Hoofstuk 3
Gee die wêreld se godsdienste die regte leiding?
1. Watter belangrike vrae oor die wêreld se godsdienste word hier geopper?
“GODSDIENS was een van die sterkste kragte in die geskiedenis”, het The World Book Encyclopedia gesê.28 Maar het die wêreld se godsdienste werklik vrede en veiligheid bevorder? Het hulle hulle aanhangers geleer dat broederliefde landsgrense en rasseverskille te bowe moet kom? En was die kerke van die Christendom, Katoliek, Protestants en Ortodoks, getrou aan hulle verklaring dat hulle Jesus Christus as die “Vredevors” volg? Of het hulle in werklikheid bygedra tot die haat wat die mens se toekoms in gevaar stel? ’n Kykie na hulle reputasie sal die verbasende antwoord verstrek.
2. Wat deel verskeie bronne ons mee oor die geskiedverslag?
2 In hierdie verband het Parade Magazine gesê: “Die geskiedenis leer lesse aan diegene wat bereid is om te leer. Een van die vernaamste lesse is dat botsings weens godsdienstige en sektariese verskille feitlik altyd die wreedste en hardnekkigste is, asook die moeilikste om op te los.”29 En soos die Chicago Tribune gesê het: “Elke groot godsdiens verkondig vrede en broederskap en barmhartigheid, en tog het van die wreedste en onverdraagsaamste verdrukkinge in die geskiedenis in die naam van God plaasgevind.”30 Met sulke geskiedkundige feite in gedagte vra koerantredakteur C. L. Sulzberger gepas: “Moet ons nie, al is dit ook ’n onsmaaklike onderwerp, besef dat, benewens die ander oorsake—imperialisme, rassisme, militarisme—godsdiens ’n steeds groter bedreiging vir menselewe geword het nie?”31
3. Watter skandelike gebruik van godsdiens word deur die geskiedenis van ons 20ste eeu onthul?
3 Ja, die geskiedenis is bevlek met die bloed van tweedrag wat deur godsdiens gesteun is. Net in ons eeu, gedurende die twee wêreldoorloë en daarna, het ons die skandelike gebruik aanskou waar medegelowiges mekaar afmaai—Katoliek teen Katoliek, Protestant teen Protestant, Moslem teen Moslem, en so meer. En al het die geestelikes aan albei kante tot dieselfde godsdiens behoort, het hulle die troepe geseën wat kort daarna hulle godsdiensbroers sou doodmaak.
4. (a) Waarom is die kerke van die Christendom die laakbaarste? (b) Wat sê een hoofartikel oor oorlog?
4 Onder die laakbaarste op hierdie gebied is die kerke van die Christendom. Waarom? Omdat hulle bely dat hulle die verteenwoordigers is van die God van die Bybel en sy Seun Jesus Christus, wat gesê het: “Hieraan sal almal weet dat julle my dissipels is, as julle liefde onder mekaar het” (Johannes 13:35). Die allerwreedste slagtings het egter reg in die hartjie van die Christendom plaasgevind. ’n Hoofartikel in die Waterloo Courier van Iowa het gesê: “En Christene het nog nooit aardig gevoel om teen ander Christene oorlog te voer nie. Anders sou van die hewigste oorloë in Europa nooit plaasgevind het nie. . . . Die Eerste en Tweede Wêreldoorlog, waartydens Christene ander Christene op ongeëwenaarde skaal doodgemaak het, sou dan nooit plaasgevind het nie.”32
5. (a) Wat sê die Bybel duidelik vir diegene wat God waarlik dien? (b) Watter vraag moet kerklidmate oor hulle eie kerk onder die oë sien?
5 Oor hierdie saak is die Bybel baie duidelik: Diegene wat God waarlik dien, word aangesê om ‘vrede te soek en dit na te jaag’, om ‘van hul swaarde pikke te smee’ en om ‘nie meer te leer om oorlog te voer nie’ (1 Petrus 3:11; Jesaja 2:2-4). “Ons [moet] mekaar . . . liefhê; nie soos Kain wat uit die Bose [Satan die Duiwel] was en sy broer doodgeslaan het nie” (1 Johannes 3:10-12). Maar die aanhangers van hierdie wêreld se godsdienste gaan voort om hulle broers dood te maak, net soos Kain gedoen het, en hulle geestelikes het hul steun toegesê aan diegene wat daardie weg bewandel. As jy ’n kerklidmaat is, kan jy jou gevolglik afvra: ‘Gestel almal op aarde was lidmate van my kerk. Sou oorloë dan opgehou het en sou hierdie aarde nou ’n plek van ware vrede gewees het?’
6. Wat bewys die verdeeldheid in die wêreld se godsdienste en hulle deelname aan oorlog?
6 Die verdeeldheid in die wêreld se godsdienste en hulle deelname aan oorlog bewys dat God hulle nie steun nie. Dit verbaas miskien baie mense wat meen dat alle gelowe goed moet wees aangesien hulle bely dat hulle God verteenwoordig. Die Bybel toon egter duidelik dat ‘God nie ’n God van wanorde is nie, maar van vrede’ (1 Korinthiërs 14:33). Dit toon ook dat daar ware godsdiens sowel as valse godsdiens is. En dit toon dat slegs aanbidding wat op die waarheid gegrond en vry van huigelary is God se steun geniet.—Mattheüs 15:7-9; Johannes 4:23, 24; Titus 1:16.
7. (a) Watter uitdrukking gebruik die Bybel om die wêreld se godsdienste te beskryf? (b) Waarvan word hulle beskuldig?
7 Omdat die wêreld se godsdienste hulself in werklikheid onteer het ter wille van politieke, kommersiële en maatskaplike gewin, beeld die Bybel hulle as ’n hoer af. Waar dit hierdie “hoer” beskryf, sê dit: “Die bloed . . . is in haar gevind . . . van almal wat op die aarde gedood is” (Openbaring 17:1-6; 18:24). Ja, hierdie wêreld se godsdienste het groot bloedskuld as gevolg van al die bloedvergieting in die wêreld se geskiedenis! Hiervoor sal daar van hulle rekenskap geëis word.
8. Hoe is Jesus se woorde oor “blinde leiers” vandag van toepassing?
8 Dit spreek vanself dat enige godsdiens met gebruike wat strydig met die Bybel is nooit daarin kan slaag om die mensdom na ware vrede en veiligheid te lei nie. Dit is waarom Jesus van die valse godsdiensleiers van sy dag gesê het: “Hulle is blinde leiers van blindes. En as ’n blinde ’n ander blinde lei, sal altwee in die sloot val” (Mattheüs 15:14). Die wêreld se godsdienste is vandag eweneens “blinde leiers” waar dit by oorlog en ander noodsaaklike lewensaspekte kom.
Bevorder die wêreld se godsdienste sedelikheid?
9, 10. (a) Waarom is die nalewing van ware standaarde van sedelikheid belangrik vir vrede en veiligheid? (b) Wat bevorder volgens die Bybel sulke sedelikheid?
9 Kan enigiemand ware vrede met sy naaste of werklike veiligheid geniet as ware standaarde van sedelikheid nie gehandhaaf word nie? Waar daar nie sulke standaarde is nie, is leuens, diefstal, owerspel en soortgelyke gebruike algemeen. Ware naasteliefde sal andersyds sedelikheid bevorder.
10 Die Bybel druk God se beskouing van sedelikheid soos volg uit: “Hy wat ’n ander liefhet, het die wet vervul. Want dít: Jy mag nie egbreek nie, jy mag nie doodslaan nie, jy mag nie steel nie, jy mag geen valse getuienis gee nie, jy mag nie begeer nie, en watter ander gebod ook al, word in hierdie woord saamgevat: Jy moet jou naaste liefhê soos jouself. Die liefde doen die naaste geen kwaad nie.”—Romeine 13:8-10.
11, 12. (a) Kan iemand wat nie volgens sedelike standaarde lewe nie verwag om vrede met God te geniet? (b) Wie stel tereg daardie standaarde?
11 Maar nog belangriker: Glo jy dat iemand wat nie God se sedelike standaarde naleef nie vrede met God kan geniet en die versekering van Sy guns en beskerming kan hê? Kan ’n mens in die eerste plek ’n God respekteer wat nie sulke sedelikheid vereis van diegene wat bely dat hulle hom dien nie?
12 As God wil hê dat mense sy standaarde moet naleef, moet hy daardie standaarde duidelik stel. Hy het dit in sy Woord, die Bybel, gedoen (2 Timotheüs 3:16, 17). Om te sê dat elkeen sy eie morele standaarde moet stel en daarvolgens moet lewe, is net so onredelik soos om te sê dat elkeen sy eie verkeersreëls moet maak en daarvolgens moet bestuur. Jy weet wat die gevolg sal wees. Die Bybel toon logies dat daar net een weg is wat tot God se goedkeuring lei. En Jesus het gesê dat alle ander weë net tot vernietiging lei.—Mattheüs 7:13, 14; Lukas 13:24.
