Hoofstuk 11

„Gee pad uit Babilon!”

1. (a) Hoe kan ons weet watter soort aanbidding vir God welgevallig is? (b) Waaruit spoor God ons aan om pad te gee?

BAIE mense val van die een godsdiens na die ander rond op soek na bevredigende antwoorde op hulle vrae oor die lewe. Hulle vind sekere ooreenkomste ten opsigte van leerstellings en gebruike, asook baie verskille. Maar dit is slegs deur God se Woord as rigsnoer te gebruik dat ’n mens met sekerheid kan vasstel watter antwoorde waar en watter gebruike werklik vir God welgevallig is. Deur middel van die Bybel maak die Skepper homself en sy voorneme aan ons bekend. Hy sê ook vir ons wat die oorsprong van valse aanbidding is. Hy waarsku ons terselfdertyd teen wat hy „Babilon die Grote” noem en spoor ons aan om uit haar midde pad te gee. Het jy ag gegee op daardie waarskuwing?—Openbaring 18:4, 21; Jeremia 51:6, Die Lewende Bybel.

2. Wat is „Babilon die Grote”?

² Wat is „Babilon die Grote”? Gesamentlik beskou, bestaan Babilon die Grote uit alle godsdienste wat gesindhede, opvattings of gebruike propageer wat hulle oorsprong in die godsdiens van eertydse Babilon het. Ons kan derhalwe die kenmerke daarvan bepaal deur die oorsprong en godsdiens van eertydse Babilon te ondersoek.

3. (a) Hoe het eertydse Babilon sy ontstaan gehad, en watter gees is deur sy stigter aangeblaas? (b) Hoe word daardie gees vandag deur godsdienste weerspieël?

³ Ruim ’n eeu na die Vloed van Noag se dag is die stad Babel (later Babilon genoem) rondom ’n toring gebou—’n projek wat blykbaar deur Nimrod georganiseer is. Hierdie Nimrod het onder sy metgeselle ’n gees van opstand teen Jehovah en ’n begeerte na selfverhoging aangeblaas (Genesis 10:9, 10; 11:1-9). Sien jy vandag daardie gees—minagting van God se Woord, selfs onder mense wat bely dat hulle godsdienstig is, en die gebruik van godsdiens om die aandag op die persoon te vestig of selfs om aansien te verkry?

4. Hoe het Babiloniese godsdiens die waarheid omtrent God self verdraai?

⁴ Triades gode het ’n belangrike plek in Babiloniese godsdiens beklee. Daar was byvoorbeeld die drietal Anoe, Bel en Ea; ’n ander was Sin, Sjamasj en Isjtar. Verder was Babilon se plekke van aanbidding vol beelde. Dit alles het mense se aandag afgelei van die feit dat daar net een ware God, met die naam Jehovah, is (Deuteronomium 4:39, NW; Johannes 17:3, NAV). Die eienskappe en gedrag wat aan hulle gode toegeskryf is, tesame met die gebruik van lewelose beelde, het baie mense ’n verwronge beeld van die Skepper gegee.—Jeremia 10:10, 14; 50:1, 38; 1 Korinthiërs 10:14, 19-22.

5. (a) Hoe was die Babiloniese leer aangaande die dood eintlik ’n borduursel van Satan se leuen aan Eva? (b) Tot watter ander leerstellings het dit aanleiding gegee?

⁵ Die Babiloniërs het geglo dat die dood maar net ’n oorgang tot ’n ander soort lewe is, maar dit is strydig met wat God vir ons eerste ouers gesê het. Griekse filosowe het hierdie gedagte verder gevoer en gesê dat mense ’n onsterflike siel het. Die Duiwel se eerste leuen was dat Adam en Eva ‚gewis nie (in die vlees) sou sterwe’ as hulle aan God ongehoorsaam was nie. Nou is mense wysgemaak dat dit ’n innerlike, onsigbare deel van hulle is wat vir ewig voortleef. Hierdie valse leerstelling het onder meer daartoe gelei dat mense aan ’n helse vuur, vaevuur en vooroueraanbidding glo.—Genesis 3:1-5; Prediker 9:5, 10; Esegiël 18:4.

6. (a) Watter ander gebruike wat vandag algemeen is, het hulle oorsprong in Babiloniese godsdiens? (b) Hoe ernstig is dit?

⁶ Babiloniese godsdiens was ook vermeng met sterrewiggelary, waarsêery, towerkuns en heksery, waardeur mense bonatuurlike leiding probeer verkry het sodat hulle hulself kon verryk en ander kon beheer (Daniël 2:27; Esegiël 21:21). Hoe alledaags is hierdie gebruike tog nie vandag nie, hoewel die Bybel teen hulle almal waarsku! Deur hulle daarmee in te laat, bevorder mense die planne van duiwelse geeste, wat ’n duur prys vra vir die gunste wat hulle bewys.—Deuteronomium 18:10-12; Jesaja 8:19; Handelinge 16:16; Openbaring 18:21, 23.

7. Watter bewys sien jy dat Babilon die Grote (a) met politieke heersers hoereer? (b) groot rykdom besit? (c) aan bloedvergieting skuldig is?

⁷ Die Bybel identifiseer Babilon die Grote verder deur te vertel van haar hoerery met politieke heersers, haar rykdom en haar bloedvergieting, waaronder die bloed van God se ware knegte (Openbaring 17:1-6; 18:24). Die reputasie van die wêreld se godsdienste in hierdie verband is welbekend.

HOE LIEF HET JY DIE WAARHEID?

8. Wie is in werklikheid die god van Babilon die Grote?

⁸ Wie word vereer wanneer ’n mens aan enige deel van Babilon die Grote behoort, aan haar vierings deelneem of haar weë navolg? Gewis nie Jehovah nie. Inteendeel, so ’n persoon buig hom in werklikheid neer voor „die god van hierdie wêreld”, die een wat die sinne van die mensdom verblind het.—2 Korinthiërs 4:4.

9. Hoe het Satan dit reggekry om so baie mense op godsdiensgebied te mislei?

⁹ Maar hoe is dit moontlik dat so baie mense op hierdie manier mislei kon word? Die Bybel antwoord dat hulle in Satan se strik beland het „omdat hulle nie die waarheid liefgehad . . . het nie” (2 Thessalonicense 2:9-12, NAV). Dit behoort ons nie te verbaas nie. Hoeveel mense ken jy wat altyd die waarheid praat—by die huis, by die werk, wanneer hulle met hulle eie tekortkominge gekonfronteer word? Hoeveel is bereid om hulle vroeëre opvattinge en gebruike te laat vaar of selfs hulle lewenswyse te verander wanneer hulle leer wat die Bybel, God se woord van waarheid, sê? Is jy?

10. (a) Na watter soort persone soek Jehovah? (b) Hoe kan ons toon dat ons daardie soort persoon is?

¹⁰ Jehovah soek na mense met sulke liefde vir die waarheid. Hy is self „die God van waarheid” (Psalm 31:5, NW). Die leringe van sy Woord is nie uit die duim gesuig nie. Hulle is die waarheid. Jesus het vir ’n vrou in Samaria gesê: „Die ware aanbidders [sal] die Vader in gees en waarheid . . . aanbid; want die Vader soek ook mense wat Hom só aanbid. God is Gees; en die wat Hom aanbid, moet in gees en waarheid aanbid” (Johannes 4:23, 24). Is dit die soort persoon wat jy wil wees?

GOD SE VOORSIENING VIR BEVRYDING

11. (a) Wat is in Jesaja 49:8, 9 voorspel? (b) Wanneer het dit ’n eerste vervulling ondergaan? (c) Waarom is dit vir ons van belang?

¹¹ Om vir ons leiding te gee, het Jehovah lank gelede in die Bybel ’n belofte van verlossing uit die kloue van Babilon laat opteken. Dit is aanvanklik vervul toe Kores die Grote die Jode, sowel as die nie-Israelitiese Nethinim, bevry het sodat hulle na Jerusalem kon terugkeer om die tempel van Jehovah te herbou. Maar dit was nie die einde van die saak nie. Daardie destydse gebeure het vooruitgesien op verdere verlossing deur middel van die Grotere Kores, die Here Jesus Christus. Gehoorsaamheid aan sy opdragte beskerm ons sodat ons nie mislei word deur manne wat net vir hulleself naam wil maak nie. Die volgende profesie het in die besonder op Jesus betrekking: „So sê die HERE: In die tyd van die welbehae het Ek U verhoor, en in die dag van heil het Ek U gehelp; en Ek behoed U en gee U as ’n verbond van die volk, om die land weer op te rig, om verwoeste erfenisse te laat beërwe; om te sê aan die gevangenes: Gaan uit! aan hulle wat in duisternis is: Kom te voorskyn!” (Jesaja 49:8, 9). Hoe is dit in Jesus vervul?

12. (a) Hoe is daardie profesie in Jesus vervul? (Lukas 4:16-18). (b) Watter bemoediging bevat dit vir ons?

