Sal godsdiens ooit vrede bevorder?

“KOM ons maak die wêreld ’n beter plek. Kom ons raak ontslae van godsdiens.” Dit is wat die Nederlandse filosoof Floris van den Berg voorstel in sy gepubliseerde lesing met die titel: “Hoe om van godsdiens ontslae te raak, en waarom.” Regoor die wêreld bevorder deskundiges op verskeie vakgebiede eweneens die idee dat godsdiens afgeskaf moet word.

“Die wêreld moet wakker skrik uit sy lang nagmerrie van godsdienstigheid”, sê die Nobelpryswenner en fisikus Steven Weinberg. Die idee dat die euwels van hierdie wêreld grootliks verminder kan word deur godsdiens uit die weg te ruim, het in onlangse jare duidelik na vore gekom. Boeke wat teen godsdiens gemik is, neem toe en is redelik gewild.

Vooraanstaande wetenskaplikes het bymekaargekom om besprekings te hou oor wat hulle beskou as die dringende behoefte om van godsdiens ontslae te raak. Al hoe meer ateïste spreek hulle haat vir godsdiens openlik in die media uit. Is hierdie gerespekteerde denkers op die regte spoor?

Ware godsdiens?

As alle godsdienste vals was en daar geen God was nie, sou dit dalk redelik gewees het om van godsdiens ontslae te raak. Maar sê nou daar is ’n God? Sê nou daar is ’n groep mense op aarde wat God werklik verteenwoordig—’n ware godsdiens?

’n Noukeurige studie van die geskiedenis van godsdiens wys op een vorm van aanbidding wat heeltemal anders is as alle ander godsdienste. Dit is ’n vorm van aanbidding wat vandag deur betreklik min mense beoefen word. Hierdie godsdiens is deur Jesus Christus en sy apostels begin. Maar dit word nie verteenwoordig deur wat die Christendom al eeue lank beoefen nie.

Wat is die verskil tussen die Christendom en die ware godsdiens wat Jesus Christus begin het? Wel, daar is baie verskille. Kom ons kyk na een.

“Geen deel van hierdie wêreld nie”

Die eerste Christene het nie kant gekies in politieke geskille nie. Dit stem ooreen met die neutrale standpunt wat Jesus self ingeneem het. Die Bybel toon dat Jesus by ten minste twee geleenthede volstrek geweier het om ’n politieke heerser te word (Matteus 4:8-10; Johannes 6:15). Jesus het sy dissipels selfs bestraf omdat hulle geweld wou gebruik om te keer dat hy in hegtenis geneem word.—Matteus 26:51, 52; Lukas 22:49-51; Johannes 18:10, 11.

Toe die Romeinse goewerneur van Judea spesifieke vrae gevra het oor Jesus se beweerde politieke strewes, het Jesus sake reggestel deur te sê: “My koninkryk is geen deel van hierdie wêreld nie. As my koninkryk ’n deel van hierdie wêreld was, sou my dienaars geveg het sodat ek nie aan die Jode oorgelewer word nie. Maar my koninkryk is nou eenmaal nie uit hierdie bron nie” (Johannes 18:36). Dit is duidelik dat Jesus nie betrokke geraak het by die politieke en militaristiese groepe van sy dag nie.

Jesus se dissipels het sy voorbeeld nagevolg. ’n Studie oor die rol van godsdiens in oorlog wat saamgestel is deur die span navorsers wat vroeër in hierdie reeks genoem is, verduidelik: “Die vroeë Christene het in geweldloosheid geglo. . . . Die meeste Christene het geweier om by die leër aan te sluit en te veg.” Die leringe van Jesus en sy apostels het beklemtoon dat ’n mens liefde moet betoon aan jou naaste, wat vreemdelinge en dié van ander etniese agtergronde en rasse insluit (Handelinge 10:34, 35; Jakobus 3:17). Hierdie godsdiens het inderdaad vrede bevorder.

Later is die oorspronklike opvattings van die Christelike godsdiens besmet deur die verdelende invloed van filosofie, tradisie en nasionalisme. Die voorgenoemde geskiedkundige verslag oor die rol wat godsdiens in gewapende konflikte speel, sê: “[Die Romeinse keiser] Konstantyn se bekering het tot die militarisering van die Christelike beweging gelei—hulle is nie meer deur die medelydende leringe van Christus gerig nie, maar is eerder aangedryf deur die Keiser se doelwitte om groter politieke mag te verkry en gebiede te verower. Christene, insluitende die Keiser, was verplig om godsdiens te gebruik om oorlog te regverdig.” ’n Valse vorm van die Christelike geloof het te voorskyn gekom.

’n Groep wat “uniek” is

Is die oorspronklike Christelike geloof vir altyd verlore? Geensins. Daar is vandag een groep wat gerus ondersoek kan word. Jehovah se Getuies volg die eerste Christene se voorbeeld soos geen ander godsdiensgroep dit doen nie. Hulle het geen bande met enige godsdiens in die Christendom nie. The Encyclopedia of Religion beskryf hulle as “uniek” omdat hulle “die gesag van die Bybel, wat tradisie heeltemal vervang,” erken en al hulle opvattings daarop grond.

Soos die eerste Christene kies Jehovah se Getuies nie kant in politieke konflikte nie. ’n Dokument wat deur die Oekraïne se Nasionale Akademie vir die Wetenskappe gepubliseer is, sê dat Jehovah se Getuies daarna streef om “rasse-, nasionale, godsdiens-, maatskaplike en ekonomiese verskille” te oorkom. Die studie verduidelik dat Jehovah se Getuies nie deelneem aan “bedrywighede teen die staat” nie en dat hulle “wetsgehoorsame burgers van hulle land” is.

Professor Wojciech Modzelewski, van die Universiteit van Warskou in Pole, het in sy boek Pacifism and Vicinity geskryf: “Jehovah se Getuies vorm vandag die grootste gemeenskap ter wêreld wat beswaar maak teen oorloë.” Omdat Jehovah se Getuies die voorbeeld van die eerste-eeuse Christene nougeset volg, kan daar gesê word dat hulle daarin geslaag het om die vorm van aanbidding te herstel wat Christus en sy apostels begin het. Dit is die soort Christelike godsdiens wat voorwaar vrede bevorder.—Sien die venster op die volgende bladsy.

’n Blink toekoms

Dit is wel so dat talle opregte aanbidders—en selfs ’n aantal godsdiensleiers—die huigelagtigheid van hulle eie godsdiens ontstellend vind. Die nodige erkenning moet gegee word aan die talle godsdienstige mense wat daarna streef om vrede en eenheid in die wêreld te bevorder.

Maar ongeag hoe opreg mense is, hulle vermoë om die wêreld se probleme op te los, is beperk. Die eertydse profeet Jeremia het geskryf dat “aan die mens sy weg nie behoort nie. Dit behoort nie aan die mens wat loop om sy voetstappe te rig nie.”—Jeremia 10:23.

Maar ’n blink toekoms lê voor. God se Woord leer dat ’n vreedsame nuwe mensegemeenskap op die aarde sal woon. Hierdie nuwe gemeenskap sal ’n ware broederskap wees. Alle rasse sal in eenheid saamwoon, en die mensdom sal nie verdeel word deur landsgrense, etniese haat of godsdiensideologieë nie. Die ware aanbidding van Jehovah God sal die grondslag van hierdie eenheid vorm.

Die Bybel voorspel ook die ondergang van godsdiens wat God oneer aandoen. Jesus het gesê: “Elke koninkryk wat teen homself verdeeld is, word verwoes, en elke stad of huis wat teen homself verdeeld is, sal nie bly staan nie” (Matteus 12:25). God sal uiteindelik seker maak dat hierdie woorde aangaande alle valse godsdiens bewaarheid word.

Die Bybel het lank gelede voorspel: “[God] sal beslis oordeel tussen die nasies en sake regstel.” Hierdie profesie sê ook dat mense “van hulle swaarde ploegskare [sal] smee en van hulle spiese snoeimesse. Nasie sal nie teen nasie die swaard ophef nie, en ook sal hulle nie meer leer om oorlog te voer nie” (Jesaja 2:4). Hierdie profesie word vandag vervul. Ware godsdiens, wat deur Jehovah se Getuies beoefen word, is reeds besig om vrede te bevorder.

[Lokteks op bladsy 8]

Jehovah se Getuies word deur liefde verenig

[Venster op bladsy 9]

Hoe is Jehovah se Getuies anders?

Baie mense is verbaas wanneer hulle uitvind hoeveel Jehovah se Getuies verskil van al die ander godsdienste wat beweer dat hulle Christus volg. Hier is van die dinge wat Jehovah se Getuies uniek maak:

STRUKTUUR

● Hulle het geen geestelikeklas nie.

● Hulle ouer manne, onderrigters en sendelinge ontvang nie ’n salaris nie.

● Hulle betaal nie tiendes nie, en geen kollektes word geneem by hulle plekke van aanbidding, wat Koninkryksale genoem word nie.

● Al hulle bedrywighede word deur anonieme donasies ondersteun.

● Hulle bly neutraal wat die politiek betref.

● Hulle bevorder vrede en neem nie deel aan oorloë nie.

● Hulle is regoor die wêreld verenig in hulle geloof en Bybelse opvattings.

● Hulle is heeltemal verenig, met geen maatskaplike, etniese, rasse- of klasseverskille nie.

● Hulle het nie bande met enige ander godsdiens nie, hetsy Katoliek, Ortodoks of Protestants.

LEERSTELLINGS

● Hulle glo dat daar net een ware God is, wie se naam Jehovah is.

● Hulle glo nie dat Jesus Christus die Almagtige God is nie; ook glo hulle nie aan die Drie-eenheidsleer nie.

● Hulle volg die leringe van Jesus en eer hom as die Seun van God.

● Hulle vereer nie die kruis nie; ook gebruik hulle nie beelde in hulle aanbidding nie.

● Hulle glo nie aan ’n helse vuur waarheen alle slegte mense gaan wanneer hulle sterf nie.

● Hulle glo dat God gehoorsame mense met volmaakte ewige lewe in ’n aardse paradys sal seën.

Jehovah se Getuies glo dat hulle daarin geslaag het om die eerste-eeuse Christelike godsdiens te herstel, die vorm van die Christelike godsdiens wat Jesus se apostels beoefen het.

[Prent op bladsy 8]

’n Serwiër, ’n Bosniër en ’n Kroaat