Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • g 12/10 bl. 12-13
  • God het my in al my beproewinge vertroos

Video nie beskikbaar nie.

Jammer, die video kon nie laai nie.

  • God het my in al my beproewinge vertroos
  • Ontwaak!—2010
  • Onderhofies
  • Soortgelyke materiaal
  • Ek ontvang ware vertroosting
  • Die uitdagings
  • ’n Produktiewe, bevredigende lewe
  • Dankbaar vir Jehovah se onfeilbare ondersteuning
    Die Wagtoring kondig Jehovah se Koninkryk aan—1993
  • Jehovah het my krag gegee
    Die Wagtoring kondig Jehovah se Koninkryk aan—1990
  • Uit die mond van kinders
    Die Wagtoring kondig Jehovah se Koninkryk aan—1984
  • Hoe ek by God se sorg baat gevind het
    Ontwaak!—1995
Sien nog
Ontwaak!—2010
g 12/10 bl. 12-13

God het my in al my beproewinge vertroos

Soos vertel deur Victoria Colloy

’n Dokter het vir my ma gesê: “Ons kan niks meer vir jou dogter doen nie. Sy sal vir die res van haar lewe met krukke en beenstutte moet loop.” Ek was verpletter! Wat kon ek doen as ek nie kon loop nie?

EK IS op 17 November 1949 in Tapachula, Chiapas, Mexiko, gebore. Ek was ’n gelukkige, gesonde baba, die eerste van vier kinders. Maar toe ek ses maande oud was, het ek skielik opgehou kruip en kon ek nie veel beweeg nie. Twee maande later kon ek glad nie beweeg nie. Plaaslike dokters was uit die veld geslaan, want ander babas in Tapachula het soortgelyke simptome gehad. Daarom het ’n ortopedis van Mexikostad ons kom ondersoek. Daar is vasgestel dat ons poliomiëlitis, oftewel polio, het.

Toe ek drie was, het ek operasies aan my heup, knieë en enkels ondergaan. Later is my regterskouer ook erg aangetas. Toe ek ses was, is ek na Mexikostad geneem om verdere behandeling by ’n kinderhospitaal te ontvang. My ma het op ’n plaas in Chiapas gewerk, en daarom het ek by my ouma in Mexikostad gebly. Maar ek was die meeste van die tyd in ’n hospitaal.

Toe ek omtrent agt jaar oud was, het ek ’n bietjie vordering gemaak. Maar later het my toestand versleg, en ek het die bietjie beweeglikheid wat ek gehad het, geleidelik verloor. Dokters het toe gesê dat ek vir die res van my lewe met krukke en beenstutte sal moet loop.

Teen die tyd dat ek 15 was, het ek al 25 operasies ondergaan. Dit was aan my rugstring, bene, knieë, enkels en tone. Ná elke operasie het dit my ’n ruk geneem om te herstel. Ná een van die operasies is my bene in gips gesit. Toe die gips afgehaal is, moes ek pynlike oefeninge doen.

Ek ontvang ware vertroosting

Toe ek 11 was, het my ma kom kuier terwyl ek van ’n operasie herstel het. Sy het geleer dat Jesus die siekes genees het en selfs ’n verlamde man laat loop het. Sy het vir my ’n Wagtoring gegee, ’n tydskrif wat deur Jehovah se Getuies uitgegee word, waarin sy hierdie dinge geleer het. Ek het dit onder my kussing weggesteek, maar dit het eendag verdwyn. Die verpleegsters het die tydskrif gevind en dit weggevat. Hulle het met my geraas omdat ek dit gelees het.

Omtrent ’n jaar later het my ma weer van Chiapas gekom om my te besoek. Teen dié tyd het sy die Bybel saam met die Getuies gestudeer. Sy het die boek Van die Verlore Paradys tot die Herwonne Paradysa vir my gebring. My ma het gesê: “As jy in die beloofde nuwe wêreld wil lewe waar Jesus jou gesond sal maak, moet jy die Bybel studeer.” Daarom het ek toe ek 14 was saam met die Getuies begin studeer, al het my ouma my teëgestaan. Die volgende jaar moes ek die hospitaal verlaat omdat dit net vir jong kinders was.

Die uitdagings

Ek het baie terneergedruk geraak. Weens my ouma se teenstand moes ek na Chiapas terugkeer en by my ouers gaan woon. Maar daar was probleme by die huis omdat my pa ’n alkoholis was. Ek het ’n ruk lank gevoel dat die lewe nie die moeite werd is nie. Ek het dit oorweeg om my te vergiftig. Maar namate ek voortgegaan het om die Bybel te studeer, het my beskouing verander. Die Bybel se belofte van ’n paradysaarde het my gelukkig gemaak.

Ek het met ander begin praat oor die wonderlike hoop wat die Bybel bied (Jesaja 2:4; 9:6, 7; 11:6-9; Openbaring 21:3, 4). Op 8 Mei 1968, toe ek 18 was, is ek uiteindelik as een van Jehovah se Getuies gedoop. Sedert 1974 bestee ek meer as 70 uur per maand daaraan om ander te vertel van die hoop wat my die wil gegee het om te lewe.

’n Produktiewe, bevredigende lewe

Later het ek en my ma getrek na die stad Tijuana, naby die grens tussen Mexiko en die Verenigde State. Ek en my ma woon saam in ’n plek wat net reg is vir ons. Ek kan met beenstutte en krukke in die huis rondbeweeg en gebruik ’n rolstoel wanneer ek kook, wasgoed was en stryk. In die bediening gebruik ek ’n elektriese karretjie wat spesiaal vir my aangepas is.

Ek bespreek Bybelleringe nie net met mense op straat en by hulle huis nie, maar besoek ook gereeld ’n nabygeleë hospitaal om met diegene wat buite vir mediese behandeling wag, oor die Bybel te praat. Nadat ek met hulle gesels het, ry ek met my elektriese karretjie na die mark toe om te koop wat ons nodig het en dan gaan ek terug huis toe om my ma met die kos en huiswerk te help.

Ek verkoop tweedehandse klere om in ons finansiële behoeftes te voorsien. My ma is nou 78 en kan nie baie doen nie omdat sy drie hartaanvalle gehad het. Ek sorg dus dat sy haar medisyne kry en haar dieet volg. Ten spyte van ons swak gesondheid probeer ons om die gemeentelike vergaderinge by te woon. Meer as 30 mense met wie ek oor die jare die Bybel gestudeer het, neem nou ook aan die Christelike bediening deel.

Ek is oortuig dat hierdie Bybelbelofte uiteindelik vervul sal word: “Dan [in God se nuwe wêreld] sal die kreupele net soos ’n takbok klim.” Intussen vind ek vertroosting in God se woorde: “Moenie bang wees nie, want ek is met jou. Moenie rondkyk nie, want ek is jou God. Ek sal jou versterk. Ek sal jou werklik help. Ek sal jou werklik stewig vashou met my regterhand van regverdigheid.”—Jesaja 35:6; 41:10.b

[Voetnote]

a Uitgegee deur Jehovah se Getuies in 1958, maar nou uit druk.

b Victoria Colloy is op 30 November 2009 op 60-jarige ouderdom oorlede. Haar ma is op 5 Julie 2009 oorlede.

[Prent op bladsy 12]

Met beenstutte toe ek sewe was

[Prent op bladsy 13]

In die bediening ry ek met ’n elektriese karretjie wat spesiaal vir my aangepas is

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel