HOE OM STYGENDE PRYSE TE HANTEER
Wees vrygewig
As jy sukkel om stygende pryse te hanteer, voel jy dalk dat dit onmoontlik is om vrygewig te wees. Maar om vrygewig te wees, kan jou help om ekonomiese probleme te hanteer. Jy kan beide spaarsamig en vrygewig wees.
HOEKOM DIT SAAK MAAK
Om vrygewig te wees – selfs op klein maniere – maak ons gelukkig en laat ons goed oor onsself voel. Om die waarheid te sê, studies wys dat dit goed is vir ons algehele fisiese en verstandelike gesondheid wanneer ons aan ander gee. Byvoorbeeld, dit kan angstigheid, stres en selfs pyn verminder, asook jou bloeddruk verlaag. Dit kan jou ook help om beter te slaap.
Wanneer ons finansieel of op ander maniere aan ander gee, kan dit vir ons makliker wees om hulp te aanvaar wanneer ons dit nodig het. Howard, wat in Engeland bly, sê: “Wanneer ek en my vrou na maniere soek om vrygewig te wees en ander te help, voel ons nie so sleg wanneer ons hulp nodig het nie.” Mense wat uit die hart uit gee, verwag natuurlik niks terug nie. Maar wat hulle wel kan kry, is ware vriende wat bereid is om hulle in tye van nood te kom help.
WAT JY KAN DOEN
Deel wat jy het. Al het jy baie min, kan jy steeds iets aan ander gee, selfs al is dit net ’n eenvoudige ete. Duncan en sy gesin, wat in Uganda bly, is redelik arm, maar hulle het nog steeds ’n vrygewige gees. Duncan sê: “Op Sondae nooi ek en my vrou iemand na ons huis toe vir ’n eenvoudige ete. Ons geniet dit om tyd saam met ander te spandeer.”
Wanneer jy aan ander gee, moet jy natuurlik redelik wees. Jy wil nie soveel aan ander gee dat jou gesin nie die dinge het wat hulle nodig het nie. – Job 17:5.
Probeer die volgende: Gee vir iemand ’n eenvoudige ete of selfs iets om te drink. Hoekom gee jy nie die dinge wat jy nie meer nodig het vir vriende of bure wat daarby kan baat vind en dit kan waardeer nie?
Gee op ander maniere. Party van die beste geskenke kos niks nie. Byvoorbeeld, ons kan van ons tyd en aandag gee deur dinge te doen om ander te help. Selfs vriendelike woorde kan ’n geskenk wees! So sê vir ander hoe baie jy hulle waardeer of liefhet.
Probeer die volgende: Help ander met dinge wat hulle in en om die huis moet doen of met ander takies. Stuur ’n mooi kaartjie of ’n teksboodskap aan ’n vriend, selfs al is dit net om te sê dat jy aan daardie persoon dink.
Wanneer jy vrygewig is, sal jy baie gelukkiger wees.