13-15. (a) Watter vrae oor sedelikheid moet oor die lidmate van ’n mens se eie kerk gestel word? (b) Wat sê die Bybel moet gedoen word met ’n gemeentelid wat aanhou om God se wette te verbreek? (c) Word dit in die kerke gedoen?
13 Handhaaf die Christendom se kerke in die besonder God se morele standaarde en stel hulle sodoende vir die res van die wêreld ’n voorbeeld? Wat toon die lewens van baie wat tot daardie kerke behoort? Behoort jy tot ’n kerk? Vra jou dan af: ‘Gestel almal op aarde het soos die lidmate van my kerk gelewe. Sou dit ’n einde maak aan misdadigheid, oneerlike sakegebruike, tweedrag en geslagsonsedelikheid?’
14 Die Bybel waarsku dat ‘’n bietjie suurdeeg die hele deeg suur maak’ en dat ‘slegte geselskap goeie sedes bederf’ (Galasiërs 5:9; 1 Korinthiërs 15:33, NAV). Daarom beveel dit Christene ook “om nie om te gaan met iemand wat, al staan hy as ’n broeder bekend, ’n hoereerder is of ’n gierigaard of ’n afgodedienaar of ’n kwaadspreker of ’n dronkaard of ’n rower nie; met so iemand moet julle selfs nie saam eet nie. . . . Verwyder tog dié slegte mens onder julle uit.”—1 Korinthiërs 5:11-13.
15 Iemand kan weliswaar ’n misstap begaan en hom dan weer regruk. Maar wat van diegene wat sulke dinge beoefen? As sulke mense voorgee dat hulle God dien, is hulle huigelaars. Jy verafsku sekerlik skynheiligheid, en die Bybel toon dat God dít sowel as diegene wat dit beoefen, haat (Mattheüs 23:27, 28; Romeine 12:9). Wat dan van jou kerk? Gehoorsaam dit die Bybel se bevel om diegene wat voortgaan om God se wette te verbreek en geen ware berou toon nie te “verwyder”? Of laat dit toe dat sulke mense aanbly as lidmate wat goeie aansien geniet en stel dit ander sodoende in gevaar? Bring dit bloot lippehulde aan sedelikheid terwyl dit oortreding in werklikheid deur die vingers sien of dit selfs vergoelik?—Mattheüs 15:7, 8.
16. (a) Wat sê talle geestelikes nou oor seksuele gedrag? (b) Wat sê die Bybel oor sulke gedrag?
16 Al hoe meer geestelikes sê dat hoerery, owerspel en homoseksualiteit nie noodwendig verkeerd is nie. Maar hulle denke strook nie met God s’n nie. Sy Woord sê duidelik: “Moenie dwaal nie! Geen hoereerders of afgodedienaars of egbrekers of wellustelinge of sodomiete of diewe of gierigaards of dronkaards of kwaadsprekers of rowers sal die koninkryk van God beërwe nie.”—1 Korinthiërs 6:9, 10.
Waartoe die verwerping van God se Woord gelei het
17-19. (a) Hoe het die apostel Paulus die Bybel beskou? (b) Hoe beskou talle geestelikes die Bybel vandag?
17 Die basiese rede waarom hierdie wêreld se godsdienste so verdeeld en chaoties is, is omdat hulle die wette van God wat in sy Woord, die Bybel, aangetref word, ignoreer. Trouens, baie geestelikes verwerp die Bybel as die geïnspireerde Woord van God. Die geïnspireerde apostel Paulus het egter gesê: “Die hele Skrif is deur God geïnspireer” (2 Timotheüs 3:16, NAV). Paulus het ons ook aangespoor om die Bybel aan te neem “nie as die woord van mense nie, maar, soos dit waarlik is, as die woord van God” (1 Thessalonicense 2:13). Jehovah God, die almagtige Skepper van die ontsagwekkende heelal, kan tog seker die outeur wees van ’n boek en toesien dat dit deur die eeue heen ongeskend bly!