¹² Jehovah het Jesus se gebede verhoor. Hy het sy Seun gehelp en beskerm terwyl Jesus moedig godsdiensdwalinge aan die kaak gestel het en die waarheid bekend gemaak het wat mense sou vrymaak (Johannes 8:32). Ondanks sataniese pogings om Jesus te vernietig, het Jehovah sy Seun in die lewe bewaar totdat sy werk op aarde afgehandel was. Toe het hy Jesus tot onsterflike lewe in die hemel verhef, waar hy sy bevrydingswerk kon voortsit. God het hom gegee as ’n „verbond”, of waarborg, dat daar ’n bevryding sou wees van mense uit slawerny aan Babilon die Grote. Net so seker as wat daar ’n verrese en verheerlikte Jesus Christus in die hemel is, so seker is dit dat regskape mense verlos gaan word uit die godsdiensduisternis van Babilon die Grote. Sal jy by daardie verlossing baat vind?

13. Hoe was Jesus van 36 G.J. af „’n lig van die nasies”?

¹³ Wat die omvang van die bevryding betref, het Jehovah voorspel: „Ek het U gemaak tot ’n lig van die nasies, om my heil te wees tot aan die einde van die aarde” (Jesaja 49:6). Gevolglik is mense van nie-Joodse nasies van 36 G.J. af in die gemeente van geestelike Israel ingebring. Die toevoeging van nie-Jode tot die geesgesalfde Christengemeente was egter nie die volle mate waarin Jesus „’n lig van die nasies” sou wees nie.

14. (a) Vir wie anders uit „die nasies” sou Jesus ’n lig wees? (b) Deur watter groepe wat eertydse Babilon verlaat het, is hulle afgeskadu? (c) Watter geestelike seëninge geniet hulle reeds, ter vervulling van Jesaja 49:10?

¹⁴ Jesus het geweet dat hy ook „ander skape” sou versamel wat die ewige lewe op aarde sou geniet (Johannes 10:16). Hulle is afgeskadu deur die nie-Israelitiese Nethinim (tempelbediendes) en kinders van die dienaars van Salomo wat in 537 v.G.J. saam met die Jode uit Babilon getrek het (Esra 2:1, 43-58). Net so het ’n groot menigte in hedendaagse tye reeds gehoor gegee aan die bevel om uit Babilon die Grote ‚uit te gaan’. Hulle geniet nou die verkwikkende geestelike seëninge wat in Jesaja 49:10 voorspel is: „Hulle sal geen honger en geen dors hê nie, en die woestyngloed en die son sal hulle nie steek nie; want hulle Ontfermer sal hulle lei en hulle saggies aanbring na die fonteine van water.” In Openbaring 7:9, 16, 17 word hierdie seëninge tereg op die „groot menigte” „ander skape” toegepas.

„GAAN UIT HAAR UIT, MY VOLK”

15. Waarom spoor die Bybel God se volk aan om uit Babilon die Grote uit te gaan?

¹⁵ Die apostel Johannes het in ’n geïnspireerde gesig gesien wat die voltrekking van God se oordeel vir Babilon die Grote sal beteken. Met die oog op die sekerheid daarvan het ’n engel uit die hemel namens God gemaan: „Gaan uit haar uit, my volk, sodat julle nie gemeenskap met haar sondes mag hê en van haar plae ontvang nie. Want haar sondes reik tot aan die hemel, en God het haar ongeregtighede onthou.”—Openbaring 18:4, 5.

16. Wat kan aandui of ons werklik aan daardie bevel gehoorsaam is?

¹⁶ Die lede van geestelike Israel het op daardie bevel ag gegee, en hulle spoor ander nou aan om dit ook te doen. Hulle weet dat God nie behae het in iemand wat ware en valse aanbidding meng nie. Kan iemand wat met Jehovah se Getuies omgaan maar nog nie sy bande met Babilon die Grote verbreek het nie, sê dat hy nie ’n deel van haar is nie? Al woon hy nooit haar kerkdienste by nie, raak hy steeds aan wat onrein is indien hy by sy werk of saam met sy familielede aan haar godsdienstige feesdae meedoen (Jesaja 52:11). As hy aan familiegebruike deelneem wat gegrond is op die idee dat die siel onsterflik is of wat bygelowige vrees vir bose geeste weerspieël, het hy nog gemeenskap met haar sondes. Ons kan nie draadsitters wees nie. As ons glo dat Jehovah die ware God is, moet ons hom alleen dien.—1 Konings 18:21.

17. (a) Watter uitnodiging word aan alle mense gerig, soos blyk uit Openbaring 14:6, 7? (b) Watter ander bevel moet hulle gehoorsaam as hulle Jehovah op aanneemlike wyse wil dien?

¹⁷ Aan mense van elke volk en stam en taal word die aanloklike uitnodiging gerig: Kom aanbid Jehovah, die enigste ware God! (Openbaring 14:6, 7). Om dit te doen, moet jy ook ’n navolger word van God se eertydse knegte wat gehoorsaam was aan die bevel: „Gee pad uit Babilon! Vlug om julle lewe te red!”—Jeremia 51:6, Die Lewende Bybel.