44 persent van tienerseuns met wie ’n onderhoud gevoer is, gesê dat hulle “al ten minste een naakfoto van ’n meisie in hulle klas op die Internet of op ’n selfoon gesien het”.—TIME, VSA.
“’n Sombere mylpaal”
Oorlog, droogte, politieke onbestendigheid, hoë voedselpryse en armoede het die mensdom “’n sombere mylpaal” laat bereik, sê die Associated Press. Daar is nou meer as eenmiljard verhongerdes in die wêreld. Volgens Josette Sheeran van die VN se Wêreldvoedselprogram “is ’n honger wêreld ’n gevaarlike wêreld. . . . Sonder kos het mense net drie opsies: Hulle betoog, hulle emigreer of hulle sterf. Nie een van hierdie opsies is aanvaarbaar nie.” Wat meer is, die aantal honger mense neem vinniger toe as die wêreldbevolking. Selfs in ontwikkelde lande het die aantal ondervoede mense met 15,4 persent toegeneem.
Die waarde van slaaptydstories
Wanneer ouers met slapenstyd vir hulle kinders lees, doen hulle meer as om die kinders net aan die slaap te sus. Navorsers sê dat hierdie bedrywigheid kinders se taalvermoëns verbeter, hulle geheue verskerp en hulle motoriese vaardighede help ontwikkel omdat hulle leer om die bladsye vas te hou en dit om te blaai. “Maar nog belangriker, . . . wanneer daar hardop gelees word, skenk ouer en kind aandag aan mekaar en deel hulle in mekaar se emosies”, sê die koerant The Guardian. “Dit versterk die gedagte dat lees ’n aangename bedrywigheid is.” En volgens professor Barry Zuckerman, wat die studie gelei het, “leer kinders op die ou end om lief te wees vir boeke omdat hulle [dit] lees saam met iemand vir wie hulle lief is”.
Tevrede koeie, meer melk
“’n Koei met ’n naam produseer meer melk as een sonder ’n naam”, sê wetenskaplikes van die Universiteit van Newcastle, Engeland. Trouens, wanneer koeie as individuele diere behandel word, kan dit hulle melkproduksie met byna 250 liter per jaar laat toeneem. Waarom? “Net soos mense beter reageer op persoonlike aandag, voel koeie ook gelukkiger en meer ontspanne as hulle ’n bietjie meer persoonlike aandag kry”, sê dr. Catherine Douglas van die universiteit se Fakulteit van Landbou, Voedsel en Plattelandse Ontwikkeling. “Ons studie toon wat talle goeie, besorgde boere lank reeds glo”, verduidelik sy. “As ons meer waarde heg aan die individuele dier, soos om ’n koei se naam te gebruik om haar te roep of meer met die dier te doen te hê terwyl sy grootword, kan ons nie net die dier se welsyn en haar beskouing van mense verbeter nie, maar ook haar melkproduksie verhoog.”