18 Die New Catholic Encyclopedia sê egter: “Baie verklarings in die Bybel is eenvoudig nie waar wanneer hulle beoordeel word in die lig van hedendaagse kennis van die wetenskap en die geskiedenis nie.”39 In U.S. Catholic het ’n priester geskryf dat die aarde se skepping nie kon geskied het soos dit in Genesis beskryf word nie. En oor die verhaal van die mens se skepping het hy gesê: “Die mensdom het nie so in aansyn gekom nie.”40 ’n Episkopaalse biskop het gesê: “Die Bybel bevat foute, onjuisthede en weersprekings. Dit is dus te begrype waarom die vernaamste Christenkerke die Bybel nie as onfeilbaar beskou nie.”41 In Engeland het ’n Anglikaanse biskop Christus se opstanding beskryf as ’n “goëltoertjie met beendere”.42
19 Baie van die geestelikes kleineer gevolglik die Bybel of leer nie hulle volgelinge om dit te eerbiedig en God se wette daarin te gehoorsaam nie. Dit is ’n belangrike rede vir die skokkende onkunde oor God se Woord dwarsdeur die valse Christendom. Godsdienskommentator M. J. McManus het die volgende oor kerkgangers geskryf: “Min godsdienstendense dreig om georganiseerde godsdiens in die 1980’s so te ondermyn soos die jammerlike toestand van Bybelkennis.” Hy het gesê dat die Bybel vir die meeste kerkgangers “’n ongelese, vreemde dokument bly”.43
20, 21. Waartoe het die verwerping van Bybelleringe gelei?
20 Waartoe het dit gelei? Het die wêreld se godsdienste bewys dat hulle Bybelleringe kan neerhaal en nogtans vrede en goeie sedes onder hulle lidmate kan voortbring? Inteendeel, toestande versleg oor die hele aarde. Die nasies met nie-Christelike gelowe word al hoe meer deur onrus, verdeeldheid, politieke korrupsie en sedelike verval geteister. Maar die valse Christendom in die besonder word al lank die swaarste deur misdadigheid, onsedelikheid, dwelmverslawing, rassetwis en oorlog geteister. Sake het verloop net soos God se betroubare Woord voorspel het: “Hulle het die woord van die HERE verwerp, en watter wysheid sou hulle hê?”—Jeremia 8:9.
21 Die getuienis is onomstootlik. Dit toon dat hierdie wêreld se godsdienste nie ’n ware krag vir vrede en veiligheid is nie. En hulle het hulle aanhangers onkundig gelaat oor die ware hoop—God se Koninkryk. Wat beteken al hierdie dinge dan?
Die einde van die wêreld se godsdienste kom nader
22, 23. Wat sê die Bybel gaan met hierdie wêreld se valse godsdienste gebeur?
22 Jesus Christus het gesê: “Elke plant wat my hemelse Vader nie geplant het nie, sal ontwortel word” (Mattheüs 15:13). Die slegte vrugte wat hierdie wêreld se godsdienste dra, bewys dat hulle nie deur God geplant is nie. Die Bybel voorspel dus die komende vernietiging van alle valse godsdiensstelsels.
23 Waar God van hierdie godsdiensstelsels praat onder die sinnebeeld van die hoeragtige “Babilon die Grote” sê hy die volgende oor die wêreldryk van valse godsdiens: “Haar sondes reik tot aan die hemel, en God het haar ongeregtighede onthou . . . daarom sal haar plae op een dag kom: dood en droefheid en honger; en met vuur sal sy verbrand word, want sterk is die Here God wat haar oordeel.”—Openbaring 18:2, 5-8, vgl. NW.
24. Hoe sal sulke vernietiging kom, en uit watter bron?
24 Let daarop dat hierdie vernietiging verbasend skielik, as ’t ware “op een dag”, gaan kom. Tot die verbasing en ontsteltenis van baie mense sal valse godsdiens vernietig word deur die einste politieke nasies waarmee sy so lank gehoereer het.—Openbaring 18:10-17, 21; 17:12, 16.
25. (a) Wat word mense wat God se goedkeuring wil wegdra in Openbaring 18:4 aangespoor om te doen? (b) Wat moet ’n mens beweeg om so op te tree?
25 Die goddelike bevel is dus: “Gaan uit haar uit, my volk, sodat julle nie gemeenskap met haar sondes mag hê en van haar plae ontvang nie” (Openbaring 18:4). Hierdie handelwyse beteken dat ’n mens valse godsdiens sien soos God dit sien. Dit beteken dat ’n mens dit verafsku vanweë die slegte vrugte, skynheiligheid en bygelowigheid daarvan. Die wyse waarop valse godsdiens God verkeerd voorgestel het by die mensdom en die wyse waarop dit tot die lyding en verdrukking van die mense bygedra het, moet ons walg (Romeine 2:24; Jeremia 23:21, 22). As jy dit besef, sal jy al jou ondersteuning aan sulke godsdienste onttrek en sodoende toon dat jy God se oordeel aan hulle van ganser harte steun.
26. (a) Wat moet ’n mens daarbenewens vind as hy God se vrede en beskerming wil geniet? (b) Na watter soort mense moet ’n mens soek wanneer jy diegene probeer vind wat ware aanbidding beoefen?
26 Dit is egter nie genoeg om jou net daaraan te onttrek nie. Jy moet die ware, ongeveinsde aanbidding soek en vind wat vir jou God se vrede en beskerming sal bring wanneer die voorspelde vernietiging plaasvind. Diegene wat sulke ware aanbidding beoefen, moet persone wees wat reeds ‘van hulle swaarde pikke gesmee het en nie meer leer om oorlog te voer nie’ (Jesaja 2:4). Hulle moet mense wees wat God se Woord glo, daarvolgens lewe en dit die rigsnoer van hulle lewens maak (Psalm 119:105). Hulle moet ware, ongeveinsde liefde aan hulle medemens bewys (Johannes 13:35; Romeine 13:8). Bestaan daar vandag so ’n vorm van aanbidding? Miljoene het dit onder Jehovah se Getuies gevind. Hulle is wêreldwyd daarvoor bekend dat hulle bly by God se wette soos dit in die Bybel aangetref word. En die vrede en veiligheid wat hulle selfs nou geniet, is bewys van die waaragtigheid en krag van God se Woord.
27. Wat sal jy persoonlik kan waarneem as jy die vergaderinge van Jehovah se Getuies by hulle Koninkryksaal bywoon?
27 Jehovah se Getuies is diep besorg oor die gevaarlike situasie waarin valse godsdiens mense geplaas het. Hulle probeer opreg om die Woord van God eerste in hulle lewens te stel. Jy word genooi om hulle vergaderinge in hulle plaaslike Koninkryksaal waar te neem en jouself te vergewis van die mate waarin hulle die vrug van God se gees openbaar en die vrede en veiligheid geniet wat dit meebring. Jy sal ook sien hoe hulle die dinge leer en toepas wat God verwag van diegene wat die komende vernietiging gaan oorlewe en in sy regverdige Nuwe Orde onder die heerskappy van sy hemelse Koninkryk gaan lewe.
[Venster op bladsy 29]
Al hoe meer geestelikes aanvaar gebruike wat die Bybel as geslagsonsedelikheid veroordeel, soos hierdie paar opskrifte en nuusitems toon:
“Wanneer wat sleg is goed word, sal die geestelikes vir ons sê.” “[Die Anglikaanse Kerk] raak nou ontslae van sy outydse, outoritêre beeld. Voorhuwelikse seks, met een of meer maats, . . . sal voortaan as moreel aanneemlik beskou word.”—Alberta Report.33
“Pastors swyg oor voorhuwelikse seks.” “Die pastors van Amerika swyg skandelik oor voorhuwelikse seks . . . Hulle is bang dat hulle van hulle gemeentelede sal verloor. Jesaja het van sulke priesters geweet. In Hoofstuk 1 van sy boek haal hy die Here soos volg oor hulle aan: ‘Ek bedek my oë vir julle; ook as julle die gebed vermenigvuldig, luister Ek nie: julle hande is vol bloed.’”—Telegraph, North Platte, Nebraska.34
“Owerspel in ’n sagter lig.” “Die Engelse geestelike . . . het wenkbroue laat rys toe hy die Kerk se versagte beskouing van die Sewende Gebod gelug het. . . . ‘Ons gesindheid is een van omgee eerder as veroordeling’, het hy gesê.”—The Sunday Times, Perth, Australië.35
“Unitariërs keer homoseksuele huwelike goed.”—The New York Times.36
“’n Studiegroep van die Verenigde Kerk van Kanada het die ordening van bedrywige homoseksuele as predikante goedgekeur.”—The Toronto Star.37
“Wettig prostitusie—Dis die vroom oplossing.”—Hoofartikel deur ’n Katolieke monseigneur in die Philadelphia Daily News.38
[Prent op bladsy 25]
Die geestelikes het hulle hande met bloed bevlek ter ondersteuning van diktators